Read KO E TOH TAPU KATOA TONGA NŌMIPA 19 Bible Online

NŌMIPA 19 - KO E TOH TAPU KATOA TONGA bible

NŌMIPA 19

¹PEA folofola ‘a Sihova kia Mōsese pea kia ‘Ēlone, ‘o pehē,

²Ko eni ‘a e tu‘utu‘uni fakalao ‘a ia kuo fokotu‘u ‘e Sihova, ‘o pehē, Tala ki ha‘a ‘Isileli ke nau ‘omi kiate koe ha pulu fefine kulokula, pea haohaoa ‘o ‘ikai hano ‘ila, ha taha kuo te‘eki ke ‘ai ‘ioke ki ai.

³Pea te mou tuku ia kia ‘Eliesa ko e taula‘eiki, pea ‘e ‘ave ia ki he tu‘a ‘apitanga, pea ‘e tāmate‘i ia[13]

⁴Pea ‘e to‘o ‘e ‘Eliesa taula‘eiki ha me‘i toto ‘aki hono tuhu, ‘o ne taufu‘i ‘aki ‘a e toto ki he mata Tēniti Fe‘iloaki‘anga ‘o tu‘o fitu:

⁵pea ‘e tutu ‘a e pulu fefine ka ne sio ki ai, ‘io, ‘e tutu hono kili, mo hono kakano, mo hono toto, fakataha mo hono kinoha‘a:

⁶pea ‘e to‘o ‘e he taula‘eiki ha va‘a sita, mo ha ‘īsope, mo e kula-‘aho‘aho, pea te ne lī ia ki he afi ‘oku tutu ai ‘a e pulu.

⁷Pea ‘e toki fō ‘e he taula‘eiki hono kofu, mo kaukau hono sino; pea hili ia te ne hū mai ki he ‘apitanga, ka te ne ta‘ema‘a ‘o a‘u ki he efiafi.

⁸Pea ko ia na‘a ne tutu ia te ne fō hono kofu, mo kaukau hono sino, pea te ne ta‘ema‘a ‘o a‘u ki he efiafi.

⁹Pea ‘e hiko ‘a e efuefu ‘o e pulu ‘e ha tangata ‘oku ma‘a, pea te ne fokotu‘u ‘i he tu‘a ‘apitanga, ‘i ha potu ‘oku ma‘a, pea ‘e tauhi ia ma‘a e fakataha ‘o ha‘a ‘Isileli mo‘o vai fakalanu: ko e feilaulau-angahala ia.

¹⁰Pea ko ia ‘oku ne hiko ‘a e efuefu ‘o e pulu fefine te ne fō hono kofu, pea te ne ta‘ema‘a ‘o a‘u ki he efiafi: pea ‘e tu‘u ia ko e tu‘utu‘uni ta‘engata ki ha‘a ‘Isileli mo e muli ‘oku ‘āunofo kiate kinautolu.

¹¹Ko ia ‘oku ne lave ki ha ‘anga‘anga ‘o e tangata kuo pekia te ne ta‘ema‘a ‘o ‘aho fitu:

¹²te ne fakalanu ia ‘aki ‘a e me‘a ko ē ‘i hono ‘aho tolu, pea ‘i hono ‘aho fitu te ne ma‘a: ka ‘o kapau ‘e ‘ikai te ne fakalanu ‘i hono ‘aho tolu, pea ‘e ‘ikai te ne ma‘a ‘i hono ‘aho fitu.

¹³Ko ia ‘oku ne lave ki he ‘anga‘anga ‘o ha tangata kuo pekia, ‘o ‘ikai te ne fakalanu, ‘oku ne ‘uli‘i ‘a e Tāpanekale ‘o Sihova; pea ‘e tu‘usi ‘a e toko taha ko ia mei ‘Isileli: he na‘e ‘ikai taufu‘i ‘aki ia ‘a e vai fakalanu, ko ia ‘oku ne ta‘ema‘a; ‘oku kei ‘iate ia hono ta‘ema‘a.

¹⁴Ko e lao eni ‘o e tangata kuo pekia ‘i he tēniti: ko ia kotoa pē ‘e hū ki he tēniti, mo ia kotoa pē ‘oku ‘i he tēniti, ‘e ta‘ema‘a ‘o ‘aho fitu.

¹⁵Pea ‘ilonga ha nāunau ‘oku ava, ‘o ‘ikai tāpuni ma‘u,[14] kuo ta‘ema‘a ia.

¹⁶Pea ‘ilonga ‘a ia ‘oku ‘i tu‘a, pea ne lave ki ha me‘a kuo tāmate‘i ‘aki ha heletā, pe ki ha ‘anga‘anga, pe ki he hui ‘o ha tangata, pe ki ha fa‘itoka, te ne ta‘ema‘a ‘o ‘aho fitu.

¹⁷Pea te nau to‘o ma‘a e ta‘ema‘a ha me‘i efuefu mei he tutu ‘o e feilaulau-angahala ko ē, pea te nau ‘ai ki ai ‘i ha ipu ha vai ‘oku tafe;

¹⁸pea ‘e to‘o ‘e ha taha ‘oku ma‘a ha ‘īsope, pea te ne unu ki he vai, pea te ne afuhi ‘aki ‘a e tēniti mo hono nāunau kotoa, mo e kakai na‘e ‘i ai, pea kiate ia kuo ne lave ki ha hui, pe ki ha ‘anga‘anga, pe ki ha me‘a faka‘eiki, pe ki ha fa‘itoka;

¹⁹pea ‘e afuhi ‘e he tangata ‘oku ma‘a ‘a ia ‘oku ta‘ema‘a ‘i hono ‘aho tolu, mo hono ‘aho fitu: pea ‘i hono ‘aho fitu te ne fakalanu ia, pea te ne fō hono kofu mo kaukau ‘i ha vai, pea ka efiafi leva pea te ne ma‘a.

²⁰Pea ko e tangata ‘oku ta‘ema‘a, pea ‘oku ‘ikai te ne fakalanu, ‘e tu‘usi ‘a e laumālie ko ia mei he lotolotonga ‘o e fakataha, he kuo ne ‘uli‘i ‘a e Fale Tapu ‘o Sihova: kuo ‘ikai afuhi ‘aki ia ‘a e vai fakalanu: ‘oku ne ta‘ema‘a.

²¹Pea ‘e tu‘u ia ko e tu‘utu‘uni ta‘engata kiate kinautolu: pea ko ia ‘oku ne fai ‘a e fakalanu te ne fō hono kofu, pea ko ia ‘oku ne lave ki he vai fakalanu te ne ta‘ema‘a ‘o a‘u ki he efiafi.

²²Pea ‘ilonga ha me‘a ‘e lave ki ai ‘a e ta‘ema‘a ‘e ta‘ema‘a mo ia; pea ko ia te ne lave ki ai te ne ta‘ema‘a ‘o a‘u ki he efiafi.