Read KO E TOH TAPU KATOA TONGA KO SIONA 3 Bible Online

KO SIONA 3 - KO E TOH TAPU KATOA TONGA bible

KO SIONA 3

¹PEA hoko ‘a e folofola ‘a Sihova kia Siona ko hono tu‘o ua, ‘o pehē,

²Tu‘u, ‘o ‘alu ki Ninive, ‘a e fu‘u kolo ko ē, ‘o fanongonongo ai ‘a e fanongonongo te u tala kiate koe.

³Pea tu‘u ai ‘a Siona, ‘o ne ‘alu ki Ninive, ‘o hangē ko e folofola ‘a Sihova. Ka ko Ninive ko e kolo lahi ki langi, ko e ‘alu ai ko e vā‘ihala ‘o e ‘aho ‘e tolu.

⁴Pea kamata ‘e Siona ‘ene hū ki he kolo ko e vā‘ihala ‘o e ‘aho ‘e taha, mo ‘ene kalanga ‘o pehē, Toe fāngofulu‘i ‘aho, pea kuo fulihi ‘a Ninive!

⁵Pea tui ‘a e kakai Ninive ki he ‘Otua, ‘o nau fanongonongo ha ‘aukai, mo nau ‘ai tauanga‘a, mei he lahi ki he si‘i.

⁶Pea na‘e pā ‘a e me‘a ki he Tu‘i Ninive, pea ne tu‘u mei hono taloni, ‘o ne hu‘ihu‘i hono kofu lahi, ‘o ne ‘ai tauanga‘a, ‘o ne nofo ‘i he efuefu.

⁷Pea na‘e fanongonongo mo tala ‘i Ninive ‘i he fekau ‘a e tu‘i mo hono hou‘eiki, ‘o pehē, ‘A e kakai mo e manu — manu lalahi mo e manu iiki — ‘oua ‘e mama ha momo‘i me‘a —

⁸‘Oua te nau kaikai — pea ‘oua te nau inu ha vai — pea ke ‘ai tauanga‘a ‘a e kakai mo e manu — pea ke nau tangi ki he ‘Otua, ‘o fai mālohi — pea tafoki takitaha mei hono hala kovi — pea mei he fakamālohi ‘oku ‘i hono nima —

⁹hei‘ilo ‘e liliu ‘a ‘Elohimi, ‘o lolou — mo foki mei hono houhau kakaha — ‘o ‘oua na‘a tau ‘auha.

¹⁰Pea ‘afio‘i ‘e ‘Elohimi ‘a ‘enau tō‘onga, kuo nau tafoki mei honau ngaahi ‘alunga kovi, pea na‘e louaki ‘e ‘Elohimi mei he kovi na‘a ne pehē te ne fai kiate kinautolu; pea na‘e ‘ikai te ne fai.