Read KO E TOH TAPU KATOA TONGA NŌMIPA 25 Bible Online

NŌMIPA 25 - KO E TOH TAPU KATOA TONGA bible

NŌMIPA 25

¹PEA nofo ‘a ‘Isileli ‘i Sītimi, pea kamata tango ‘e he kakai ki he fānau fefine ‘o Moape:

²he ko e fa‘ahinga ko ia na‘a nau fakaafe ‘a e kakai ki he fai feilaulau ‘o honau fa‘ahikehe; pea tokoni ai ‘a e kakai, mo hū ki honau fa‘ahikehe.

³Pea luva kinautolu ‘e ‘Isileli kia Peali-peoli, pea langa‘i ai ‘a e houhau ‘o Sihova ki ‘Isileli,

⁴pea folofola ‘a e ‘Eiki kia Mōsese, ‘o pehē, Omi ‘a e hou‘eiki kātoa ‘o e kakai, pea kalusefai ‘a e fa‘ahinga ko ē ma‘a Sihova ‘i he ‘ao ‘o e la‘ā,[31] kae lolou mei ‘Isileli ‘a e fu‘u tuputāmaki ‘o Sihova.

⁵Pea me‘a ‘a Mōsese ki he kau fakamaau ‘o ‘Isileli, Mou takitaha tāmate‘i hono kakai kuo luva kinautolu kia Peali-peoli.

⁶Pea tā ko e tangata ‘e taha ‘o ha‘a ‘Isileli na‘a ne ha‘u ‘o ‘omi ki hono kāinga ha fine Mitiani ‘i he kano‘i fofonga ‘o Mōsese mo e fakataha kotoa ‘o ha‘a ‘Isileli; ‘osi, ‘oku nau lau‘aitu ‘i he mata Tēniti Fe‘iloaki‘anga.

⁷Pea ‘i he mamata ki ai ‘a Finiasi, foha ‘o ‘Eliesa, ko e foha ‘o ‘Ēlone ko e taula‘eiki, na‘a ne tu‘u mai mei he lotolotonga ‘o e fakataha, ‘o ne to‘o ha tao;

⁸‘o ne tuli ‘i mui ki he tangata ‘Isileli ki he loki, ‘o ne hoka‘i kinaua ‘osi pē, ‘a e tangata ‘Isileli; pea ko e fefine na‘e ‘asi ‘i hono kona. Pea ta‘ofi ai ‘a e ‘au ‘a ha‘a ‘Isileli,

⁹pea ko e pekia ‘i he ‘au ko ia ko e toko ua mano mā fā afe.

¹⁰Pea folofola ‘a Sihova kia Mōsese, ‘o pehē,

¹¹Ko Finiasi, foha ‘o ‘Eliesa, ko e foha ‘o ‘Ēlone ko e taula‘eiki, kuo ne fakafoki ‘eku houhau mei ha‘a ‘Isileli ‘i he‘ene fua‘a ‘aki ‘a e fua‘a ‘a‘aku ‘i honau lotolotonga, ‘a e ā na‘e ‘ikai te u faka‘osi ai ‘a ha‘a ‘Isileli ‘i he‘eku fua‘a.

¹²Ko ia ke ke tala, Ko eni kuo u tuku kiate ia ‘a e fuakava ‘o e melino mo au:

¹³pea ko e fuakava ia ‘o e fakata‘engata ‘a e lakanga taula‘eiki mo‘ona mo hono hako ‘amui; koe‘uhi ā na‘a ne fua‘a telia hono ‘Otua, ‘o ne feia ha fakalelei ma‘a ha‘a ‘Isileli.

¹⁴Pea ko e hingoa ‘o e tangata ‘Isileli na‘e te‘ia ‘a ia na‘e taa‘i fakataha mo e fine Mitiani, ko Similai ko e foha ‘o Salu, ko e ‘eiki ‘ulumotu‘a ‘i ha‘a Simione.

¹⁵Pea ko e hingoa ‘o e fine Mitiani na‘e te‘ia ko Kōsipi ko e ‘ōfefine ‘o Siuli; ko e ‘ulumotu‘a ia ‘o ha fa‘ahinga ‘i Mitiani.

¹⁶Pea folofola ‘a Sihova kia Mōsese, ‘o pehē,

¹⁷Fakakina‘i ‘a e kau Mitiani, pea taa‘i kinautolu; he ‘oku fakakina‘i kimoutolu ‘e he fa‘ahinga ko ia ‘aki ‘enau ngaahi tauhele, ‘a ia kuo nau fakaheke ‘aki kimoutolu ‘i he me‘a ‘a Peoli, mo e me‘a ‘a Kōsipi ko e ‘ōfefine ‘o ha ‘eiki Mitiani, ko honau tuofefine, ‘a ia na‘e te‘ia ‘i he ‘aho ‘o e mahaki faka‘auha ‘i he me‘a ‘a Peoli.