Read KO E TOH TAPU KATOA TONGA KO SIONA 4 Bible Online

KO SIONA 4 - KO E TOH TAPU KATOA TONGA bible

KO SIONA 4

¹KA na‘e kovi‘ia lahi ai ‘a Siona, pea ne ‘ita.

²Pea ne lotu kia Sihova, ‘o pehē, Fakamolemole, ‘Eiki, ‘ikai ko ‘eku lea ia ‘i he‘eku kei ‘i hoku fonua? Ko hono ‘uhinga ia na‘a ku sinaki hola ai ki Tāsisi; he na‘a ku ‘ilo ko e ‘Otua ‘ofa ‘a e ‘Afiona, mo fa‘a fakamolemole, ko e fakatotoka ki he houhau, pea mohu angalelei, pea ko ho anga ke lolou ‘i ha fai tautea.

³Pea ko eni, ‘Eiki, ke ke to‘o atu mu‘a ‘eku mo‘ui; he ‘oku lelei kiate au ke mate ‘i ha‘aku mo‘ui atu.

⁴Pea folofola ‘a Sihova, ‘Oku tonuhia ‘a ho‘o ‘ita na?

⁵Pea hū ki tu‘a ‘a Siona mei he kolo, ‘o ne nofo mei he potu hahake ‘o e kolo, ‘o ne ngaohi ai mo‘ona ha me‘i fale lou‘akau, ‘o ne nofo ‘i hono malumalu kae‘oua ke ne vakai pe ko e hā ‘e hoko ki he kolo.

⁶Pea tokonaki ‘e Sihova ‘Elohimi ha fu‘u lepo, ‘o ne fakakaka hake mei ‘olunga kia Siona, ke fakamalumalu ki hono ‘ulu, ke fakalelulelu ki he‘ene mamahi.

⁷Pea fiefia lahi ‘a Siona ‘i he lepo, Ka ka tokonaki ‘e he ‘Otua ha ‘unufe ‘i he ma‘a ‘a e ‘aho ‘apongipongi, pea ne keina ‘a e lepo, pea mae.

⁸Pea ‘i he faifai, pea ‘alu hake ‘a e la‘ā, pea kuo tokonaki ‘e he ‘Otua ha matangi ‘a‘afu fakahahake; pea taa‘i ‘e he la‘ā ‘a e ‘ulu ‘o Siona, pea ne vaivaia, pea ne kole ke mole ‘ene mo‘ui,[5] he‘ene pehē, ‘E lelei ‘eku mate ‘i he‘eku mo‘ui.

⁹Pea folofola ‘a e ‘Otua kia Siona, ‘Oku tonuhia ho‘o ‘ita ‘i he lepo? Pea pehē ‘e ia, ‘Oku tonuhia ‘eku ‘ita, ‘o a‘u ki he mate.

¹⁰Pea folofola ‘a Sihova, Na‘a ke mamae koe ki he lepo, ‘a ia na‘e ‘ikai te ke ongosia ai, pea na‘e ‘ikai te ke fakafu‘ulahi, ‘a ia na‘e tupu ia ‘i ha fo‘i pō, pea mole ‘i ha fo‘i pō.

¹¹Pea ‘ikai ā te u mamae koā ‘e au ki Ninive, ‘a e fu‘u kolo ni; ‘a ia ‘oku ‘i ai ha kakai ‘e taha kilu mā ua mano tupu, ‘a e fa‘ahinga ‘oku ‘ikai te nau ‘ilo honau nima to‘omata‘u mo e to‘ohema, mo e fu‘u fanga manu foki?