Read KO E TOH TAPU KATOA TONGA NŌMIPA 2 Bible Online

NŌMIPA 2 - KO E TOH TAPU KATOA TONGA bible

NŌMIPA 2

¹PEA folofola ‘a Sihova kia Mōsese mo ‘Ēlone, ‘o pehē,

²Ko e fokotu‘u tēniti ‘a ha‘a ‘Isileli takitaha ‘e fai ki he fuka ‘o hono matakali, pea mo e fuka ‘o hono ‘ulumotu‘a: ko ‘enau fokotu‘u tēniti ‘e tumu‘aki ki he Tēniti Fe‘iloaki‘anga, ‘o takatakai ki ai.

³Pea ko ‘eni ia te tau fokotu‘u tēniti ki hahake ki he hopo‘anga la‘ā, ‘a kinautolu ‘oku kau ki he fuka ‘o e ‘apitanga ‘o Siuta; te nau nofo fakakongakau: pea ko e ‘eiki ‘o ha‘a Siuta ko Na‘asoni ko e foha ‘o ‘Aminatape.

⁴Pea ko ‘ene tau, ‘io, ko honau tokolahi na‘e lau, ko e toko fitu mano mā toko fā afe mā toko onongeau.

⁵Pea ko eni ia ‘e fokotu‘u tēniti ofi ki ai, ko e matakali ‘o ‘Īsaka: pea ko e ‘eiki ‘o ha‘a ‘Īsaka ko Nātaniela ko e foha ‘o Sua;

⁶pea ko ‘ene tau, ‘io, ko hono kakai na‘e lau, ko e toko nima mano mā toko fā afe mā toko fāngeau.

⁷‘I ai ‘a e matakali ‘o Sepulone; pea ko e ‘eiki ‘o ha‘a Sepulone ko ‘Eliapi ko e foha ‘o Hēloni.

⁸Pea ko ‘ene tau, ‘io, ‘a kinautolu na‘e lau, ko e toko nima mano mā toko fitu afe mā toko fāngeau.

⁹Ko hono kotoa ‘o e kakai na‘e lau na‘e kau ki he ‘apitanga ‘o Siuta ko e toko taha kilu mā toko valu mano mā toko ono afe mā toko fāngeau: ko ‘enau fakakongakau ia. Ko kinautolu ‘e taki ‘i he fononga.

¹⁰Ko e feitu‘u tonga ‘e tu‘u ai ‘a e fuka ‘o e ‘apitanga ‘o Lūpeni: te nau fakakongakau, pea ko e ‘eiki ‘o ha‘a Lūpeni ko ‘Elisiuli ko e foha ‘o Seteulo.

¹¹Pea ko ‘ene tau, ‘io, ko hono kakai na‘e lau, ko e toko fā mano mā toko ono afe mā toko nimangeau.

¹²Pea ko eni ia ‘e fokotu‘u tēniti ofi ai, ko e matakali ‘o Simione, pea ko e ‘eiki ‘o ha‘a Simione ko Selumiela ko e foha ‘o Siulisatai.

¹³Pea ko ‘ene tau, ‘io, ko honau tokolahi na‘e lau, ko e toko nima mano mā toko hiva afe mā toko tolungeau.

¹⁴‘I ai foki ‘a e matakali ‘o Kata, pea ko e ‘eiki ‘o ha‘a Kata ko ‘Eliesafe ko e foha ‘o Teuela.

¹⁵Pea ko ‘ene tau, ‘io, ko kinautolu na‘e lau, ko e toko fā mano mā toko nima afe mā toko onongeau mā toko nimangofulu.

¹⁶Ko hono kotoa ‘o e kakai na‘e lau na‘e kau ki he ‘apitanga ‘o Lūpeni ko e toko taha kilu mā toko nima mano mā toko taha afe mā toko fāngeau mā toko nimangofulu: ko ‘enau fakakongakau ia. Pea ko hono ua ‘a kinautolu ‘i he fononga.

¹⁷Pea ‘e toki hiki atu ‘a e Tēniti Fe‘iloaki‘anga, ‘o lotolotoi ‘a e ‘apitanga ‘o e kau Līvai ‘i he ngaahi ‘apitanga ko ē: ‘o hangē ko ‘enau fokotu‘u tēniti ‘e pehē ‘enau hiki atu, ‘o takitaha hono feitu‘u mo hono fuka.

¹⁸Ko e feitu‘u lulunga ‘e tu‘u ai ‘a e fuka ‘o e ‘apitanga ‘o ‘Ifalemi; te nau fakakongakau, pea ko e ‘eiki ‘o ha‘a ‘Ifalemi ko ‘Elisama ko e foha ‘o ‘Amihuti.

¹⁹Pea ko ‘ene tau, ‘io, ko kinautolu na‘e lau, ko e toko fā mano mā toko nimangeau.

²⁰Pea ‘e ofi ai ‘a e matakali ‘o Manase; pea ko e ‘eiki ‘o ha‘a Manase ko Kāmelieli ko e foha ‘o Petasiuli.

²¹Pea ko ‘ene tau, ‘io, ko kinautolu na‘e lau, ko e toko tolu mano mā toko ua afe mā toko uangeau.

²²‘I ai foki ‘a e matakali Penisimani; pea ko e ‘eiki ‘o ha‘a Penisimani ko ‘Apitani ko e foha ‘o Kiteoni.

²³Pea ko ‘ene tau, ‘io, ko kinautolu na‘e lau, ko e toko tolu mano mā toko nima afe mā toko fāngeau.

²⁴Ko hono kotoa ‘o e kakai na‘e lau na‘e kau ki he ‘apitanga ‘o ‘Ifalemi ko e toko taha kilu mā toko valu afe mā toko teau: ko ‘enau fakakongakau ia. Pea ko hono tolu ‘a kinautolu ‘i he fononga.

²⁵Ko e feitu‘u tokelau ‘e tu‘u ai ‘a e fuka ‘o e ‘apitanga ‘o Tani: te nau fakakongakau, pea ko e ‘eiki ‘o ha‘a Tani ko ‘Ahiesa ko e foha ‘o ‘Amisatai.

²⁶Pea ko ‘ene tau, ‘io, ko kinautolu na‘e lau, ko e toko ono mano mā toko ua afe mā toko fitungeau.

²⁷Pea ko eni ia ‘e fokotu‘u tēniti ofi ki ai, ko e matakali ‘o ‘Āseli, pea ko e ‘eiki ‘o ha‘a ‘Āseli ko Pakiela ko e foha ‘o ‘Okelani.

²⁸Pea ko ‘ene tau, ‘io, ko kinautolu na‘e lau, ko e toko fā mano mā toko taha afe mā toko nimangeau.

²⁹Pea ai mo e matakali ‘o Nafitalai, pea ko e ‘eiki ‘o ha‘a Nafitalai ko ‘Āhila ko e foha ‘o ‘Einani.

³⁰Pea ko ‘ene tau, ‘io, ko kinautolu na‘e lau ko e toko nima mano mā toko tolu afe mā toko fāngeau.

³¹Ko hono kotoa ‘o e kakai na‘e lau na‘e kau ki he ‘apitanga ‘o Tani ko e toko taha kilu mā toko nima mano mā toko fitu afe mā toko onongeau. ‘I he hokohoko ‘o e ngaahi fuka ko kinautolu ‘e fakamui ‘i he fononga.

³²Ko ena ia ‘a e ha‘a ‘Isileli na‘e lau, ‘o faka-e-honau-ngaahi-tupu‘anga; ko e lau kotoa ‘o e ngaahi ‘apitanga ‘i he‘enau fakakongakau ko e toko ono kilu mā toko tolu afe mā toko nimangeau mā toko nimangofulu.

³³Ka na‘e ‘ikai lau ‘a e kau Līvai fakataha mo ha‘a ‘Isileli, he na‘e pehē ‘a e tu‘utu‘uni ‘e Sihova kia Mōsese.

³⁴Pea fai ‘e ha‘a ‘Isileli: hangē ko ia kotoa na‘e tu‘utu‘uni ‘e Sihova kia Mōsese na‘e pehē ‘enau fokotu‘u tēniti, ‘o tefito ki honau ngaahi fuka; pea pehē mo ‘enau hiki fononga takitaha ‘i hono fa‘ahinga mo hono tupu‘anga.