Read KO E TOH TAPU KATOA TONGA NŌMIPA 24 Bible Online

NŌMIPA 24 - KO E TOH TAPU KATOA TONGA bible

NŌMIPA 24

¹PEA ‘i he vakai ‘e Pēlami ko e finangalo ‘o Sihova ke tāpuaki‘i ‘a ‘Isileli, na‘e ‘ikai te ne ‘alu hangē ko e taimi ko ē mo ē ke fakalalave halanga; ka ne mo‘uhangā pē ki he toafa.

²Pea tāngaki hake ‘e Pēlami hono mata, ‘o ne ‘ilo ‘a ‘Isileli ‘oku nofo fakamatakali mai; pea hā‘ele kiate ia ‘a e Laumālie ‘o e ‘Otua.

³Pea ofa‘aki ‘e Pēlami ‘ene ta‘anga, ‘o ne pehē, Ngonengone ‘a Pēlami foha ‘o Peoli, Ngonengone ‘a e motu‘a ne mata pongia:[25]

⁴Ngonengone ‘a‘ana ‘oku ongo‘i he folofola ‘a ‘Ela, Mo e vīsone ‘o Sātai ‘oku ne siofia, ‘Ene tō tekefili kae tatala hono mata:

⁵‘E Sēkope, hono ‘ikai faka‘ofo‘ofa ho ngaahi tēniti, Mo ho ngaahi nofo‘anga, ‘e ‘Isileli!

⁶Hangē ni tele‘a ‘enau mafola ē, Hangē ni ngoue ‘i he ve‘e vaitafe, Hangē ni ‘otu ‘ālosi kuo tō ‘e he ‘Eiki, Hangē ni ‘otu sita ‘i he ngaahi ve‘e vai.

⁷Ko ‘ene ongo kane ‘e fetafei mei ai ‘a e vai, Pea ko hono hako ‘e nofo ki he ngaahi vai lahi.[26] Pea ‘e mā‘olunga hono tu‘i ‘ia ‘Ēkaki, Pea ko hono pule‘anga ‘e hākeaki‘i.

⁸Ko ‘Ela ‘oku taki ia mei ‘Isipite, Hangē ‘oku ‘iate ia ‘a e mālohinga ‘o e pufaloe: Te ne ngungu ‘ani kakai ko hono ngaahi fili, Te ne mihi honau ngaahi hui, Honau tenga te ne laiki.

⁹‘Ene taulalo, ‘ene tokoto, hangē ha laione motu‘a; Pe ha laione toutama, ko hai te ne ue‘ia! Ko ia ‘oku ne tāpuaki‘i koe ‘e fai tāpuekina, Pea ko ia ‘oku ne fakamala‘ia koe ‘e mala‘ia ia.

¹⁰Pea puke ‘ita ‘a Pēlaki kia Pēlami, ‘o ne fakapā hono nima: ‘o ne pehē kia Pēlami, Na‘a ku ui koe ke tutuku‘i hoku ngaahi fili, pea ko eni kuo ke mātu‘aki tāpuaki‘i kinautolu ‘o tu‘o tolu.

¹¹Pea ko ia ke ke fei mo puna ki ho feitu‘u: na‘a ku pehē ke fu‘u fakahīkihiki‘i koe, ka tā kuo ta‘ofi koe ‘e he ‘Eiki mei he hākeaki‘i.

¹²Pea tali ‘e Pēlami kia Pēlaki, ‘Ikai foki na‘a ku fakahā ki he kau talafekau na‘a ke fekau mai, ‘o pehē,

¹³Neongo ‘e foaki mai ‘e Pēlaki hono fale kuo fonu ‘i he siliva mo e koula, ‘e ‘ikai te u lava ke hiki mei he me‘a ‘e tō mei he fofonga ‘o Sihova, ke fai ha lelei pe ha kovi ko hoku loto pē; ko e me‘a ‘oku folofola‘aki mai ‘e Sihova ko ia pē te u lea‘aki.

¹⁴Pea ko eni, vakai ko ‘eku ‘alu ē ki hoku kakai: ha‘u ka u hīnoi‘i koe ‘i he me‘a ‘e fai ‘e he kakai ni ki ho kakai ‘i he ngaahi ‘aho ‘amui.

¹⁵Pea ne ofa‘aki ‘ene ta‘anga ‘o ne pehē, Ngonengone ‘a Pēlami, ko e foha ‘o Peoli ia, Ngonengone ‘a e motu‘a ne mata pongia.[27]

¹⁶Ngonengone ‘a‘ana ‘oku ongo‘i ‘a e folofola ‘a ‘Ela, Pea ko e fakakaukau ‘a ‘Elioni ‘oku ne ‘iloa, Vīsone ‘o Sātai ‘oku ne siofia, ‘Ene tō tekefili kae tatala hono mata:

¹⁷‘Oku ou vakai ia neongo kuo te‘eki ‘i ai, ‘Oku ou ‘ilo atu, neongo ‘oku te‘eki ofi; He hoko ha fetu‘u meia Sēkope ia Pea hake mei ‘Isileli ha sēpita; Pea te ne taa‘i ‘a e ongo tuliki ‘o Moape, Mo faka‘auha ‘a e hako kotoa ‘o Sete.[28]

¹⁸Pea ‘e hoko ‘a ‘Ītomi ko e tofi‘a, Pea tofi‘a ‘aki mo Seia; Ko hono ongo fili ia; Ka ko ‘Isileli ‘e fai fita.

¹⁹Pea ‘e tupu ha hau meia Sēkope, Pea ko e toe ‘o e kolo te ne faka‘osi kotoa pē.

²⁰Pea ne vakai ‘a ‘Amaleki, ‘o ne ofa‘aki ‘ene ta‘anga ‘o pehē, Ko ‘Amaleki ko e ‘uluaki ‘i he ngaahi pule‘anga, Ka ko e ‘auha hono iku‘anga.

²¹Pea ne sio ki ha‘a Keini, ‘O ne ofa‘aki ‘ene ta‘anga ‘o pehē, ‘Oku tolonga ho nofo‘anga, Kuo ‘ai makatu‘u ho pununga.

²²He ‘auha koā ‘a Keini ia? ‘Oua ke taki pōpula koe ‘e ‘Āsilia.[29]

²³Pea ne ofa‘aki ‘ene ta‘anga ‘o pehē, ‘Oi! Ko hai ‘e mo‘ui ē, ‘Oka fai ‘e ‘Ela ‘a e me‘a ko ē?[30]

²⁴Ka ko e ngaahi vaka ē mei ‘apataki Kītimi, Pea ko ‘Āsilia te nau fakavaivai‘i mo Hepelū te nau fakavaivai‘i, Kae iku pē ki he ‘auha mo ia foki.

²⁵Pea tu‘u ‘a Pēlami, ‘o ne ‘alu ‘o foki ki hono feitu‘u: ko Pēlaki foki na‘a ne fou ‘i hono hala.