Read KO E TOH TAPU KATOA TONGA NŌMIPA 17 Bible Online

NŌMIPA 17 - KO E TOH TAPU KATOA TONGA bible

NŌMIPA 17

¹PEA folofola ‘a Sihova kia Mōsese, ‘o pehē,

²Lea ki ha‘a ‘Isileli, ‘o to‘o tokotoko meiate kinautolu, ko ha tokotoko ki ha ‘ulumotu‘a mei he hou‘eiki ‘o e ngaahi ‘ulumotu‘a, ha tokotoko ‘e hongofulu mā ua: pea ke tohi ‘e koe ‘a e hingoa ‘o e tangata takitaha ‘i hono tokotoko.

³Pea te ke tohi ‘a e hingoa ‘o ‘Ēlone ki he tokotoko ‘o Līvai: he ‘e taha pē ‘a e tokotoko ki he ‘eiki ‘o e ‘ulumotu‘a.

⁴Pea te ke fakatoka kinautolu ki he Tēniti Fe‘iloaki‘anga ‘i he ‘ao ‘o e Fakamo‘oni‘anga, ‘a e potu ‘oku ou fakafe‘iloaki ai kiate kimoutolu.

⁵Pea ko eni ‘a e me‘a ‘e hoko, ko e tangata ‘oku ou fili ki ai ‘e muka hono tokotoko: ka u fakangata meiate au ‘a e lāunga ‘a ha‘a ‘Isileli, ‘enau lāunga kiate kimoua.

⁶Pea lea ‘a Mōsese ki ha‘a ‘Isileli, pea na‘e ‘omi tokotoko kiate ia ‘e honau hou‘eiki, ‘o takitaha ‘a e ‘eiki hono tokotoko, ‘o fakatatau ki he lau ‘o e ngaahi ‘ulumotu‘a, ko e tokotoko ‘e hongofulu mā ua: pea ko e tokotoko ‘o ‘Ēlone na‘e fakataha mo e ngaahi tokotoko ko ē.

⁷Pea fakatoka ‘e Mōsese ‘a e ngaahi tokotoko ‘i he ‘ao ‘o Sihova ‘i he Tēniti Fakamo‘oni‘anga.

⁸Pea ‘i he pongipongi hake na‘e hū ‘a Mōsese ki he Tēniti Fakamo‘oni‘anga; pea tā kuo muka ‘a e tokotoko ‘o ‘Ēlone, ‘a ia na‘e tu‘u ma‘a e fale ‘o Līvai, pea kuo talamuka, pea kuo moto ‘o fisi, pea fuhi ai ‘a e ngaahi ‘ai kuo motu‘u.

⁹Pea ‘omi ki tu‘a ‘e Mōsese ‘a e ngaahi tokotoko mei he ‘ao ‘o e ‘Eiki ki ha‘a ‘Isileli kātoa: pea nau vakai, ‘o to‘o takitaha hono tokotoko.

¹⁰Pea folofola ‘a Sihova kia Mōsese, Fakafoki ‘a e tototoko ‘o ‘Ēlone ki he ‘ao ‘o e Fakamo‘oni‘anga ke tauhi ai, ko e faka‘ilonga ki he kau angatu‘u: ka ke faka‘osi he kau angatu‘u: ka ke faka‘osi meiate au ‘enau lāunga, ‘o ‘oua te nau mate.

¹¹Pea fai pehē ‘e Mōsese: ‘o hangē ko e tu‘utu‘uni ‘a e ‘Eiki kiate ia, na‘e pehē ‘ene fai.

¹²Pea lea ‘e ha‘a ‘Isileli kia Mōsese, ‘o pehē,

¹³Ko ‘eni kuo tau mate; kuo tau ‘auha, kuo tau ‘auha kotoa. Ko ia ‘oku ne ki‘i ofiofi ki he Tāpanekale ‘o Sihova te ne pekia: te tau ‘au kotoa koā?