Read KO E TOH TAPU KATOA TONGA NŌMIPA 22 Bible Online

NŌMIPA 22 - KO E TOH TAPU KATOA TONGA bible

NŌMIPA 22

¹PEA vakai ‘e Pēlaki, ko e ‘alo ‘o Sīpoa, ‘a e ngaahi me‘a kuo fai ‘e ‘Isileli ki he kau ‘Āmoli.

²Pea mātu‘aki līfusia ‘a Moape ki he kakai ko ē, he ko e kakai lahi: pea nau hoha‘a telia ‘a ha‘a ‘Isileli.

³Pea lea ‘a Moape ki he mātu‘a Mitiani, Ko ‘eni, ‘e ‘emohia ‘e he hōsitē ni ‘a e me‘a kotoa ‘oku takatakai kiate kitautolu, ‘o hangē ko e ‘emohia ‘e he pulu ‘a e musie ‘o e vao.

⁴Pea ko Pēlaki ko e ‘alo ‘o Sīpoa na‘e Tu‘i Moape ‘i he taimi ko ia.

⁵Ko ia, na‘a ne tuku atu ha kau talafekau kia Pēlami ko e foha ‘o Peoli ki Pētola, ‘a ia na‘e tu‘u ki he Vaitafe ‘i he fonua ‘o ha‘a ‘Amo,[21] ke ne ha‘u, pea ke nau pehē; Vakai, ‘oku ai ha kakai kuo ha‘u mei ‘Isipite, pea koloto ke hā ha lau‘i kelekele koe‘uhi ko kinautolu, pea ‘oku nau nofo ‘o siofaki mai:

⁶pea ko ia ‘oku ou kole ke ke ha‘u, ‘o tukitala‘i ‘a e kakai ni ma‘aku; he ‘oku nau kaukaua fau kiate au: hei‘ilo te u mafai ka mau taa‘i ia ‘o kapusi mei he fonua: he ‘oku ou ‘ilo ko ia ‘oku ke tāpuaki‘i ‘oku monū‘ia, ka ko ia ‘oku ke tukitala‘i te ne mala‘ia.

⁷Pea ō ‘a e mātu‘a Moape mo e mātu‘a Mitiani, ‘o nau ‘alu mo kinautolu ‘a e koloa ‘o e fakalou‘akau; pea nau a‘u kia Pēlami, ‘o nau tala kiate ia ‘a e folofola ‘a Pēlaki.

⁸Pea pehē ‘e ia kiate kinautolu, Mou tatoka heni he pō ni, ka u toki ‘atu hano tali ‘o fakatatau ki he folofola ‘a Sihova kiate au. Pea tatoka mo Pēlami ‘a e hou‘eiki Moape.

⁹Pea hā‘ele mai ‘a e ‘Otua kia Pēlami, ‘o ne folofola mai, Ko e tu‘unga tangata hā ena ‘oku ‘iate koe?

¹⁰Pea fakatau folofola ‘a Pēlami kia ‘Elohimi, Ko Pēlaki ko e ‘alo ‘o Sīpoa, ko e Tu‘i Moape, kuo ne pōpoaki mai ‘o pehē,

¹¹Vakai, ko e kakai kuo ha‘u mei ‘Isipite ‘oku ‘ikai ke hā ‘a e kelekele koe‘uhi ko kinautolu: ko ia ke ke ha‘u ‘o tutuku‘i ia ma‘aku; hei‘ilo te u mafai ai ke tau‘i ia, ‘o kapusi.

¹²Pea folofola ‘a e ‘Otua kia Pēlami, ‘Oua te ke ‘alu mo kinautolu; ‘oua te ke tukitala‘i ‘a e kakai ko ē: he ko e kakai tāpuekina.

¹³Pea tu‘u pongipongi hake ‘a Pēlami, ‘o ne pehē ki he hou‘eiki ‘a Pēlaki, Mou ō ki homou fonua; he kuo ta‘eloto ‘a Sihova ke tukuange au ke ‘alu mo kimoutolu.

¹⁴Pea tutu‘u ‘a e hou‘eiki Moape, ‘o nau a‘u kia Pēlaki, pea nau pehē, Na‘e ‘ikai loto ‘a Pēlami ke ha‘u mo kimautolu.

¹⁵Pea toe fekau atu ‘e Pēlaki ha hou‘eiki na‘e tokolahi ange mo mā‘olunga hake ‘i he ō ko ē.

¹⁶Pea nau a‘u kia Pēlami, ‘o nau pehē ki ai, Ko e folofola eni ‘a Pēlaki ko e ‘alo ‘o Sīpoa, Ke ‘oua na‘a ke tuku ke ta‘ofi koe mei he ha‘u kiate au:

¹⁷he te u mātu‘aki fakahīkihiki‘i koe, pea neongo pe ko e hā te ke tala mai kiate au te u fai: ko ia ke ke ha‘u mu‘a, ‘o tutuku‘i ‘a e kakai ni ma‘aku.

¹⁸Pea tali ‘a Pēlami, ‘o ne pehē ki he kau tamaio‘eiki ‘a Pēlaki, Neongo ‘e foaki mai ‘e Pēlaki hono fale kuo fonu ‘i he siliva mo e koula, ‘e ‘ikai te u lava ke hiki mei he me‘a ‘e tō mei he fofonga ‘o Sihova ko hoku ‘Otua, ke fakasi‘isi‘i, pe fakalahi ki ai.

¹⁹Ka ko eni ke mou nofo mu‘a heni, he pō ni foki, ka u ‘ilo pe ko e hā ha toe folofola ‘a Sihova ‘e fai mai.

²⁰Pea hā‘ele mai ‘a e ‘Otua kia Pēlami ‘i he pō, ‘o ne folofola kiate ia, Kapau ‘e ha‘u ‘a e tu‘unga tangata ke ui koe, pea ke tu‘u ‘o ‘alu mo kinautolu; ka neongo ia, ka ko e lea te u ‘atu kiate koe ko ia pē te ke fai.

²¹Pea pongipongi hake pea tu‘u ‘a Pēlami, ‘o ne teuteu ‘ene ‘asi fefine, ‘o ne ‘alu mo e hou‘eiki Moape.

²²Pea langa‘i ai ‘a e houhau ‘o e ‘Otua koe‘uhi ko ‘ene ‘alu: pea hanga ‘a e ‘Āngelo ‘a Sihova ‘o tu‘u ‘i he hala mōno fili. Ka kuo heka ia ‘i he‘ene ‘asi, pea ‘oku ō mo ia ‘ene ongo talavou.

²³Pea vakai ‘e he ‘asi ‘a e ‘Āngelo ‘a Sihova ‘oku tu‘u ‘i he hala, kuo unuhi ‘ene heletā ‘o ne to‘o: pea afe ‘a e ‘asi mei he hala, ‘o ne ‘alu ‘i he vao: pea taa‘i ia ‘e Pēlami ke ne foki ki he hala.

²⁴Pea hanga ‘a e ‘Āngelo ‘a Sihova, ‘o tu‘u ‘i ha hala fakaliuvaka, ‘i he ngaahi ngoue vaine, ‘o ‘aa‘i mei tafa‘aki mo tafa‘aki.

²⁵Pea sio ‘e he ‘asi ki he ‘Āngelo ‘a Sihova, ‘o ne fa‘aki mālohi ki he ‘ā maka, ‘o feu‘utekina ‘a e va‘e ‘o Pēlami mo e ‘ā maka: pea ne toe ‘ai hono fu‘u hapo.

²⁶Pea toe taha atu ‘a e ‘Āngelo ‘a Sihova, ‘o ne tu‘u ‘i ha potu ‘efi‘efi, ‘a ia na‘e ‘ikai ala tafoki ai ki to‘omata‘u pe ki to‘ohema.

²⁷Pea ‘i he sio ‘a e ‘asi ki he ‘Āngelo ‘a Sihova, na‘a ne tō fo‘ohifo mo Pēlami: pea puke ‘a e ‘ita ‘o Pēlami, ‘o ne taa‘i ‘a e ‘asi ‘aki ‘ene me‘a kinisi.

²⁸Pea to‘o ‘e Sihova ‘a e ngutu ‘o e ‘asi, ‘o ne lea kia Pēlami, Ko e hā ‘aku kuo u fai kiate koe ke ke taa‘i ai au ‘a e tu‘o tolu ni?

²⁹Pea tali ‘e Pēlami ki he ‘asi, Koe‘uhi ko ho‘o ngaohi pehe‘i au: taumaiā ‘oku ‘i hoku nima ha heletā, pehē kuo u tāmate‘i koe.

³⁰Pea pehē ‘a e ‘asi kia Pēlami, ‘Ikai ko si‘o ‘asi au ‘a ia kuo ke heka ai talu ho‘o mo‘ui, ‘o a‘u ki he ‘aho ni? he kuo u momo‘i fai pehē kiate koe hā taimi?

³¹Pea ne tali, ‘Ikai. Pea tatala ‘e Sihova ‘a e mata ‘o Pēlami, ‘o ne sio ki he ‘Āngelo ‘a e ‘Eiki ‘oku ne tu‘u mai ‘i he hala, pea kuo unuhi ‘ene heletā ‘o to‘o: pea ne punou, ‘o tō fo‘ohifo.

³²Pea folofola kiate ia ‘a e ‘Āngelo ‘a Sihova, Ko e hā na‘a ke taa‘i ai ho‘o ‘asi ‘a e tu‘o tolu ko ē? Ko eni kuo u ha‘u ko ho fili, he ‘oku tū‘ulu tonu mai kiate au ho hala:[22]

³³pea na‘e sio kiate au ‘a e ‘asi, ‘o ne afe meiate au ‘a e tu‘o tolu ko ē: ka ne ‘ikai afe ia meiate au, pehē kuo u tāmate‘i koe kae tuku ia ke mo‘ui.

³⁴Pea fakatau folofola ‘a Pēlami ki he ‘Āngelo ‘a Sihova, Kuo u hia, he na‘e ‘ikai te u ‘ilo ‘oku ke tu‘u koe mei he hala ke ta‘ofi au; pea kapau ‘oku kovi ki he Feitu‘u na, pea te u foki.

³⁵Pea folofola ‘a e ‘Āngelo ‘a Sihova kia Pēlami, ‘Alu mo e kau tangata; ka ‘oku ngata ‘i he lea te u fai kiate koe ‘a ia te ke lea‘aki. Ko ia na‘e ‘alu ‘a Pēlami mo e hou‘eiki ‘a Pēlaki.

³⁶Pea ‘i he fanongo ‘e Pēlaki kuo ha‘u ‘a Pēlami, na‘a ne ‘alu atu ke fakafetaulaki kiate ia ki ‘Ala-Moape, ‘a ia ‘oku ‘i he tafafonua ‘o ‘Alanoni, ‘i he taupotu ‘o e fonua.

³⁷Pea me‘a ‘a Pēlaki kia Pēlami, ‘Ikai na‘a ku mātu‘aki fekau atu ho ‘omi? Ko e hā na‘e ‘ikai te ke ha‘u ai kiate au? ‘Ikai ‘oku ou mafai mo‘oni ke fakahīkihiki‘i koe?

³⁸Pea tali ‘e Pēlami kia Pēlaki, Ko eni kuo u ha‘u kiate koe; ka he ‘oku ou momo‘i lava ke fai ha lea? Ko e me‘a kotoa pē ‘e ‘ai ‘e he ‘Otua ki hoku ngutu ko ia pē te u lea‘aki.

³⁹Pea ō ‘a Pēlami mo Pēlaki, pea na a‘u ki Kiliati-hūsoti.

⁴⁰Pea feia ‘e Pēlaki ha feilaulau pulu mo e sipi, mo tauhi kia Pēlami mo e hou‘eiki na‘e ‘iate ia.