Read KO E TOH TAPU KATOA TONGA KO ‘ĒMOSI 2 Bible Online

KO ‘ĒMOSI 2 - KO E TOH TAPU KATOA TONGA bible

KO ‘ĒMOSI 2

¹KO E folofola eni ‘a Sihova; He ‘oku tolu pē ‘a e angahala ‘a Moape, Pe ‘oku fā pē? ‘E ‘ikai te u lolou: he na‘a nau tutu ke lahe ‘a e ngaahi hui ‘o e Tu‘i ‘Ītomi.

²Pea te u fekau atu ha afi ki Moape, Pea te ne keina ‘a e ngaahi palasi ‘o Kilioti; Pea ‘e mate ‘a Moape mo e maveuveu, mo e kaila tau, ‘A e ongoonga‘a mai ‘a e talupite:

³Pea te u tu‘usi meiate kinautolu ‘a e fakamaau, Pea ko hono hou‘eiki kotoa te u tāmate‘i mo ia — ko e folofola ia ‘a Sihova.

⁴Ko e folofola eni ‘a Sihova: He ‘oku tolu pē ‘a e angahala ‘a Siuta, Pe ‘oku fā pē? ‘E ‘ikai te u lolou: He na‘a nau fakasīkaka‘i ‘a e lao ‘a Sihova, pea na‘e ‘ikai te nau tauhi ‘ene ngaahi fekau, pea na‘e takihee‘i kinautolu ‘e he‘enau ngaahi loi, ‘a e ngaahi me‘a na‘e muimui ki ai ‘e he‘enau ngaahi tamai.

⁵Pea te u fekau atu ha afi ki Siuta, Pea te ne keina ‘a e ngaahi palasi ‘o Selusalema.

⁶Ko e folofola eni ‘a Sihova: He ‘oku tolu pē ‘a e angahala ‘a ‘Isileli, Pe ‘oku fā pē? ‘E ‘ikai te u lolou: He na‘a nau fakatau ‘a e faitotonu ‘aki ha pa‘anga pē, mo e masiva koe‘uhi ko ha hoa‘i sū pē.

⁷‘A kinautolu ‘oku nau mamae ki he efu ‘i he ‘ulu ‘o e[2] tu‘utāmaki, pea ‘oku nau piko‘i ‘a e hala ‘o e vaivai; pea ko e tangata mo ‘ene tamai te na ‘i ha ki‘i fefine pē taha, ko e fai ke pā‘usi‘i hoku hingoa tāpuhā.

⁸Pea ‘oku nau tokoto fakaloloa ‘i he ngaahi kofu talifaki ‘i he tafa‘aki ‘ōlita fua pē, pea nau inu ‘a e uaine ‘a e kau mo‘ua ‘i he fale ‘o honau ‘Otua.

⁹Ka ko au na‘a ku faka‘auha ‘a e ‘Āmoli ‘i honau ‘ao, ‘a ia na‘e tatau hono fotu mo e sita, pea na‘a ne mālohi hangē ko e ‘oke; ka na‘a ku maumau‘i hono fua mei ‘olunga, mo hono ngaahi aka mei lalo.

¹⁰‘Io, ko au na‘a ku ‘ohake kimoutolu mei ‘Isipite, pea u taki kimoutolu ‘i he toafa ‘o fāngofulu ta‘u, ke ma‘u ‘a e fonua ‘o e ‘Āmoli.

¹¹Pea na‘a ku fokotu‘u ha‘amou fānau ke palōfita, mo e matamata ‘o homou talavou ke nāsili.[3] ‘Ikai ‘oku pehē, ‘e ha‘a ‘Isileli? — ko Sihova ia mei he Ta‘ehāmai.

¹²Ka na‘a mou fakainu uaine ‘a e kau nāsili; pea na‘a mou kouna ‘a e kau palōfita, ‘o mou pehē, ‘Oua te mou palofisai.

¹³Vakai, ko au ‘oku ou mafasia ‘i ho‘omou ta‘omi, ‘O hangē ko e mafasia ‘a ha sāliote kuo fonu ‘i he ‘ū koane.[4]

¹⁴Pea ‘e ta‘e‘aonga ‘a e hola ki he ve‘evave, Pea ko e kaukaua ‘e ‘ikai te ne lava ke o‘io‘i hono ngū, Pea ko e helo ‘e ‘ikai te ne fakahaofi ‘ene mo‘ui:

¹⁵Pea ‘e ‘ikai mātu‘u, ‘a ia ‘oku ala ki he kaufana; Pea ko e ve‘ekimokimo ‘e ‘ikai te ne mafakahaofi ia. Pea ko si‘i heka hoosi ‘e ‘ikai te ne fakahaofi ‘ene mo‘ui:

¹⁶Pea ko e to‘a tete‘e ‘i he kau helo te ne hola ‘i he ‘aho ko ia mo e vala si‘i[5] — Ko Sihova ia mei he Ta‘ehāmai.