Read KO E TOH TAPU KATOA TONGA KO SIONA 1 Bible Online

KO SIONA 1 - KO E TOH TAPU KATOA TONGA bible

KO SIONA 1

¹PEA na‘e hoko ‘a e folofola ‘a Sihova kia Siona ko e foha ‘o ‘Amitai, ‘o pehē,

²Tu‘u ‘o ‘alu ki Ninive, ‘a e fu‘u kolo ko ia, pea ke fanongonongo ki ai; he kuo a‘u hake ‘enau ngaahi faikovi ki hoku ‘ao.

³Ka ka tu‘u hake ‘a Siona ke hola ki Tāsisi mei he‘ene fakafeangai kia Sihova; ‘o ne ‘alu hifo ki Siopa, pea ne ‘ilo ai ha vaka ‘oku ‘alu ki Tāsisi; pea ne ‘atu ‘a e totongi, ‘o ne heka ki ai, ke ‘alu mo kin1autolu ki Tāsisi mei he‘ene fakafeangai kia Sihova.

⁴Ka ka tuku atu ‘e Sihova ha matangi lahi ki he tahi, pea na‘e hoko ha fu‘u hou ‘i he tahi, pea na‘e hangē ka maumau ‘a e vaka.

⁵Pea na‘e manavahē ‘a e kauvaka, ‘o nau tautapa takitaha ki hono ‘otua; pea nau tolo ‘a e koloa na‘e ‘i he vaka,[1] ke fakama‘ama‘a hono mamafa ko ia.[2] Ka kuo ‘alu hifo ‘a Siona ki he ‘ana, he na‘e fakafungavaka: pea kuo ne tokoto ai ‘o mohe.

⁶Pea ‘alu hifo ki ai ‘a e ‘eikivaka, ‘o ne lea kiate ia, Ko e hā kuo hoko kiate koe, ‘a e mohe na? Tu‘u, tautapa ki ho ‘Otua; hei‘ilo ‘e tokanga‘i kitautolu ‘e he ‘Otua, ‘o ‘oua te tau mole.

⁷Pea nau fealēlea‘aki, ‘Ē, tau talotalo mu‘a, ka tau ‘ilo pe kuo tō mai ‘a e kovi ni koe‘uhi ko hai. Pea nau fai ‘a e talotalo, pea tonu ‘a e talotalo kia Siona.

⁸Pea nau pehē kiate ia, Fakahā mai mu‘a pe ‘oku tau mo‘ua ‘i he kovi ni ko e me‘a ‘a hai. Ko e hā ho lakanga? Pea ko ho‘o ha‘u mei fē? Ko e fē ho fonua? Pea ko e toko taha ‘o e kakai fē?

⁹Pea pehē ‘e ia kiate kinautolu, Ko e Hepelū au; pea ko Sihova ko e ‘Otua ‘o langi ‘oku ou lotu ki ai, ‘a ‘Ene ‘Afio na‘a ne ngaohi ‘a tahi mo e mōmoa.

¹⁰Pea manavahē ‘a e kau tangata — ko e manavahē ka ko ha manavahē — pea nau pehē kiate ia, Ko e hā na‘a ke fai pehē ai?[3] (He na‘e ‘ilo ‘e he kau siana ko ‘ene hola ē mei he fakafe‘ao kia Sihova, he kuo ne tala kiate kinautolu.)

¹¹Pea nau lea kiate ia, ‘o pehē, Ko e hā te mau fai kiate koe, kae laolao mai ‘a e tahi? he na‘e fakautuutu ‘a e tahi ‘ene hou.

¹²Pea pehē ‘e ia kiate kinautolu, Hiki au, ‘o tolo ki tahi; pea ‘e toki laolao ‘a e tahi kiate kimoutolu; he ‘oku ou ‘ilo kuo tō mai ‘a e fu‘u matangi ni kiate kimoutolu koe‘uhi ko au.

¹³Ka ka fekeli ‘a e kau tangata ke a‘u ki ‘uta; ka na‘e ‘ikai te nau lava; he na‘e fakautuutu ‘a e tahi ‘ene hou mai.

¹⁴Ko ia, na‘a nau lotu kia Sihova, ‘o nau pehē, Tauange mo Sihova ke ‘oua na‘a ‘auha kimautolu koe‘uhi ko e mo‘ui ‘a e tangata ni, pea ‘oua ‘e hilifaki kiate kimautolu ha taku fakapō; he ko koe, ‘e Sihova, kuo ke fai ho‘o fa‘iteliha.

¹⁵Pea nau toki hiki ai ‘a Siona, ‘o tolo ki tahi; pea tuku ai ‘e he tahi ‘ene hou.

¹⁶Pea manavahē ‘a e kau siana kia Sihova — ko e manavahē ka ko ha manavahē — pea nau fai feilaulau kia Sihova, mo ha ngaahi tukumo‘ui.

¹⁷Ka kuo tokonaki ‘e Sihova ha fu‘u ika lahi ke folo ‘a Siona. Pea na‘e ‘i he kete ‘o e ika ‘a Siona, ‘o ‘aho tolu mo pō tolu.