Read KO E TOH TAPU KATOA TONGA NŌMIPA 20 Bible Online

NŌMIPA 20 - KO E TOH TAPU KATOA TONGA bible

NŌMIPA 20

¹PEA ha‘u ‘a ha‘a ‘Isileli, ‘a e fakataha kotoa, ki he Toafa ‘o Sini ‘i he ‘uluaki māhina: pea nofo ‘a e kakai ‘i Kētesi; pea na‘e pekia ai ‘a Meliame, pea na‘e tanu ia ‘i he potu ko ia.

²Pea na‘e ‘ikai ha vai ki he fakataha: pea na‘a nau fakakātoa mai ke fai mo Mōsese mo ‘Ēlone.

³Pea kē ‘a e kakai mo Mōsese, ‘o nau lea ‘o pehē, Taumaiā na‘a mau mate fakataha mo homau kāinga ‘i he ‘ao ‘o Sihova!

⁴Pea ko e hā kuo mo ‘omi ai ‘a e fakataha ‘a Sihova ki he toafa ni ke mau mate heni, ‘a kimautolu mo ‘emau fanga manu?

⁵Pea ko e hā kuo mo ‘omi ai kimautolu mei ‘Isipite, ke a‘utaki mai ki he potu kovi ni? tala‘ehai ko e potu eni ke ma‘u ai ha tenga pe ha fiki, pe ha vaine, pe ha pomikānite; pea ‘oku ‘ikai foki ha vai ke inu.

⁶Pea ō ‘a Mōsese mo ‘Ēlone mei he ‘ao ‘o e fakataha ki he mata Tēniti Fe‘iloaki‘anga, pea na tō fo‘ohifo; pea na‘e hā ‘a e kolōlia ‘o e ‘Eiki kiate kinaua.

⁷Pea folofola ‘a Sihova kia Mōsese, ‘o pehē,

⁸to‘o ‘a e tokotoko, pea fakakātoa mai ‘a e fakataha, ‘a koe mo ‘Ēlone ko ho tokoua, pea mo lea ki he makatu‘u ‘i honau ‘ao ke ne tuku mai hono vai; pea te ke fakahū kitu‘a ma‘anautolu ha vai mei he makatu‘u, ‘o fakainu ‘a e fakataha mo ‘enau monumanu.

⁹Pea to‘o ‘e Mōsese ‘a e tokotoko mei he‘ene ‘i he ‘ao ‘o Sihova, ‘o hangē ko hono fekau.

¹⁰Pea fakakātoa mai ‘e Mōsese mo ‘Ēlone ‘a e fakataha ki he ‘ao ‘o e makatu‘u, pea ne pehē kiate kinautolu, Fanongo mai ‘a e kau angatu‘u na; te ma fakapuna koā ha vai mei he maka ni ma‘amoutolu?

¹¹Pea hiki ‘e Mōsese hono nima, ‘o ne taa‘i ‘a e makatu‘u ‘aki hono tokotoko ‘o tu‘o ua, pea puna mai ‘a e vai ‘o lahi, pea inu ai kotoa ‘a e fakataha mo ‘enau monumanu.

¹²Pea folofola ‘a Sihova kia Mōsese pea kia ‘Ēlone, ‘o pehē, Ko e me‘a ‘i he ‘ikai te mo tui kiate au ke tāpuhaa‘i au ‘i he ‘ao ‘o ha‘a ‘Isileli, ko ia ‘e ‘ikai te mo a‘utaki mai ‘a e fakataha ni ki he fonua kuo u foaki kiate kinautolu.

¹³Ko e Vai ‘o Mēlipa ena (ko Kē),[15] koe‘uhi na‘e kē ‘a ha‘a ‘Isileli mo Sihova, pea na‘a ne hā mā‘oni‘oni ‘iate kinautolu.

¹⁴Pea tuku atu ‘e Mōsese mei Kētesi hani talafekau ki he Tu‘i ‘Ītomi, Ko e lea eni ‘a ho tokoua ko ‘Isileli, ‘Oku ke ‘ilo‘i ‘a e ngaahi faingata‘a kuo hoko kiate kimautolu;

¹⁵‘a e ‘alu hifo ‘emau ngaahi kui ki ‘Isipite, mo ‘emau nofo ‘Isipite fuoloa; pea na‘e ngaohikovi‘i kimautolu mo ‘emau ngaahi kui ‘e he kakai ‘Isipite:

¹⁶pea ‘i he‘emau tautapa kia Sihova na‘a ne ongo‘i homau le‘o, ‘o ne fekau mai ha ‘āngelo, ‘o fakahū mai mei ‘Isipite: pea ko eni ‘oku mau ‘i Kētesi, ko e kolo ‘i he ngata‘anga ‘o ho fonua.

¹⁷Tuku mu‘a ke mau laka atu ‘i ho fonua: ‘e ‘ikai te mau ‘alu atu ‘i he ngaahi ngoue‘anga, pe ‘i he ngaahi ngoue vaine, pea ‘e ‘ikai te mau inu ‘i ha vaikeli: te mau fou pē ‘i he hala pule‘anga,[16] ‘o ‘ikai te mau afe ki he to‘omata‘u, pe ki he to‘ohema; kae‘oua ke mau laka atu ‘i ho tafafonua.

¹⁸Ka ka tali ki ai ‘a ‘Ītomi, ‘E ‘ikai te ke laka mai ‘iate au, na‘a ku ‘alu atu mo e heletā ke ta‘ofi.

¹⁹Pea lea ki ai ‘a ha‘a ‘Isileli, Te mau ‘alu hake ‘i he hala tanu, pea kapau te mau inu hao vai, ‘e au pe ko ‘eku fanga manu, pea te u totongi ki ai; ‘oku ‘ikai te u fie ma‘u ha me‘a, ‘a eni pē, ke laka atu hoku va‘e.

²⁰Ka ka pehē ‘e ia, ‘E ‘ikai te ke laka mai. Pea hū ki tu‘a ‘a ‘Ītomi mo e kakai lahi mo e nima mālohi ke ta‘ofi ia.

²¹Ko ia na‘e fakafisi ‘e ‘Ītomi ‘a e tuku ‘a ‘Isileli ke laka mai ‘i hono tafafonua: pea na‘e afe ‘a ‘Isileli meiate ia.

²²Pea nau tuku fononga atu mei Kētesi: pea na‘e ha‘u ‘a ha‘a ‘Isileli, ‘a e fakataha kotoa, ki he mo‘unga ko Hoa.

²³Pea folofola ‘a Sihova kia Mōsese mo ‘Ēlone ‘i he mo‘unga ko Hoa ‘i he tafafonua ‘o ‘Ītomi, ‘o pehē,

²⁴‘E ului ‘a ‘Ēlone ki hono kakai: he ‘e ‘ikai te ne hū ki he fonua kuo u foaki ki ha‘a ‘Isileli, koe‘uhi ko ho‘omo paetaku ki he‘eku lea ‘i he vai ‘i Mēlipa.

²⁵‘Ave ‘a ‘Ēlone mo hono foha ko ‘Eliesa, pea ‘ohake kinaua ki he mo‘unga ko Hoa:

²⁶pea hu‘ihu‘i ‘a e kofu ‘o ‘Ēlone, ‘o ‘ai ki hono foha ko ‘Eliesa: pea ‘e ului ‘a ‘Ēlone ki hono kakai ‘o pekia ai ‘i he potu ko ia.

²⁷Pea fai ‘e Mōsese, ‘o hangē ko hono tu‘utu‘uni ‘e Sihova: pea nau ‘alu hake ki he mo‘unga ko Hoa koe sio ‘a e fakataha kotoa.

²⁸Pea hu‘ihu‘i ‘e Mōsese ‘a e kofu ‘o ‘Ēlone, ‘o ne ‘ai ki hono foha ko ‘Eliesa; pea na‘e pekia ai ‘a ‘Ēlone ‘i he tumutumu ‘o e mo‘unga; ka ka ‘alu hifo ‘a Mōsese mo ‘Eliesa mei he mo‘unga.

²⁹Pea ‘i he vakai ‘e he fakataha kotoa kuo pekia ‘a ‘Ēlone, na‘a nau tēngihia ia ‘o ‘aho tolungofulu, ‘a e fale kotoa ‘o ha‘a ‘Isileli.