Read KO E TOH TAPU KATOA TONGA KO SIOELI 3 Bible Online

KO SIOELI 3 - KO E TOH TAPU KATOA TONGA bible

KO SIOELI 3

¹HE vakai, ‘i he ngaahi ‘aho ko ē, mo e kuonga ko ia, ‘a ia te u liliu ai ‘a e pōpula ‘o Siuta mo Selusalema,

²te u toki tānaki ‘a e ngaahi kakai ko ē kotoa, pea te u ‘ohifo kinautolu ki he Tele‘a ‘o Sihosafate (‘Oku-fai-fakamaau ‘a Sihova); pea te u hopo mo kinautolu ‘i ai koe‘uhi ko hoku kakai, mo hoku tofi‘a ko ‘Isileli, ‘a ia kuo nau fakamovetevete ‘i he ngaahi pule‘anga, pea kuo nau tufa hoku fonua.

³Pea kuo nau fai talotalo ki hoku kakai; pea kuo nau ‘ange ha talavou ke ma‘u ‘aki ha pa‘umutu, mo ha finemui ke fakatau ‘aki ha uaine, ke nau inu.

⁴Pea ko Taia foki, mo Saitoni, mo e ngaahi Seakale ‘o Filisitia, ko e hā ho‘omou me‘a ‘oku fai kiate au? ko ho‘omou totongi kiate au ha me‘a kuo fai? ‘Io, kapau ko ho‘omou lau totongi kiate au, ‘e vave, ‘e to‘oto‘o ‘eku fakafoki ho‘omou ngāue ki homou tumu‘aki.

⁵Koe‘uhi kuo mou to‘o ‘eku siliva mo ‘eku koula, pea ko ‘eku ngaahi siueli fungani kuo mou fakahū ki homou ngaahi temipale;

⁶pea ko e ha‘a Siuta mo e ha‘a Selusalema kuo mou fakatau ki ha‘a Kalisi, koe‘uhi ke ‘ave kinautolu ke mama‘o mei honau feitu‘u:

⁷ko au eni te u langa‘i kinautolu mei he potu kuo mou fakatau kinautolu ki ai, pea te u fakafoki ho‘omou ngāue ki homou tumu‘aki.

⁸‘Io, te u fakatau ho‘omou fānau tangata mo fānau fefine ki he nima ‘o ha‘a Siuta, pea te nau fakatau kinautolu ki he kau Sipa, ki ha kakai mama‘o — tala atu ko e folofola ia ‘a Sihova.

⁹Fanongonongo eni ‘i he ngaahi pule‘anga, Mou lotua ‘a e tau: o‘i ‘a e kau helo; ke fe‘unu‘i mai ‘a e kau sōtia kotoa, ‘o ‘alu hake.

¹⁰Tuki heletā ‘aki homou ngaahi huo toho, pea tuki tao ‘aki ho‘omou ngaahi hele ‘auhani: na‘a mo e vaivai ke ne lau, Kuo u fu‘u mālohi.

¹¹Vave mai,[7] ‘o ha‘u, ‘a e ngaahi pule‘anga takatakai, ‘io, mou fakatefua mai; fakahā‘ele hifo ho‘o kau helo ki he potu ko ia, ‘e Sihova.

¹²Ke ofo hake ‘a e ngaahi pule‘anga, ‘o ‘alu hake ki he Tele‘a ‘o Sihosafate: he ko e potu ia te u nofo ai ke fakamaau ‘a e ngaahi pule‘anga takatakai.

¹³‘Ai ‘a e hele tu‘usi, he kuo momoho ‘a e ta‘u: mou omi, fai ‘a e malaki; he kuo fonu ‘a e tata‘o‘anga, ‘oku fonu mahua ‘a e ngaahi sima; he ko ‘enau kovi ‘oku lahi.

¹⁴‘a e uōuōtu‘u, ‘a e uōuōtu‘u ‘i he tele‘a ko Hilifaki-tautea! Seuke, ka hoko ki he tele‘a ko Hilifaki-tautea, ‘oku ofi ‘a e ‘Aho ‘o Sihova.

¹⁵Kuo fakapo‘uli ‘a e la‘ā mo e māhina, pea kuo tuku ‘e he ngaahi fetu‘u ‘enau ulo.

¹⁶Pea ‘oku kālou ‘a Sihova mei Saione, pea ‘oku ne tukuna hono le‘o mei Selusalema; pea ‘oku ngāue ‘a e langi mo e fonua: ka ko Sihova ko e hūfanga ki hono kakai, ‘io, ko e talitau‘anga ki ha‘a ‘Isileli,

¹⁷Pea te mou ‘ilo ko au Sihova ia ‘a homou ‘Otua, ‘oku nofo fonua ‘i Saione ko hoku mo‘unga tapu: pea ‘e hoko ‘a Selusalema ko e potu tapu, pea ‘e ‘ikai toe laka atu ai ‘a e kau muli.

¹⁸Pea ‘e hoko ‘i he taimi ko ia, ‘e huhua hifo ‘a e ngaahi mo‘unga ko e uaine, pea ‘e fetafei ‘a e ngaahi mā‘olunga ko e hu‘akau, pea ‘e vaia ‘a e ngaahi halanga vai kotoa ‘o Siuta; pea ‘e ‘alu atu ha tufu mei he fale ‘o Sihova, ‘o fakaviviku ‘a e talalo ko Sītimi.

¹⁹‘E hoko ‘a ‘Isipite ko e lala, pea ‘e hoko ‘a ‘Ītomi ko e toafa mamate, koe‘uhi ko ‘enau fakamālohia ‘a ha‘a Siuta, hono kuo nau lingi ‘a e toto ‘o e ta‘ehalaia ki honau fonua.

²⁰Ka ko Siuta ‘e nofo‘ia ia ‘o ta‘engata, pea ko Selusalema ki he to‘utangata mo e to‘utangata.

²¹Pea te u faka‘osi ‘a e toto ‘onautolu kuo te‘eki ke u faka‘osi:[8] he ‘oku nofo fonua ‘a Sihova ‘i Saione.