Read KO E TOH TAPU KATOA TONGA NŌMIPA 23 Bible Online

NŌMIPA 23 - KO E TOH TAPU KATOA TONGA bible

NŌMIPA 23

¹PEA pongipongi hake na‘e ‘ave ‘e Pēlaki ‘a Pēlami ki Pāmoti-Peali,[23] pea ne mamata mei ai ki he taupotu ‘o e kakai. Pea lea ‘a Pēlami kia Pēlaki, Fokotu‘u heni ma‘aku ha fitu‘i ‘ōlita, pea teuteu heni ma‘aku ha fitu‘i pulu mo ha fitu‘i sipi tangata.

²Pea fai ‘e Pēlaki hangē ko e lea ‘a Pēlami; pea feia ‘e Pēlaki mo Pēlami ha pulu mo ha sipi tangata ‘i he ‘ōlita takitaha.

³Pea lea ‘a Pēlami kia Pēlaki, Tu‘u pē koe ‘i ho tafa‘aki feilaulau ka u ‘alu au; hei‘ilo ‘e hā‘ele mai ‘a Sihova ke ma fe‘iloaki. Pea neongo pe ko e hā te ne faka‘ilo mai te u tala kiate koe.

⁴Pea ne ‘alu ki ha mātanga. Pea fe‘iloaki ‘a e ‘Otua mo Pēlami; pea fakatau folofola ‘e ia ki ai, Ko e fitu‘i ‘ōlita kuo u fokotu‘u, pea kuo u feia ha pulu mo ha sipi tangata ‘i he ‘ōlita takitaha.

⁵Pea ‘ai ‘e he ‘Eiki ha lea ki he ngutu ‘o Pēlami, ‘o ne folofola mai, Foki kia Pēlaki, pea ‘e pehē ho‘o lea ki ai.

⁶Pea ne foki kiate ia, pea tā ‘oku ne tu‘u ofi ki he‘ene feilaulau, ‘a ia mo e hou‘eiki Moape.

⁷Pea ofa‘aki ‘e ia ‘ene ta‘anga, ‘o ne pehē, Ko Pēlaki kuo ne ‘omi au mei ‘Ālame, Ko e Tu‘i Moape mei he ngaahi mo‘unga ‘o Hahake: “Ha‘u, ‘o tukitala‘i ‘a Sēkope ma‘aku, ‘Io, ha‘u ā, ‘o tuku ‘a ‘Isileli ki he houhau.”

⁸Te u tutuku‘i fēfē ha taha kuo ‘ikai tutuku‘i ‘e ‘Ela? Mo fakahouhau‘i fēfē, ka kuo ‘ikai fakahouhau‘i ‘e Sihova?

⁹He mei he funga makatu‘u ‘oku ou sio ki ai, Pea ‘i he ngaahi mo‘unga ‘oku ne ma‘ali mai: Ko e kakai eni ia ka nofo ‘atā, ‘O ‘ikai lau mo e ngaahi pule‘anga.

¹⁰Ko e efu ‘i Sēkope ‘e fatu ‘e hai? Pe lau hono vahefā ‘o ‘Isileli? Ka u mate au he mātenga ‘o ha‘a angatonu, Pea tatau mo ho‘ona ‘a e iku‘anga ‘o‘oku.

¹¹Pea me‘a ‘a Pēlaki kia Pēlami, Ko e hā eni kuo ke fai kiate au? Na‘a ku ‘omi koe ke tukitala‘i hoku ngaahi fili, pea vakai, kuo ke mātu‘aki tāpuaki‘i.

¹²Pea tali ‘e ia ‘o ne pehē, ‘Ikai ‘oku totonu ke u ta‘ofi au ke lea‘aki ‘a e me‘a pē kuo ‘ai ‘e Sihova ki hoku ngutu?

¹³Pea pehē ‘e Pēlaki kiate ia, Ha‘u mu‘a, ke ta ō ki ha potu ‘e taha, ‘a ia te ke sio mei ai kiate kinautolu; ko hano tepu pē te ke mamata ki ai, ka ‘e ‘ikai te ke sio ki honau kotoa: ka ke fai mei ai ma‘aku hano tutuku‘i.

¹⁴Pea ne ‘ave ia ki he toafa ‘o Sōfimi ‘i funga Pīsika, ‘o ne fokotu‘u ha fitu‘i ‘ōlita, ‘o ne feia ha pulu mo ha sipi tangata ‘i he ‘ōlita takitaha.

¹⁵Pea pehē ‘e ia kia Pēlaki, Tu‘u koe heni ofi ki ho‘o feilaulau, ka u ‘alu au ‘o fakalalave ki hē.

¹⁶Pea felāve‘i ‘a Sihova mo Pēlami, ‘o ne ‘ai ha lea ki hono ngutu, ‘o ne folofola mai, Foki kia Pēlaki, pea ‘e pehē ho‘o lea ki ai.

¹⁷Pea ne a‘u kiate ia, pea tā ko ena ia ‘oku ne tu‘u ‘o ofi ki he‘ene feilaulau, pea mo e hou‘eiki Moape fakataha mo ia. Pea me‘a mai ‘a Pēlaki kiate ia, Ko e hā ‘a e folofola mai ‘a Sihova?

¹⁸Pea ne ofa‘aki ‘ene ta‘anga, ‘o pehē, Tu‘u, Pēlaki, ‘o fanongoa; Fokotu‘u telinga mai, Hako ‘o Sīpoa:

¹⁹‘Oku ‘ikai ko e tangata ‘a ‘Ela ke loi ia; Pe hako‘i ‘Ātama ke ne fakatomala: Ko e pehē ke ne lea ‘o ‘oua ‘e fai? Pe folofola ‘o ‘ikai fakaai?

²⁰Ko eni ko e tāpuaki kuo ‘omi ke u fai: Pea ka kuo ne tāpuekina ‘e ‘ikai te u maliu ‘aki.

²¹Kuo ‘ikai te ne ‘ilo ‘ia Sēkope ha kovi, Pea kuo ‘ikai te ne ‘afioa ha fakamamahi ‘i ‘Isileli: ‘Oku ō mo ia hono ‘Otua ko Sihova, Pea ‘oku longolongo tu‘i hono ‘apitanga.

²²Ko ‘Ela ‘oku taki mai kinautolu mei ‘Isipite; ‘Oku hangē ‘oku ‘iate ia ‘a e mālohinga ‘o e pufaloe.

²³He ‘oku ‘ikai ‘ia Sēkope ha fai tongafisi, Pea ‘oku ‘ikai ha faka‘āvea ‘i ‘Isileli:[24] Ka ‘oku toki tala kia Sēkope ‘i hono houa, ‘Io, ki ‘Isileli ‘a e me‘a ‘oku fai ‘e ‘Ela.

²⁴Tā ko e kakai ni ‘oku hangē ha laione toutama ‘ene tu‘u na, Pea hangē ha laione motu‘a ‘ene mofuta; ‘E ‘ikai te ne tokoto kae‘oua ke kai ‘ene hae, Mo inu ‘a e toto ‘o ‘ene tāmate.

²⁵Pea me‘a ‘a Pēlaki kia Pēlami, Foki tama, ‘oua te ke tukitala‘i kinautolu, pea ‘oua foki ‘e tāpuaki‘i!

²⁶Pea tali ‘e Pēlami, ‘o ne pehē kia Pēlaki, ‘Ikai na‘a ku tala kiate koe, ‘o pehē, Ko ia kotoa ‘e folofola‘aki mai ‘e Sihova kuo pau ke u fai ia?

²⁷Pea me‘a ‘a Pēlaki kia Pēlami, Ha‘u ke u ‘ave koe ki ha potu kehe, hei‘ilo ‘e toki finangalo lelei ‘a ‘Elohimi ke ke fai honau tukitala‘i ma‘aku mei ai.

²⁸Ko ia na‘e ‘ave ‘e Pēlaki ‘a Pēlami ki he tumutumu ‘o Peoli, ‘a ia ‘oku sio hifo mei ai ki he mata ‘o e lala.

²⁹Pea lea ‘a Pēlami kia Pēlaki, Fokotu‘u heni ma‘aku ha fitu‘i ‘ōlita, pea teuteu heni ma‘aku ha fitu‘i pulu mo ha fitu‘i sipi tangata.

³⁰Pea fai ‘e Pēlaki hangē ko e lea ‘a Pēlami, pea ne feia ha pulu mo ha sipi tangata ‘i he ‘ōlita takitaha.