Read KO E TOH TAPU KATOA TONGA NŌMIPA 12 Bible Online

NŌMIPA 12 - KO E TOH TAPU KATOA TONGA bible

NŌMIPA 12

¹PEA na‘e lau‘i ‘a Mōsese ‘e Meliame mo ‘Ēlone koe‘uhi ko e fefine Kusa[5] kuo ne mali: he kuo ne mali mo ha fefine Kusa.

²Pea na pehē, He ko Mōsese pē kuo folofola ki ai[6] ‘a Sihova? ‘Ikai kuo ne folofola foki ‘iate[7] kitaua? Pea na‘e ongo‘i ‘e Sihova.

³(Pea ko e tangata ko Mōsese na‘e anga kātaki ‘aupito, ‘o hulu atu ‘i he tangata kotoa na‘e ‘i he funga kelekele.)

⁴Pea folofola ‘a e ‘Eiki fakafokifā kia Mōsese mo ‘Ēlone mo Meliame, Hū kitu‘a kimoutolu toko tolu, ‘o omi ki he Tēniti Fe‘iloaki‘anga. Pea nau hū kitu‘a ‘a e toko tolu.

⁵Pea hā‘ele hifo ‘a Sihova ‘i he Pou-‘ao, ‘o ne tu‘u ‘i he mata Tēniti, ‘o ne ui ‘a ‘Ēlone mo Meliame: pea na tutu‘u mai kinaua.

⁶Pea ne folofola ange, Tokanga mai ki he‘eku lea: ka ai ha palōfita ‘iate kimoutolu,[8] ko au Sihova te u faka‘ilo au kiate ia ‘i ha vīsone, te u lea kiate ia ‘i ha misi.

⁷Taha kehe ‘eku sevāniti ko Mōsese: ko e falala‘anga ia ‘i hoku fale kotoa.[9]

⁸Ko ‘ema alea mo ia ‘e fai ko e ngutu ki he ngutu, pea ‘i he lea tonu, ‘o ‘ikai ‘i he fakatātā; pea ko e anga totonu ‘o Sihova te ne māta‘i: pea lau ‘e au te mou manavahē ke lau‘i ‘eku sevāniti ko Mōsese.

⁹Pea kakaha ‘a e tuputāmaki ‘o e ‘Eiki kiate kinaua, ‘o ne hā‘ele atu, pea hiki ‘a e ‘Ao mei he Tēniti, pea tā kuo kilia ‘a Meliame ‘o hangē ko e sinou.

¹⁰Pea hanga ‘e ‘Ēlone kia Meliame, pea tā kuo kilia.

¹¹Pea lea ‘a ‘Ēlone kia Mōsese, ‘Oiauē, Tangata‘eiki, ‘oua ā te ke hili ‘a e hia ni kiate kimaua; hono kuo mau fai vale, pea kuo mau hia.

¹²‘Oua ā te ne hangē ha taha mate, ‘a ia kuo ‘osi hono vaeua ‘o hono kakano ‘i he‘ene hū mai mei he manava ‘o ‘ene fa‘ē.

¹³Pea tangi ‘a Mōsese kia Sihova, ‘o pehē, ‘Otua ē, faito‘o mu‘a kiate ia.

¹⁴Pea folofola ‘a Sihova kia Mōsese, Pea ka ne ki‘i ‘anuhi hono mata ‘e he‘ene tamai, ‘ikai kuo ne mā ai ‘o ‘aho fitu? ke tāpuni mu‘a ‘a e fefine ‘i he tu‘a ‘apitanga ‘o ‘aho fitu, pea hili ia pea toe ‘omi.

¹⁵Pea na‘e tāpuni ‘a Meliame ‘i he tu‘a ‘apitanga ‘o ‘aho fitu: pea na‘e ‘ikai ke toe fononga ‘a e kakai kae‘oua ke fakahū mai ‘a Meliame.

¹⁶Pea hili ia na‘e hiki ‘a e kakai mei Heseloti, ‘o nau fokotu‘u tēniti ‘i he Toafa ‘o Pēlana.