Read KO E TOH TAPU KATOA TONGA KO SIOELI 2 Bible Online

KO SIOELI 2 - KO E TOH TAPU KATOA TONGA bible

KO SIOELI 2

¹MOU ifi talupite ‘i Saione, ‘Io, ‘ai ke maongo atu ‘i hoku mo‘unga tapu;[2] Ke tete ‘a e nofo fonua kotoa pē: He ‘oku hoko mai ‘a e ‘Aho ‘o e ‘Eiki,[3] Seuke, ‘oku ofi.

²Ko e ‘aho po‘uli ko e kaupō‘uli, ko e ‘aho ‘o e loa mo e po‘uli matolu, ko e hangē ena ko e mafoa ‘a e ‘ata ‘i he funga mo‘unga. Ko e kakai lahi mo kaukaua ena, te‘eki hano tatau talu mei mu‘a ‘i mu‘a, pea hili ia ‘e ‘ikai toe ‘i ai, ‘o laui to‘utangata.

³‘Oku tāimu‘a ki ai ha afi keina; Pea ‘oku ‘emo mei mui ha afi ulo: Ko e fonua ‘i he‘ene a‘u ki ai ‘Oku hangē ko e ngouetapu ‘i ‘Īteni, Ka ‘i he‘ene tuku ki mui Ko e toafa mamate; Pea na‘a mo e me‘a na‘e holataki Na‘e ‘ikai ma‘u.

⁴Ko honau fōtunga na‘e hangē ko e fōtunga ‘o e hoosi; pea hangē ko e tau heka hoosi na‘e pehē ‘enau lele.

⁵‘Oku ongoonga‘a ‘enau fehopokaki ‘o hangē ko e longoa‘a ‘o e ngaahi sāliote ‘i he funga mo‘unga, hangē ko e longoa‘a ‘o e ulo ‘o e afi ‘oku keina ‘a e veve, ko e longoa‘a tofu pē ‘o ha kakai kaukaua kuo ‘osi fakatē ki he tau.

⁶He‘enau hā mai ‘oku toutou ‘a e ngaahi kakai: ‘Oku mole ‘a e melo mei he mata kotoa.

⁷Ko ‘enau ‘oho ‘oku hangē ha kau helo; ‘Oku nau kaka ‘i he ‘ā hangē ha tau; Pea ‘oku nau fou atu takitaha ‘i hono ‘alunga, Pea ‘oku ‘ikai te nau afe mei honau ‘otu.

⁸Pea ‘oku ‘ikai ke fepaki ha taha mo ha taha; ‘Oku ‘alu ‘a e sōtia takitaha ‘i hono laine: Pea ‘i he‘enau tū‘ulu ki he mahafu, ‘Oku ‘ikai motu ai ‘enau ‘alu.

⁹‘Oku nau lele holo ‘i he kolo; ‘Oku nau lele ‘i he ‘ā; ‘Oku nau kaka ki he ngaahi fale; ‘Oku nau hū he ngaahi tupa hangē ha kaiha‘a.

¹⁰He‘enau hā, ‘oku tete ‘a e fonua; ‘Oku ngāue ‘a langi; ‘Oku fakapo‘uli ‘a e la‘ā mo e māhina, Pea ‘oku tuku ‘e he ngaahi fetu‘u ‘enau ulo.

¹¹Pea ‘oku tukuna atu ‘e Sihova hono le‘o ‘i he ‘ao ‘o ‘ene tau; he ‘oku lahi ‘aupito ‘ene ‘apitanga tau: pea ‘oku kaukaua ‘a ia ‘oku fakaai ‘ene folofola, Seuke, ko e ‘aho lahi mo fakalilifu ‘aupito ‘a e ‘Aho ‘o e ‘Eiki; pea ko hai te ne matu‘uaki?

¹²Pea na‘a mo e taimi ni — ko Sihova ia mei he Ta‘ehāmai — mou mātu‘aki tafoki kiate au ‘aki ‘a e kotoa ‘o homou loto, pea ‘aki ‘a e ‘aukai, pea ‘aki ‘a e tangi, pea ‘aki ‘a e tangilāulau:

¹³Pea hae homou loto, ‘o ‘ikai ko homou kofu, pea mou foki kia Sihova ko homou ‘Otua; he ko e Angalelei ia mo e ‘Alo‘ofa, Tuai-ki-he-houhau, pea Fonu-‘i-he-kelesi, pea ‘oku ne momou ‘i he kovi.

¹⁴Na‘e ‘ilo ‘e hai te ne tafoki nai, ‘o momou, pea te ne tuku hifo ha tāpuaki ‘i he‘ene ‘alu, ‘o ai ha feilaulau-me‘akai mo ha feilaulau-me‘ainu ma‘a Sihova ko homou ‘Otua.

¹⁵Mou ifi talupite ‘i Saione, Tu‘utu‘uni ha ‘aukai tapu, Fanongonongo ha tapu ngāue;

¹⁶Fakatefua mai ‘a e kakai, Tu‘utu‘uni ha fakataha fakasiasi; Tānaki ‘a mātu‘a, Fakatefua mai ‘a e tamaiki mo e kei huhu: Ke ha‘u ‘a e tangata ta‘ane mei hono loki, Mo e ta‘ahine mei hono leke.

¹⁷Ke tangi ‘a e kau taula‘eiki, ‘A e kau tauhi ‘o Sihova, ‘I he vaha‘a ‘o e falehū‘anga mo e ‘ōlita; Pea ke nau pehē: ‘E Sihova, ‘alo‘ofa mai ki ho kakai, Pea ‘Oua ‘e tuku ho tofi‘a ko e manukia, Ke taungalea ‘iate kinautolu ‘a e hīteni: Koe‘uma‘ā ke fai ha lau ‘i he ngaahi kakai, “Koma‘ā honau ‘Otua?”

¹⁸Toki kamata fua‘a ‘a Sihova koe‘uhi ko hono fonua, ‘O ne manava‘ofa ki hono kakai.

¹⁹Pea tali ‘e Sihova, ‘o ne folofola ki hono kakai, Ko au eni ‘oku ou tuku atu ‘a e uite, mo e uaine fo‘ou, mo e lolo, ke mou mākona ai; pea ‘e ‘ikai te u toe tuku kimoutolu ke manukia ‘e he hīteni:

²⁰Pea te u ‘ave ke mama‘o meiate kimoutolu ‘a e ha‘a tokelau na. Pea te u fakateka ia ki ha fonua honge vai mo lala, ko hono takitau ki he tahi hahake, pea ko hono tukutau ki he tahi hihifo; pea ‘e taufa mai hono namukū, pea ‘e ‘alu hake hono ‘elo, he kuo ne fai me‘a lalahi.

²¹Kelekele, ‘oua ‘e manavahē; tome‘e mo fakafiefia; he ‘oku fai me‘a lalahi ‘e Sihova.

²²Fanga manu ‘o e vao, ‘oua ‘e manavahē; he ‘oku fisiki mai ‘a e ngaahi kaikai‘anga ‘i he toafa; seuke, ‘oku fakatupu fua ‘a e ‘akau, ‘oku tukuna atu ‘e he fiki mo e vaine ‘enau mālohi.

²³Mo si‘i hako ‘o Saione, mou tome‘e mo fakafiefia ‘ia Sihova ko homou ‘Otua: he ‘oku ne ‘atu kiate kimoutolu ‘a Vaimu‘a[4] ‘i he totonu,[5] ‘io, te ne hifo kiate kimoutolu ‘a e ‘uha, ‘a Vaimu‘a mo Vaimui he ‘uluaki māhina.[6]

²⁴Pea ‘e fonu uite ‘a e ngaahi ‘au‘au‘anga, pea ‘e fonu mahua ‘a e ngaahi sima ‘i he uaine mo e lolo.

²⁵Pea te u fakaai kiate kimoutolu ‘a e ngaahi ta‘u na‘e keina ai ‘e he he‘e-fakafolau, ‘a e he‘e-‘emo, mo e he‘e-fohi, mo e he‘e-‘ola, ‘a ‘eku fu‘u hōsitē na‘a ku fekau atu kiate kimoutolu.

²⁶Pea te mou kai, kai, ‘o mākona, pea te mou fakamālō‘ia ‘a e Huafa ‘o Sihova ko homou ‘Otua, hono kuo fakaofo ‘ene feangai mo kimoutolu: pea ‘e ‘ikai fakamaa‘i hoku kakai ‘o ta‘engata.

²⁷Pea te mou ‘ilo ‘oku ou lotolotoi ‘a ‘Isileli ‘e au, pea ko au Sihova ia ‘a homou ‘Otua, pea ‘oku ‘ikai mo ha taha; pea ‘e ‘ikai fakamaa‘i hoku kakai ‘o ta‘engata.

²⁸Pea ‘e hoko ‘i he kuonga ki mui, te u lilingi hoku laumālie ki he kakano kotoa; pea ‘e fai palofisai ‘e homou ngaahi foha mo homou ngaahi ‘ōfefine, ko e mātu‘a ‘omoutolu te nau fa‘a misi, ko e kau talavou ‘omoutolu te nau mata vīsone:

²⁹‘io, na‘a mo e kau tamaio‘eiki mo e kau kaunanga te u lilingi hoku Laumālie kiate kinautolu ‘i he kuonga ko ia.

³⁰Pea te u ‘ai ‘a e ngaahi me‘a fakaofo ‘i he langi pea ‘i māmani, ko e toto, mo e afi, mo e ngaahi pou kohu.

³¹‘E liliu ‘a e la‘ā ‘o po‘uli, mo e māhina ‘o toto, ‘i he tei hoko ‘a e ‘Aho ‘o Sihova, ‘a e ‘aho lahi mo fakalilifu.

³²Pea ‘e hoko ‘o pehē, ko ia ‘oku tautapa ki he huafa ‘o Sihova ‘e fakahaofi: he ai ha kau hao ‘i Mo‘unga Saione mo Selusalema, ‘o hangē ko e folofola ‘a Sihova, pea ‘e ‘i he kau toe ‘a kinautolu ‘oku ui ‘e Sihova.