Read KO E TOH TAPU KATOA TONGA NŌMIPA 21 Bible Online

NŌMIPA 21 - KO E TOH TAPU KATOA TONGA bible

NŌMIPA 21

¹PEA ko Kingi ‘Ālati, ko e ‘eiki Kēnani na‘e nofo ‘i he feitu‘u ko Tonga, na‘a ne fanongo ‘oku ha‘u ‘a ‘Isileli ‘i he hala ‘o e kau asiasi; pea ne tau‘i ‘a ‘Isileli, ‘o ne taki pōpula honau ni‘ihi.

²Pea fai ‘e ‘Isileli kia Sihova ‘enau tukumo‘ui, ‘o pehē, Kapau te ke mātu‘aki tuku mai ‘a e kakai ni ki hoku nima, pea te u faka‘auha ‘enau ngaahi kolo.

³Pea ongo‘i ‘e he ‘Eiki ‘a e lea ‘a ‘Isileli, ‘o ne tuku atu ‘a ha‘a Kēnani; pea nau faka‘auha kinautolu, mo ‘enau ngaahi kolo: pea na‘e ui ‘a e potu ko Hoama (ko Faka‘auha).

⁴Pea nau tuku fononga atu mei he mo‘unga ko Hoa ‘i he hala ki he Tahi Kulokula, ko ‘enau ‘alu takai ki he fonua ‘o ‘Ītomi: pea na‘e hoha‘a ‘a e laumālie ‘o e kakai koe‘uhi ko e hala.

⁵Pea lea ‘a e kakai ki he ‘Otua mo Mōsese, Ko ena kuo mo ‘omi ai kimautolu mei ‘Isipite ke mate ‘i he toafa? he ‘oku ‘ikai ha me‘akai, pea ‘oku ‘ikai ha vai; pea ‘oku fakalili‘a ‘emau mo‘ui ki he nge‘esi me‘akai ni.

⁶Pea fekau atu ‘e Sihova ki he kakai ha fanga ngata vela, pea nau ‘uusi ‘a e kakai, pea na‘e mate ha fu‘u tokolahi.

⁷Pea ha‘u ‘a e kakai kia Mōsese, ‘o nau pehē, Kuo mau hia, he kuo mau talakaa‘i ‘a Sihova mo koe; ke ke hū kia Sihova ke ne ‘ave ‘a e fanga ngata meiate kimautolu. Pea hufekina ‘e Mōsese ‘a e kakai.

⁸Pea folofola ‘a Sihova kia Mōsese, Ngaohi ha‘o ngata vela, ‘o ‘ai ki ha fuka; pea ka pehē, pea ‘ilonga ha taha kuo ‘ūsia te ne sio ki ai, te ne mo‘ui.

⁹Pea ngaohi ‘e Mōsese ha ngata palasa, ‘o ne ‘ai ki he fuka: pea hili ia, pea ka kuo u‘u ha taha ‘e ha ngata, pea ne fakasio ki he ngata palasa, na‘a ne mo‘ui ai.

¹⁰Pea tuku fononga atu ‘e ha‘a ‘Isileli, ‘o nau fokotu‘u tēniti ‘i ‘Ōpote.

¹¹Pea nau tuku fononga atu mei ‘Ōpote ‘o nau fokotu‘u tēniti ‘i I‘i-‘apalemi, ‘i he toafa ‘oku ‘i he tafa‘aki ‘o Moape, ‘o tu‘u mei hahake.

¹²Pea nau fononga mei ai, ‘o fokotu‘u tēniti ‘i he tele‘a ‘o Sēleti.

¹³Na‘a nau tuku fononga mei ai, ‘o fokotu‘u tēniti ‘i he potu ki kō ‘o ‘Alanoni, ‘a ia ‘oku ‘i he toafa, ‘o ha‘u mei he tafafonua ‘o ha‘a ‘Āmoli, he ko ‘Alanoni ko e kau‘āfonua ‘o Moape ‘i he vaha‘a ‘o Moape mo ha‘a ‘Āmoli.

¹⁴‘A ē ā ‘oku lau ai ‘i he Tohi ‘o e ngaahi Tau ‘a Sihova: ‘A Vāhepi ‘i Sufa, Mo ‘Alanoni, hono ngaahi tele‘a.

¹⁵‘Io, ko e lauua ‘o e ngaahi tele‘a ‘Oku hifo ki he nofo‘anga ‘o ‘Ala, ‘O faaki ki Moape, ki hono tafafonua.

¹⁶Pea hili ia na‘a nau a‘u ki Pea (ko Vaikeli): ko e vaikeli ia ‘a ia na‘e folofola ai ‘a Sihova kia Mōsese, Fakakātoa mai ‘a e fakataha, pea te u ‘atu ha‘anau vai.

¹⁷Toki fai ‘e ‘Isileli ‘a e tau‘a‘alo ni, Vaikeli ē, puna hake mai! ‘Ē, mou tali ‘o hiva ki ai:

¹⁸Vai ne keli ‘e hou‘eiki, Ne vili ‘e he ngaahi ‘ulu ‘o e kakai ‘Aki ‘a e sēpita, ‘a e me‘a na‘a nau faaki ki ai.

¹⁹Pea nau hiki mei he toafa ki Mātani: pea mei Mātani ki Nahalieli, pea mei Nahalieli ki Pāmoti:

²⁰pea mei Pāmoti ki he tele‘a ‘oku ‘i he tuku‘uta ‘o Moape, ko e ‘ulu ‘o Pīsika, ‘a ia ‘oku hanga ki he lala.

²¹Pea tuku atu ‘e ‘Isileli ha kau talafekau kia Sīhoni ko e Tu‘i ‘Āmoli, ke fakahā,

²²Ka u laka atu mu‘a ‘i ho fonua: ‘e ‘ikai te mau afe ki ha ngoue‘anga, pe ki ha ngoue vaine; ‘e ‘ikai te mau inu hao vaikeli: ko e hala pule‘anga pē[17] te mau fou ai, kae‘oua kuo mau laka atu ‘i ho kau‘ā.

²³Ka ka ‘ikai tuku ‘e Sīhoni ke laka atu ‘a ‘Isileli ‘i hono kau‘ā; ka ka tānaki ‘e ia hono kakai kotoa, ‘o ne ‘alu atu ki he toafa ke fakafetaulaki kia ‘Isileli, ‘o ne a‘u ki Siahasa: ‘o ne fai tau ai kia ‘Isileli,

²⁴pea taa‘i ia ‘e ‘Isileli ‘aki ‘a e mata ‘o e heletā, ‘o ne puke hono fonua mei ‘Alanoni ‘o a‘u ki Siapoki mo e kau ‘Āmoni: he na‘e kaukaua fau ‘a e kau‘āfonua ‘o ha‘a ‘Āmoni.[18]

²⁵Pea hamu ‘e ‘Isileli ‘a e ngaahi kolo kotoa ko ia: pea nofo ‘a ‘Isileli ‘i he ngaahi kolo ‘o e kau ‘Āmoli, ‘i Hesiponi mo hono ngaahi kolo fakaongo.

²⁶He ko Hesiponi ko e kolo ‘o Sīponi ko e Tu‘i ‘Āmoli, ‘a ia kuo ne tau mo e tu‘i mu‘a ‘o Moape, pea kuo ne to‘o meiate ia hono fonua kotoa, ‘o a‘u ki ‘Alanoni.

²⁷‘A ē ā ‘oku lau ai ‘e he kau maau: Mou omi ki Hesiponi; Ke langa mo fokotu‘u ‘a e kolo ‘o Sīhoni:

²⁸He kuo ‘alu atu ha afi mei Hesiponi, Ha maama mei he kolo ‘o Sīhoni: Ko ‘Ala-Moape kuo ne keina[19] ‘o ‘osi, ‘A e hou‘eiki ‘o Pāmoti-‘Alanoni.

²⁹‘Oiauē koe, Moape! Kainanga ‘o Kīmosi, kuo ke ‘auha ē! Kuo ne tuku ngaahi foha ke feholataki, Mo hono ngaahi ‘ōfefine ke fakapōpula‘i Ki he Tu‘i ‘Āmoli ko Sīhoni.

³⁰Ka kuo tau fai honau fakamomofi, Ko Hesiponi kuo ‘auha ki Tīponi, Kuo tau laiki ‘o a‘u ki Nofa, Ko e afi kuo a‘u ki Mētepa.[20]

³¹Ko ia, na‘e nofo ‘a ‘Isileli ‘i he fonua ‘o e kau ‘Āmoli.

³²Pea fekau atu ‘e Mōsese ke asiasi ‘a Siasea, pea na‘a nau hamu honau ngaahi kolo fakaongo, ‘o kapusi ‘a e kau ‘Āmoli na‘e ‘i ai.

³³Pea nau foki ‘o ‘alu hake ‘i he hala ki Pēsani: pea hū ki tu‘a ‘a ‘Oki ko e Tu‘i Pēsani ke ta‘ofi kinautolu, ‘a ia mo hono kakai kotoa, ke fakahoko tau ‘i ‘Etilei.

³⁴Pea folofola ‘a Sihova kia Mōsese, ‘Oua ‘e manavahē kiate ia, he kuo u tuku ki ho nima ‘a ia mo hono kakai kotoa mo hono fonua: pea te ke fai kiate ia ‘o hangē ko ho‘o fai kia Sīhoni ko e Tu‘i ‘Āmoli na‘e nofo ‘i Hesiponi.

³⁵Pea nau taa‘i ia mo hono ngaahi foha mo hono kakai kotoa, ‘o ‘ikai te nau tuku hano toko taha ke hao; pea nau ma‘u hono fonua.

³⁶Pea tuku fononga atu ‘a ha‘a ‘Isileli, ‘o nau fokotu‘u tēniti ‘i he ngaahi potu ‘o ‘Alapā-Moape, ‘i he kauvai ‘o Soatani na‘e hanga ki Sielikō.