Read KO E TOH TAPU KATOA TONGA NŌMIPA 27 Bible Online

NŌMIPA 27 - KO E TOH TAPU KATOA TONGA bible

NŌMIPA 27

¹PEA ‘unu‘unu mai ‘a e ngaahi ‘ōfefine ‘o Silofehati, foha ‘o Hēfeli, foha ‘o Kiliati, foha ‘o Mākili, foha ‘o Manase, ‘o kau ki he ngaahi fāmili ‘o ha‘a Manase, ko e foha ‘o Siosifa: pea ko e ngaahi hingoa eni ‘o e ngaahi ‘ōfefine ko ia, ko Māhala, Noa, mo Hōkela, pea mo Milika mo Tīlisa.

²Pea na‘a nau tutu‘u ‘i he ‘ao ‘o Mōsese, mo e ‘ao ‘o ‘Eliesa ko e taula‘eiki, mo e ‘ao ‘o e hou‘eiki mo e fakataha kotoa, ‘i he mata Tēniti Fe‘iloaki‘anga, ‘o nau pehē,

³Na‘e pekia si‘emau tamai ‘i he Toafa, pea na‘e ‘ikai te ne ‘i he kau ko ia na‘a nau fakataha ke fai mo Sihova, ‘a e kautaha ‘a Kola: ka na‘a ne pekia ‘i he‘ene hia ‘a‘ana; pea na‘e ‘ikai ha‘ane fānau tangata.

⁴Ko e pehē koā ke mate ‘a e hingoa ‘o ‘emau tamai mei hono fāmili koe‘uhi na‘e ‘ikai hano foha? Tuku mai hamau konga kelekele ‘i he lotolotonga ‘o e kāinga ‘o ‘emau tamai.

⁵Pea na‘e ‘omi ‘e Mōsese ‘enau me‘a ki he ‘ao ‘o Sihova, he ko e me‘a fakakonisitūtone.

⁶Pea folofola ‘a Sihova kia Mōsese, ‘o pehē,

⁷‘Oku mo‘oni ‘a e lau ‘a e ngaahi ‘ōfefine ‘o Silofehati: te ke vahe pē ha konga kelekele mo‘onau tofi‘a ‘i he lotolotonga ‘o e kāinga ‘o ‘enau tamai; pea te ke fakalaka kiate kinautolu ‘a e tofi‘a ‘o ‘enau tamai.

⁸Pea te ke lea ki ha‘a ‘Isileli, ‘o pehē, Ka pekia ha tangata ta‘ehano foha, te ke fakalaka hono tofi‘a ki hono ‘ōfefine.

⁹Pea kapau ‘oku ‘ikai hano ‘ōfefine, pea te mou foaki hono tofi‘a ki hono ngaahi tokoua.

¹⁰Pea kapau ‘oku ‘ikai hano tokoua, pea te mou foaki hono tofi‘a ki he ngaahi tokoua ‘o ‘ene tamai.

¹¹Pea kapau ‘oku ‘ikai ha tokoua ‘o ‘ene tamai, pea te mou foaki hono tofi‘a ki ha kakano ‘o hono fāmili ‘oku ofi kiate ia, pea te ne ma‘u ia: pea ‘e hoko eni ko e kupu‘i konisitūtone ki ha‘a ‘Isileli hangē ko e tu‘utu‘uni ‘a Sihova kia Mōsese. Ko e Fili ‘o Siosiua ke ne Fetongi ‘a Mōsese.

¹²Pea folofola ‘a e ‘Eiki kia Mōsese, ‘Alu hake ki he mo‘unga ko eni ko ‘Apalemi, ‘o sio ki he fonua kuo u foaki ki ha‘a ‘Isileli.

¹³Pea hili ho‘o mamata ki ai, te ke ului mo koe foki ki ho kakai, ‘o hangē ne ului ho tokoua ko ‘Ēlone:

¹⁴koe‘uhi ā ne mo paetaku‘i ‘eku lea ‘i he Toafa ‘o Sini, ‘i he fakafekāke‘i hake ‘a e fakataha, ‘o ‘ikai te mo fakatāpuhaa‘i au ‘i honau ‘ao ‘i he vai ko ia (ko Vai Mēlipa ia ‘i Kētesi, ‘i he Toafa ‘o Sini).

¹⁵Pea fakatau folofola ‘a Mōsese ki he ‘Eiki, ‘o pehē,

¹⁶Ke fakanofo mu‘a ‘e Sihova, ko e ‘Otua ‘o e ngaahi laumālie ‘o e kakano kotoa pē, ha tangata ke pule ki he fakataha.

¹⁷Ha taha te ne fotu ma‘u pē ‘i ‘ao mo tu‘a, ha taha te ne taki atu kinautolu mo taki mai; ke ‘oua na‘a hoko ‘a e fakataha ‘a e ‘Afiona ‘o hangē ha fanga sipi ‘oku ‘ikai hanau tauhi.

¹⁸Pea folofola ‘a Sihova kia Mōsese, Pe‘i ‘ave ‘a Siosiua ko e foha ‘o Nuni, ko e tangata ‘oku Laumālie‘ia, pea hilifaki ho nima ki ai;

¹⁹pea fokotu‘u ia ‘i he ‘ao ‘o ‘Eliesa ko e taula‘eiki, pea ‘i he ‘ao ‘o e fakataha kotoa; pea fai hono tu‘utu‘uni ke nau sio ki ai.

²⁰Pea te ke tuku kiate ia mei ho lāngilangi, koe‘uhi ke fie ongo ‘a e fakataha kotoa ‘o ha‘a ‘Isileli,

²¹ka te ne tu‘u ‘i he ‘ao ‘o ‘Eliesa ko e taula‘eiki, ‘a ia te ne huhū ma‘ana kia Sihova ‘aki ‘a e fakatonu faka-‘Ūlimi:[32] ko e lea ‘a‘ana te nau hū atu ai, pea ko e lea ‘a‘ana te nau hū mai ai, ‘a ia mo ha‘a ‘Isileli kātoa foki, ‘io, ‘a e fakataha kotoa.

²²Pea fai ‘e Mōsese ‘o hangē ko e tu‘utu‘uni ‘a Sihova kiate ia; pea ne ‘ave ‘a Siosiua ‘o fokotu‘u ‘i he ‘ao ‘o ‘Eliesa ko e taula‘eiki, pea ‘i he ‘ao ‘o e fakataha kotoa:

²³pea ne hilifaki hono nima kiate ia, ‘o ne fai hono tu‘utu‘uni, hangē ko e folofola ‘a e ‘Eiki na‘e fakafai ‘ia Mōsese.