Read KO E TOH TAPU KATOA TONGA NŌMIPA 26 Bible Online

NŌMIPA 26 - KO E TOH TAPU KATOA TONGA bible

NŌMIPA 26

¹PEA hili ‘a e mahaki faka‘auha, pea folofola ‘a Sihova kia Mōsese, pea kia ‘Eliesa foha ‘o ‘Ēlone ko e taula‘eiki, ‘o pehē,

²Lau ‘a e tokolahi ‘o e fakataha kātoa ‘o ha‘a ‘Isileli, ‘o kamata meiate ia ‘oku uofulu ta‘u ‘o fai hake, ‘o faka‘ulumotu‘a, ‘a kinautolu kotoa ‘i ‘Isileli ‘oku tu‘u ‘i he tau.

³Pea alea mo kinautolu ‘e Mōsese mo ‘Eliesa ko e taula‘eiki ‘i ‘Alapā-Moape, ‘i ve‘e Soatani fe‘unga mo Sielikō, ‘o pehē,

⁴Kamata meiate ia ‘oku uofulu ta‘u ‘o fai hake; hangē ko e tu‘utu‘uni ‘a Sihova kia Mōsese mo ha‘a ‘Isileli, ‘a kinautolu na‘e hū mai mei ‘Isipite.

⁵Ko Lūpeni ko e ‘uluaki foha ‘o ‘Isileli; ko e ngaahi foha ‘o Lūpeni; ko ‘Īnoke, ‘a e fāmili ‘o ha‘a ‘Īnoke: meia Falu, ‘a e fāmili ‘o ha‘a Falu:

⁶meia Heseloni, ‘a e fāmili ‘o ha‘a Heseloni: meia Kālimi, ‘a e fāmili ‘o ha‘a Kālimi.

⁷Ko e ngaahi fāmili ia ‘o ha‘a Lūpeni; pea ko kinautolu na‘e lau mei ai ko e toko fā mano mā tolu afe mā fitungeau mā tolungofulu.

⁸Pea ko e hako ‘o Falu; ko ‘Eliapi. Pea ko e hako ‘o ‘Eliapi; ko Nemueli, mo Tētani, mo ‘Apilami.

⁹Ko e Tētani mo ‘Apilami ia na‘e ui ki he fakataha, ‘a ia na‘a nau kē mo Mōsese mo ‘Ēlone ‘i he kau ‘a Kola ‘i he‘enau fetakai mo e ‘Eiki.

¹⁰Pea na‘e mafa‘a ‘e he fonua hono ngutu, ‘o folo fua kinautolu fakataha mo Kola, ‘i he taimi na‘e pekia ai ‘a e kautaha ko ia;

¹¹‘o keina ‘e he afi ‘a e uangeau mā nimangofulu‘i tangata, ‘o nau hoko ko e faka‘ilonga. Ka ko e ngaahi foha ‘o Kola na‘e ‘ikai ke pekia.

¹²Ko e hako ‘o Simione ‘o faka-e-honau-ngaahi-fāmili: meia Nemueli, ‘a e fāmili ‘o ha‘a Nemueli: meia Siamini, ‘a e fāmili ‘o ha‘a Siamini: meia Siakini, ‘a e fāmili ‘o ha‘a Siakini:

¹³meia Sala, ‘a e fāmili ‘o ha‘a Sala: meia Saula, ‘a e fāmili ‘o ha‘a Saula.

¹⁴Ko e ngaahi fāmili ia ‘o ha‘a Simione, ko e toko ua mano mā ua afe mā uangeau.

¹⁵Ko e hako ‘o Kata ‘o faka-e-honau-ngaahi-fāmili: meia Sīfoni ‘a e fāmili ‘o ha‘a Sīfoni: meia Haki, ‘a e fāmili ‘o ha‘a Haki: meia Suni, ‘a e fāmili ‘o ha‘a Suni:

¹⁶meia ‘Ōsini, ‘a e fāmili ‘o ha‘a ‘Ōsini: meia ‘Eli, ‘a e fāmili ‘o ha‘a ‘Eli:

¹⁷meia ‘Āloti, ‘a e fāmili ‘o ha‘a ‘Āloti: meia ‘Āleli, ‘a e fāmili ‘o ha‘a ‘Āleli.

¹⁸Ko e ngaahi fāmili ia ‘o ha‘a Kata na‘e lau, ko e toko fā mano mā nimangeau.

¹⁹Ko e hako ‘o Siuta ko ‘Ea mo ‘Ōnani: ka na‘e pekia ‘a ‘Ea mo ‘Ōnani ‘i he fonua ko Kēnani.

²⁰Pea ko eni ‘a e hako ‘a Siuta faka-e-honau-ngaahi-fāmili; meia Sela, ‘a e fāmili ‘o ha‘a Sela: meia Felesi, ‘a e fāmili ‘o ha‘a Felesi: meia Sala, ‘a e fāmili ‘o ha‘a Sala.

²¹Pea ko eni ‘a e hako ‘o Felesi: meia Heseloni, ‘a e fāmili ‘o ha‘a Heseloni: meia Hāmuli, ‘a e fāmili ‘o ha‘a Hāmuli.

²²Ko e ngaahi fāmili ia ‘o ha‘a Siuta na‘e lau, ko e toko fitu mano mā ono afe mā nimangeau.

²³Ko e hako ‘o ‘Īsaka faka-e-honau-ngaahi-fāmili: ko Tola, ‘a e fāmili ‘o ha‘a Tola: meia Puva, ‘a e fāmili ‘o ha‘a Puva:

²⁴meia ‘Iasupi, ‘a e fāmili ‘o ha‘a ‘Iasupi: meia Similoni, ‘a e fāmili ‘o ha‘a Similoni.

²⁵Ko e ngaahi fāmili ia ‘o ha‘a ‘Īsaka na‘e lau, ko e toko ono mano mā fā afe mā tolungeau.

²⁶Ko e hako ‘o Sepulone faka-e-honau-ngaahi-fāmili: meia Sēleti, ‘a e fāmili ‘o ha‘a Sēleti: meia ‘Ēlone, ‘a e fāmili ‘o ha‘a ‘Ēlone: meia ‘Iakaleli, ‘a e fāmili ‘o ha‘a ‘Iakaleli.

²⁷Ko e ngaahi fāmili ia ‘o ha‘a Sepulone na‘e lau, ko e toko ono mano mā nimangeau.

²⁸Ko e hako ‘o Siosifa faka-e-honau-ngaahi-fāmili: ko Manase mo ‘Ifalemi.

²⁹Ko e hako ‘o Manase: meia Mākili, ‘a e fāmili ‘o ha‘a Mākili: pea tupu meia Mākili ‘a Kiliati: meia Kiliati, ‘a e fāmili ‘o ha‘a Kiliati.

³⁰Ko eni ‘a e hako ‘o Kiliati: ko ‘Iesa, ‘a e fāmili ‘o ha‘a ‘Iesa: meia Hēleka, ‘a e fāmili ‘o ha‘a Hēleka:

³¹pea mo ‘Āselieli, ‘a e fāmili ‘o ha‘a ‘Āselieli: mo Sikemi, ‘a e fāmili ‘o ha‘a Sikemi:

³²pea mo Sēmita, ‘a e fāmili ‘o ha‘a Sēmita: pea mo Hēfeli, ‘a e fāmili ‘o ha‘a Hēfeli.

³³Ka ko Silofehati ko e foha ‘o Hēfeli na‘e ‘ikai ha‘ane fānau tangata, ko e ngaahi ‘ōfefine pē: pea ko e hingoa ‘o e ngaahi ‘ōfefine ‘o Silofehati ko Māhala mo Noa, ko Hōkela, Milika, mo Tīlisa.

³⁴Ko e ngaahi fāmili ia ‘o ha‘a Manase; pea ko kinautolu na‘e lau mei ai ko e toko nima mano mā ua afe mā fitungeau.

³⁵Ko eni ‘a e hako ‘o ‘Ifalemi faka-e-honau-ngaahi-fāmili: meia Sūtela, ‘a e fāmili ‘o ha‘a Sūtela: meia Pēkeli, ‘a e fāmili ‘o ha‘a Pēkeli: meia Tāhani, ‘a e fāmili ‘o ha‘a Tāhani.

³⁶Pea ko e hako eni ‘o Sūtela: meia ‘Ēlani, ‘a e fāmili ‘o ha‘a ‘Ēlani.

³⁷Ko e ngaahi fāmili ia ‘o ha‘a ‘Ifalemi na‘e lau, ko e toko tolu mano mā ua afe mā nimangeau. Ko e hako ‘o Siosifa ia faka-e-honau-ngaahi-fāmili.

³⁸Ko e hako ‘o Penisimani faka-e-honau-ngaahi-fāmili: meia Pela, ‘a e fāmili ‘o ha‘a Pela: meia ‘Asipeli, ‘a e fāmili ‘o ha‘a ‘Asipeli: meia ‘Āhilami, ‘a e fāmili ‘o ha‘a ‘Āhilami:

³⁹meia Sefufami, ‘a e fāmili ‘o ha‘a Sefufami: meia Hūpami, ‘a e fāmili ‘o ha‘a Hūpami.

⁴⁰Pea ko e hako ‘o Pela ‘a ‘Āliti mo Neamani — ‘a e fāmili ‘o ha‘a ‘Āliti: meia Neamani, ‘a e fāmili ‘o ha‘a Neamani.

⁴¹Ko e hako ‘o Penisimani ia faka-e-honau-ngaahi-fāmili: pea ko kinautolu na‘e lau mei ai ko e toko fā mano mā nima afe mā onongeau.

⁴²Ko eni ‘a e hako ‘o Tani faka-e-honau-ngaahi-fāmili: meia Sūhami, ‘a e fāmili ‘o ha‘a Sūhami. Ko e ngaahi fāmili ia ‘o Tani faka-e-honau-ngaahi-fāmili.

⁴³Ko e ngaahi fāmili kotoa ‘o ha‘a Sūhami, ‘a kinautolu na‘e lau, ko e toko ono mano mā fā afe mā fāngeau.

⁴⁴Ko e hako ‘o ‘Āseli faka-e-honau-ngaahi-fāmili: meia Simina, ‘a e fāmili ‘o ha‘a Simina: meia Sisui, ‘a e fāmili ‘o ha‘a Sisui: meia Pēli‘a, ‘a e fāmili ‘o ha‘a Pēli‘a.

⁴⁵Ko e hako ‘o Pēli‘a; meia Hepa, ‘a e fāmili ‘o ha‘a Hepa: meia Malakieli ‘a e fāmili ‘o ha‘a Malakieli.

⁴⁶Pea ko e hingoa ‘o e ‘ōfefine ‘o ‘Āseli ko Sela.

⁴⁷Ko e ngaahi fāmili ia ‘o ha‘a ‘Āseli na‘e lau, ko e toko nima mano mā tolu afe mā fāngeau.

⁴⁸Ko e hako ‘o Nafitalai faka-e-honau-ngaahi-fāmili: meia ‘Iakasili, ‘a e fāmili ‘o ha‘a ‘Iakasili: meia Kuni, ‘a e fāmili ‘o ha‘a Kuni:

⁴⁹meia ‘Ieseli, ‘a e fāmili ‘o ha‘a ‘Ieseli: meia Sīlemi, ‘a e fāmili ‘o ha‘a Sīlemi.

⁵⁰Ko e ngaahi fāmili ia ‘o ha‘a Nafitalai faka-e-honau-ngaahi-fāmili: pea ko kinautolu na‘e lau ko e toko fā mano mā nima afe mā fāngeau.

⁵¹Ko ha‘a ‘Isileli ia na‘e lau, ko e toko ono kilu mā taha afe mā fitungeau mā tolungofulu.

⁵²Pea folofola ‘a e ‘Eiki kia Mōsese ‘o pehē,

⁵³Ko eni ia ‘e vahe tofi‘a ki ai ‘a e fonua ‘o fakatatau ki he lau ‘o honau hingoa.

⁵⁴Ki he tokolahi te ke vahe tofi‘a lahi, pea ki he toko si‘i te ke vahe tofi‘a si‘i: ‘e ‘atu tofi‘a ki he tangata takitaha ‘o fakatatau ki he me‘a na‘e va‘iniu hake ‘i he lau hono kakai.

⁵⁵Ka neongo ia ka ‘e fai talotalo ‘a e vahe fonua: ‘e fai‘aki ‘a e hingoa fakamatakali ‘o honau tupu‘anga ‘enau ma‘u tofi‘a.

⁵⁶Pea ko e tofi‘a kuo tō ‘i he talotalo ‘e toki vahevahe ia, ‘o tokanga ki he tokolahi mo e toko si‘i.

⁵⁷Pea ko eni ia na‘e lau mei ha‘a Līvai faka-e-honau-ngaahi-fāmili: meia Kēsoni, ‘a e fāmili ‘o ha‘a Kēsoni: meia Kōhate, ‘a e fāmili ‘o ha‘a Kōhate: meia Mēlali, ‘a e fāmili ‘o ha‘a Mēlali.

⁵⁸Ko eni ‘a e ngaahi fāmili ‘o ha‘a Līvai: ko e fāmili ‘o ha‘a Līpini, ko e fāmili ‘o ha‘a Hepeloni, ko e fāmili ‘o ha‘a Māhali, ko e fāmili ‘o ha‘a Musi, ko e fāmili ‘o ha‘a Kola. Pea na‘e tupu ‘ia Kōhate ‘a ‘Amilami.

⁵⁹Pea ko e hingoa ‘o e uaifi ‘o ‘Amilami ‘a Siokapesi, ko e ‘ōfefine ‘o Līvai, ‘a ia na‘e fanau‘i kia Līvai ‘i ‘Isipite: pea fā‘ele‘i ‘e ia kia ‘Amilami ‘a ‘Ēlone mo Mōsese, mo hona tuofefine ko Meliame.

⁶⁰Pea tupu ‘ia ‘Ēlone ‘a Nātapi mo ‘Āpiu, ‘a ‘Eliesa mo ‘Ītama.

⁶¹Pea pekia ‘a Nātapi mo ‘Āpiu ‘i he‘ena ‘atu ‘a e afi kehe ‘i he ‘ao ‘a Sihova.

⁶²Pea ko kinautolu na‘e lau mei ai ko e toko ua mano mā tolu afe, ‘a e tangata kotoa pē ‘o kamata meiate ia ‘oku taha māhina ‘o fai hake: he na‘e ‘ikai lau ‘a kinautolu fakataha mo ha‘a ‘Isileli, he na‘e ‘ikai ‘ange hanau tofi‘a fakataha mo ha‘a ‘Isileli.

⁶³Ko eni na‘e lau ‘e Mōsese mo e taula‘eiki ko ‘Eliesa, ‘a ia na‘a na lau ‘a ha‘a ‘Isileli ‘i ‘Alapā-Moape, ‘i he ve‘e Soatani fe‘unga mo Sielikō.

⁶⁴Pea ‘i he kakai ko ia na‘e ‘ikai ha tangata ‘iate kinautolu na‘e lau ‘e Mōsese mo e taula‘eiki ko ‘Ēlone, ‘a ia na‘a na lau ‘a ha‘a ‘Isileli ‘i he Toafa ‘o Sainai.

⁶⁵He na‘e folofola ‘iate kinautolu ‘a e ‘Eiki, Kuo pau te nau mate ‘i he Toafa. Pea na‘e ‘ikai toe hanau toko taha, ko Kēlepi pē ko e foha ‘o Sīfune, pea mo Siosiua ko e foha ‘o Nuni.