Read KO E TOH TAPU KATOA TONGA KO ‘ĒMOSI 3 Bible Online

KO ‘ĒMOSI 3 - KO E TOH TAPU KATOA TONGA bible

KO ‘ĒMOSI 3

¹MOU fanongo ki he lea ko eni, ‘a ia kuo folofola‘aki ‘e Sihova, ‘o kau kovi kiate kimoutolu, ha‘a ‘Isileli; ‘io, ki he fāmili kotoa ne u ‘ohake mei ‘Isipite,

²‘o pehē, Ko kimoutolu pe kuo u ‘ilo ki ai ‘i he ngaahi fāmili kotoa ‘o māmani: ko ia te u ‘eke kiate kimoutolu ho‘omou ngaahi kovi kotoa pē.

³‘E hā‘ele fakataha ha toko ua, ‘oka ‘oku te‘eki ke na alea?

⁴‘E kālou ha laione ‘i ha vao, Ka ‘oku te‘eki ha‘ane ha‘alu? ‘E tukuna atu hono le‘o ‘e ha manu hau mei hono ‘ana, Ka ‘oku ‘ikai hano ola?

⁵‘E tō ‘a e manupuna ki ha hele ‘i he kelekele, ‘Osi, kuo ‘ikai fanga ha helepuna ki ai? ‘E puna hake ‘a e hele mei he kelekele, ‘O ‘ikai pō ha me‘a?

⁶‘Oku ifi koā ‘a e talupite ‘i ha kolo, ‘O ‘ikai tete ‘a e kakai? ‘E hoko koā ha kovi ‘i ha kolo, Ka ‘oku ‘ikai ko Sihova ia ‘oku fai?

⁷Seuke, tala‘ehai ‘e fai ‘e ‘Ātonai Sihova ha me‘a, ka te ne fukefuke ki he‘ene kau tamaio‘eiki ko e kau palōfita ‘a e me‘a kuo tu‘utu‘uni.

⁸Kuo kālou ‘a e Saione, Ko hai ‘e ‘ikai manavahē? Kuo folofola ‘a ‘Ātonai Sihova, Ko hai ‘e mata‘epalofisai?

⁹Fanongonongo ‘i he ngaahi palasi ‘o ‘Asitoti, pea ‘i he ngaahi palasi ‘o ‘Isipite; ‘Io, mou tala, Mou fakatahataha ki he ngaahi mo‘unga ‘o Samēlia, ‘o mou sio ki he ngaahi fu‘u maveuveu ‘i loto kolo, mo e kakai ‘i ai ‘oku fakamālohia.

¹⁰He ‘oku ‘ikai te nau ‘ilo ke faitotonu — ko Sihova ia mei he Ta‘ehāmai — ‘a e fa‘ahinga ‘oku fa‘oaki ‘a e fakamālohi mo e fakaehaua ‘i honau ngaahi palasi.

¹¹Ko ia ko e folofola eni ‘a ‘Ātonai Sihova, Ko e fili ena, pea te ne takai ki he fonua; pea te ne ‘ohifo ho ivi meiate koe, pea ‘e vete ho ngaahi palasi.

¹²Ko e folofola eni ‘a Sihova, Hangē ‘oku hamusi ‘e he tauhi-manu mei he ngutu ‘o e laione ha ongo hui va‘e, pe ha konga telinga; ‘e pehē ‘a e hamusi ‘o ha‘a ‘Isileli, ko kinautolu ‘oku nofo ‘i Samēlia, ‘i he tuliki ‘o e sofa, mo e Tāmasikusi[6] ‘o e longa.

¹³Mou fanongo, pea fakamo‘oni ki ai ‘i he fale ‘o Sēkope — ko ‘Ātonai Sihova ia mei he Ta‘ehāmai, ko e ‘Otua ‘o e ngaahi Hōsitē — ‘o pehē;

¹⁴‘I he ‘aho ‘o ‘eku ‘eke ‘a e ngaahi angahala ‘a ‘Isileli kiate ia, te u ‘a‘ahi foki ki he ngaahi ‘ōlita ‘i Pēteli, pea ‘e tu‘usi ‘a e ngaahi nifo ‘o e ‘ōlita, pea te nau tō ki he kelekele.

¹⁵Pea te u taa‘i ‘a e fale fākavao fakataha mo e fale fakamokomoko; pea ‘e ‘auha ‘a e ngaahi fale lei, pea ‘e mole ‘a e ngaahi fale lahi — ko Sihova ia mei he Ta‘ehāmai.