Read KO E TOH TAPU KATOA TONGA KO SIOELI 1 Bible Online

KO SIOELI 1 - KO E TOH TAPU KATOA TONGA bible

KO SIOELI 1

¹KO E folofola ‘a Sihova ‘a ia na‘e hoko kia Sioeli foha ‘o Petueli.

²Fanongo ki he me‘a ni, ‘a e kau mātu‘a, ‘Io, fokotu‘u telinga mai, ‘a e nofo kātoa ‘o e fonua. He kuo ai ha me‘a pehē ‘i homou taimi, Pe ‘i he taimi ‘o ho‘omou ngaahi kui?

³Fakamatala ki ai ki ho‘omou fānau, Pea ke fai ‘e ho‘omou fānau ki he‘enau fānau, Pea ke fai ‘e he‘enau fānau ki he to‘utangata ka hoko.

⁴Ko e me‘a ne toe mei he he‘e-‘ola Kuo kai ‘e he he‘e-fakafolau; Pea ko e me‘a ne toe mei he he‘e-fakafolau, Kuo kai ‘e he he‘e-‘emo; Pea ko e me‘a ne toe mei he‘e-‘emo, Kuo kai ‘e he he‘e-fohi.

⁵Ofo hake, ‘a e kau, inu kava, ‘o tangi; Pea mou ‘oiauē, ‘a e kau inu uaine, Koe‘uhi ko e uaine fo‘ou; He kuo fa‘ao mei homou ngutu.

⁶He kuo ‘alu hake ha kakai ki hoku funga fonua, Ko e fa‘ahinga kaukaua, mo ta‘emalaua; Ko hono nifo ko e nifo ‘o e laione, Pea ko ‘ene u‘u ko e u‘u ‘a e laione toutama.

⁷Kuo ne ngaohi ‘eku vaine ke ka‘anga, Pea ko ‘eku fiki ke potupotu‘i ‘akau pē: Kuo ne fohi ia ke mafohi, ‘o tuku li‘aki; Kae hā hinehina mai hono ngaahi va‘a.

⁸Tangilāulau hangē ha ta‘ahine kuo ‘ai tauanga‘a, Koe‘uhi ko e husepāniti ‘ene finemui.

⁹Kuo motuhi ‘a e feilaulau-me‘akai mo e feilaulau-me‘ainu Mei he fale ‘o Sihova; ‘Oku fakamamahi ‘a e kau taula‘eiki, ‘A e kau tauhi ‘o Sihova.

¹⁰Kuo laiki ‘a e ngoue‘anga, ‘Oku tangi ‘a e kelekele; He kuo laiki ‘a e uite, Kuo mātu‘u ‘a e uaine fo‘ou, Kuo nginingini ‘a e me‘a lolo.

¹¹Mou mā, ‘a e kau fa‘a, Mou tangi ‘oiauē, ‘a e kau tauhi vaine, Koe‘uhi ko e uite, pea koe‘uhi ko e pa‘ale; He kuo ‘auha ‘a e fua ‘o e ngoue.

¹²Kuo mōmoa ‘a e vaine pea ‘oku laumea ‘a e fiki; Ko e pomikānite, Ko e paame foki, mo e moli, ‘Io, ko e ‘akau kotoa pē ‘o e vao kuo pakupaku: Seuke, kuo pakupaku ‘a e fiefia mei he hako ‘o e tangata.

¹³‘a e kau taula‘eiki, mou ‘ai tauanga‘a, Pea tangi fetuki; Mou tangi ‘oiauē, ‘A e kau tauhi ‘o e ‘ōlita; Mou omi, ‘a e kau tauhi ‘o hoku ‘Otua, ‘Ila mo e tauanga‘a ‘o ‘aho: He kuo ta‘ofi mei he fale ‘o homou ‘Otua ‘a e feilaulau-me‘akai mo e feilaulau-me‘ainu.

¹⁴Tu‘utu‘uni ha lotu ‘aukai, Tala ha fu‘u fakataha, Tānaki ‘a e mātu‘a, ‘Io, ‘a e nofo kotoa ‘o e fonua Ki he fale ‘o Sihova ko homou ‘Otua, Pea mou tautapa kia Sihova.

¹⁵‘Oiauē ‘a e ‘Aho na He ‘oku ofi ‘a e ‘Aho ‘o Sihova, ‘Io, ‘oku hoko mai ‘o taau mo ha faka‘auha meia Faka‘auha.[1]

¹⁶‘Ikai kuo tu‘usi ‘a e me‘akai ‘Oku lolotonga sio ki ai hotau mata? Tu‘usi ‘a e fiefia mo e tome‘e, Mei he fale ‘o hotau ‘Otua?

¹⁷Kuo popo ‘a e ngaahi fa‘ahinga tenga Ko e ta‘omi kinautolu ‘e he kelekele fefeka; ‘Oku tuku li‘aki ‘a e ngaahi feleoko, ‘Oku holo ‘a e ngaahi fale koloa, He kuo mae ‘a e uite.

¹⁸Hono ‘oku to‘e ‘a e fanga manu! ‘Oku puputu‘u ‘a e ngaahi takanga pulu, Ko e ‘ikai hano kaikai‘anga; Na‘a mo si‘i ngaahi takanga sipi ‘oku lave ai ‘a e tautea.

¹⁹Ko koe, Sihova, ‘oku ou tangi ki ai: He kuo keina ‘e he afi ‘a e ngaahi kaikai‘anga ‘o e toafa, Pea kuo ‘emohia ‘e he ulo ‘a e ngaahi ‘akau ‘o e vao.

²⁰Na‘a mo e fanga manu ‘o e vao ‘oku nau lolotu ki he ‘Afiona: He kuo mātu‘u ‘a e ngaahi tafenga vai, Pea kuo keina ‘e he afi ‘a e ngaahi kaikai‘anga ‘o e toafa.