Read KO E TOH TAPU KATOA TONGA KO ‘ĒMOSI 7 Bible Online

KO ‘ĒMOSI 7 - KO E TOH TAPU KATOA TONGA bible

KO ‘ĒMOSI 7

¹KO eni ‘a e me‘a na‘e tuku ke u sio ki ai ‘e ‘Ātonai Sihova; tā ‘oku ne lolotonga ngaohi ha fuifui he‘e, fe‘unga mo e kamata tupu hake ‘a e tei‘ulu: pea tā ko e tei‘ulu hili ‘a e polopolo ‘a e tu‘i.

²Pea ‘i he faifai pea ‘osi ‘enau keina ‘a e mohuku kai ‘o e fonua, pea u pehē, ‘Ātonai Sihova ē, fakamolemole mu‘a; he tu‘u fēfē ‘a Sēkope? he ko e si‘i.

³Fakatomala ai ‘a Sihova ‘i he mala ko ē: folofola ai ‘a Sihova, ‘E ‘ikai hoko ia.

⁴Ko e me‘a ni na‘e tuku ke u sio ki ai ‘e ‘Ātonai Sihova: tā ‘oku ui mai ‘e ‘Ātonai Sihova ke fai ha hopo ‘aki ha afi: pea hanga ia ‘o keina ‘a e fu‘u moana, ‘io, ‘o ne kamata keina mo e tofi‘a.

⁵Pea u pehē, ‘Ātonai Sihova ē, ma‘u ā mu‘a: ‘e tu‘u fēfē ‘a Sēkope? he ko e si‘i.

⁶Fakatomala ai ‘a Sihova ‘i he mala ko ē, Folofola ai ‘a ‘Ātonai Sihova, ‘E ‘ikai hoko mo ia foki.

⁷Ko e me‘a eni na‘a ne tuku ke u sio ki ai; pea tā ‘oku tu‘u ‘a ‘Ātonai ‘i ha funga ‘ā ne ngaohi ‘aki ha fakavai, pea ‘oku ‘i hono nima ha fuavai.

⁸Pea folofola ‘a Sihova kiate au, “‘Ēmosi, ko e hā ‘oku ke sio ni ki ai?” Pea u tali, Ko e fuavai. Pea folofola ‘a ‘Ātonai, Ko au eni ‘oku ou ‘ai ha fuavai ki he lotolotonga ‘o hoku kakai ‘Isileli: ‘e ‘ikai te u toe lakai ia.

⁹Pea ‘e lala ‘a e ngaahi sia ‘o ‘Aisake, pea ‘e faka‘auha ‘a e ngaahi faletapu ‘o ‘Isileli; pea te u tuku ke fai mo e fale ‘o Selopoame ‘aki ‘a e heletā.

¹⁰Pea ‘alu ai ‘a e fekau ‘a ‘Amasaia ko e taula‘eiki ‘o Pēteli kia Selopoame ko e Tu‘i ‘Isileli, ke fakahā, Kuo puleaki‘i koe ‘e ‘Ēmosi ‘i he lotolotonga ‘o e fale ‘o ‘Isileli: ‘oku ‘ikai lava ‘e he fonua ke matu‘uaki ‘ene ngaahi lea.

¹¹He ko eni ‘a e lea ‘oku fai ‘e ‘Ēmosi, Tokua ‘e mate ‘a Selopoame ‘i he heletā, pea ‘e mātu‘aki taki pōpula ‘a ‘Isileli mei hono kelekele.

¹²Pea lea ‘a ‘Amasaia kia ‘Ēmosi, Si‘i tongafisi, ‘alu: fei mo hola ki he fonua ‘o Siuta, pea ke kai me‘akai ‘i he potu ko ia, pea fai ‘i he potu ko ia ho‘o palofisai.

¹³Kae‘oua te ke toe palofisai ‘i Pēteli; he ko e falelotu ia ‘o e tu‘i, pea ko e fale fakapule‘anga.

¹⁴Pea tali ‘e ‘Ēmosi, ‘o ne pehē kia ‘Amasaia, Na‘e ‘ikai ko e palōfita au, pea na‘e ‘ikai te u kau ki ha‘a palōfita; ka ko e tauhimanu au, mo e tama tele sukamino:

¹⁵pea na‘e to‘o au ‘e Sihova mei he muimui ki he tākanga, pea folofola mai ‘a Sihova, ‘Alu ‘o fai palofisai ki hoku kakai ‘Isileli,

¹⁶pea ko eni fanongo ā ki he folofola ‘a Sihova: ‘Oku ke pehē mai ‘e koe, ‘oua te ke palofisai ki ‘Isileli, pea ‘oua ‘e mokulu ho‘o lea ki he fale ‘o ‘Aisake.

¹⁷Ko ia ko e folofola eni ‘a Sihova, ‘E hoko ho uaifi ko e pa‘umutu ‘i he kolo, pea ko ho‘o fānau tangata mo fānau fefine te nau tō ‘i he heletā, pea ‘e tufa ho kelekele ‘aki ‘a e afo; pea te ke pekia ‘e koe ‘i ha kelekele ‘oku ta‘ema‘a, pea ‘e mātu‘aki ‘ave pōpula ‘a ‘Isileli mei hono kelekele.