Read KO E TOH TAPU KATOA TONGA KO HOSEA 9 Bible Online

KO HOSEA 9 - KO E TOH TAPU KATOA TONGA bible

KO HOSEA 9

¹‘E ‘ISILELI, ‘oua te ke fakafiefia, ‘o tome‘e, hangē ko e ngaahi kakai; he kuo ke fai fe‘auaki, ‘o li‘aki ho ‘Otua, na‘a ke ‘ofa ki he to‘ongapō na‘e fokotu‘u ‘i he haha‘anga uite kotoa.

²‘E ‘ikai fe‘unga mo honau tauhi ‘a e haha‘anga mo e tata‘o‘anga, ‘io, ‘e hala ai ‘a e uaine fo‘ou.

³‘E ‘ikai te nau nofo ‘i he fonua ‘o Sihova: kae foki ‘a ‘Ifalemi ki ‘Isipite, pea te nau kai me‘a ta‘ema‘a[28] ‘i ‘Āsilia.

⁴‘E ‘ikai te nau lilingi uaine kia Sihova, pea ‘e ‘ikai hōifua hono finangalo ‘i he‘enau ngaahi feilaulau; te nau hangē ko e me‘akai ‘o e putu kiate kinautolu; ‘ilonga ha kai ai te ne ta‘ema‘a: seuke, ko ‘enau me‘akai ‘oku ma‘a ‘enau havala pē; ‘oku ‘ikai hū ki he fale ‘o Sihova.

⁵Ko e hā ‘amoutolu ‘e fai ‘i he ‘aho kotofa, ‘io, ‘i he ‘aho ‘o e kātoanga ‘o Sihova?

⁶He vakai kuo nau ‘alu telia ‘a e faka‘auha: ‘e tānaki kinautolu ‘e ‘Isipite; ‘e tanu kinautolu ‘e Mēfisi; ko honau lata‘anga teunga siliva ko e tofi‘a ‘o e ‘akau veli; kuo tupu ‘a e talatala ‘i honau tēniti.

⁷Kuo hoko mai ‘a e taimi ‘eke, kuo hoko mai ‘a e taimi totongi; koe‘uhi ko e lahi ‘o ho‘o kovi, mo e lahi ‘o e fakafili kuo fai, ‘e ‘ilo ‘e ‘Isileli: ‘oku sesele ‘a e palōfita, ‘oku valelau ‘a e tangata laumālie‘ia.

⁸‘E ‘Ifalemi, ko e taulama ‘oku tu‘u mo hoku ‘Otua; ko e palōfita na ko e hele ‘a e hilimanu kuo fokotu‘u ‘i he hala kotoa pē, ko e fakafili ia ‘i he fale ‘o hono ‘Otua.

⁹Kuo nau fakaloloto ‘enau mousa‘a, ‘o hangē ko e taimi ‘o Kipea;[29] te ne manatu ‘enau kovi, te ne ‘eke ‘enau hia.

¹⁰Ko ‘eku ‘ilo ‘a ‘Isileli na‘e hangē ko ha ‘ilo kālepi ‘i he toafa; ko ‘eku sio ki ho‘omou ngaahi kui na‘e tatau mo e polopolo fiki ‘i he ‘uluaki ta‘u fua: ‘alu ‘a e fa‘ahinga na kia Peali-Peoli, ‘o nau luva kinautolu kia Pōseti (Mā‘anga), pea nau hoko ko e koto fakalielia tatau mo honau ‘ofa‘anga.

¹¹Ko ‘Ifalemi ‘e puna hono lāngilangi hangē ko e manupuna. Te nau ta‘eha fā‘ele, mo ta‘eha feitama, mo ta‘eha tu‘itu‘ia;

¹²he neongo te nau tauhi ‘enau fānau ke lalahi, ka te u faka-ta‘e-ha-fānau kinautolu, ke ‘ikai kei ha tangata. Seuke, ko e toki ‘oiauē kinautolu ‘oka u ka mahu‘i atu.

¹³Ko ‘Ifalemi na‘e hangē ko ‘eku tu‘utu‘uni ki Taia, ko e taha kuo hunuki ‘i ha nofo‘anga ma‘u: ka ko ‘Ifalemi te ne taki atu ‘ene fānau ki he tangata fakapō.[30]

¹⁴‘E Sihova, ‘ange kiate kinautolu — ko e hā nai te ke ‘ange? — ‘Ange ha manava tamatō, pea mo ha huhu maha.

¹⁵‘Oku kātoa ‘enau kovi ‘i Kilikali; seuke, ko e potu ko ia na‘a ku fehi‘a ai kiate kinautolu: ko e me‘a ‘i he kovi ‘o ‘enau fai anga, ko ia te u kapusi kinautolu mei hoku fale: ‘e ‘ikai te u toe ‘ofa kiate kinautolu; ko honau hou‘eiki kotoa ko e kau angatu‘u.

¹⁶Kuo te‘ia ‘a ‘Ifalemi, kuo mōmoa honau aka, ‘e ‘ikai te nau fua: tala atu, neongo te nau fā‘ele, ka te u tāmate‘i ‘a e koloa ‘o e manava.

¹⁷‘E fakatale‘i kinautolu ‘e hoku ‘Otua, koe‘uhi na‘e ‘ikai te nau ongo‘i ia: pea te nau hoko ko e kau hēhētu‘u ki he ngaahi pule‘anga.