Read KO E TOH TAPU KATOA TONGA KO ‘ĒMOSI 8 Bible Online

KO ‘ĒMOSI 8 - KO E TOH TAPU KATOA TONGA bible

KO ‘ĒMOSI 8

¹KO E me‘a eni na‘e tuku ke u sio ki ai ‘e ‘Ātonai Sihova: pea tā ko e kato fua‘i ‘akau kuo momoho. Pea ne folofola mai kiate au, ‘Ēmosi, ko e hā ‘oku ke sio ni ki ai?

²Pea u tali, Ko e kato fua‘i ‘akau kuo momoho. Pea folofola ‘a Sihova kiate au, Kuo hoko ‘a e faka‘osi[20] ki hoku kakai ‘Isileli; ‘e ‘ikai te u toe lakai ia.

³Pea ‘e hoko ko e koto ‘Oiauē ‘a e ngaahi hiva ‘i he temipale ‘i he ‘aho ko ia — ko ‘Ātonai Sihova ia mei he Ta‘ehāmai — ‘e lahi ‘a e ngaahi ‘anga‘anga; te ne laku kinautolu ki tu‘a ‘i he potu kehekehe — sī! ‘oua ‘e lea![21]

⁴Fanongoā ki he me‘a ni, ‘a e fa‘ahinga ‘oku fakamanga ke folo ‘a e masiva, pea ke fakaeve ‘a e vaivai ‘o e fonua;

⁵he‘enau pehē, ‘Afē kuo laka atu ‘a e fakamāhina fo‘ou, ke tau fai atu ‘etau fakatau me‘akai? pea ke ‘osi ‘a e Sāpate, ke mau fakaava ‘a e fale koloa uite? ke fakasi‘isi‘i ‘a e ‘efa, pea ke fakalahi ‘a e mamafa ‘o e sikeli, pea ke fakakehe ‘a e fuatautau kākā:

⁶ke fakatau ‘a e vaivai ‘aki ha pa‘anga pe pea ko e masiva koe‘uhi ko ha hoa‘i sū: te tau fakatau foki ‘a e patepate‘i uite.

⁷Kuo fuakava ‘e Sihova ‘i he lāngilangi, ‘o Sēkope, ‘Ilo ‘e au ‘o kapau te u fakangalongalo‘i ‘o ta‘engata ha taha ‘o e ngaahi me‘a kuo nau fai.

⁸‘Ikai koā ‘e tete ‘a e fonua koe‘uhi ko e me‘a ko ia, pea tangi ‘a e nofo kotoa ‘i ai? ‘Āua, ‘e hake kotoa hangē ko Naila; pea ‘e hou mo fonohifo, hangē ko e vaitafe ‘i ‘Isipite.

⁹Pea ‘e hoko ‘i he ‘aho ko ia — ko ‘Ātonai Sihova ia mei he Ta‘ehāmai — te u ‘ai ke tō ‘a e la‘ā kei ho‘atā, pea te u ‘ai ke fakapo‘uli ‘a e fonua lolotonga ‘ene ‘aho maama.

¹⁰Pea te u liliu ho‘omou ngaahi kātoanga ko e koto tangi, pea ko ho‘omou ngaahi hiva kotoa ko e koto tangilāulau; pea te u ‘ai ‘a e tauanga‘a ki homou kongaloto, mo e tula ki he tumu‘aki kotoa pē; pea te u ngaohi ia ke hangē ko e tēngihia ‘o ‘ete me‘a pē taha, pea ko hono iku‘anga ke tatau mo e ‘aho mala.

¹¹Tala atu, ‘oku ‘unu mai ha taimi — ko ‘Ātonai Sihova ia mei he Ta‘ehāmai — ‘a ia te u fekau atu ai ha honge ki he fonua; ‘o ‘ikai ko ha honge me‘akai, pe ko e honge me‘ainu, ka ko e honge ‘i he fanongo ki he folofola ‘a Sihova.

¹²Pea te nau sipi holo mei tahi ki tahi, pea mei he tokelau ki hahake; te nau lele holo ko e kumi ki he folofola ‘a Sihova, kae ‘ikai te nau ma‘u.

¹³‘I he taimi ko ia ‘e pongia ‘a e kau finemui hōihoifua mo e kau talavou ko e fie inua.

¹⁴Ko e fa‘ahinga ‘oku fuakava ‘i he angahala ‘a Samēlia, pea ‘oku nau pehē, “Tangi ‘a e mo‘ui ‘a ho ‘Otua, Tani,” pē, “Tangi ‘a e hala ki Peasipa” — ‘io ‘e tō ‘a kinautolu, ‘o ‘ikai toe tu‘u.