Read KO E TOH TAPU KATOA TONGA NŌMIPA 28 Bible Online

NŌMIPA 28 - KO E TOH TAPU KATOA TONGA bible

NŌMIPA 28

¹PEA folofola ‘a e ‘Eiki kia Mōsese, ‘o pehē,

²Fekau ‘a ha‘a ‘Isileli, ‘o tala kiate kinautolu, Te mou tokanga ke ‘omi kiate au ‘i hono taimi totonu ‘eku kōpano, ‘a ‘eku me‘akai ke fai‘aki ‘a e afi, mo‘o ngangatu fakahōifua kiate au.

³Pea te ke pehē kiate kinautolu, Ko eni ‘a e feilaulau tutu te mou ‘atu kia Sihova; ko e ngaahi lami tangata ‘oku ta‘u taha, ta‘ehanau mele, ‘o taki ua ki he ‘aho, mo‘o feilaulau-mōifua ‘o tu‘u ma‘u.

⁴Ko e lami ‘e taha te ke feia pongipongi, pea ko hono ua te ke fai ‘i he‘ene efiafi hifo:

⁵‘ai mo ha vahe hongofulu ‘o e efa ‘o e ‘elito‘i mahoa‘a kuo natu ‘aki ‘a e lolo tuki fe‘unga mo e vahefā ‘o ha hina, mōno kinaki.

⁶Ko e feilaulau-mōifua tu‘u ma‘u ia, ‘a ia na‘e fokotu‘u ‘i he mo‘unga ko Sainai mo‘o ngangatu fakahōifua, ko e feilaulau tutu kia Sihova.

⁷Pea ko hono kava ko e vahefā ‘o ha hina ki he lami ‘e taha: ko e Potu Tapu te ke lingi ai ha hu‘a kava mālohi ma‘a e ‘Eiki.

⁸Pea ko hono ua ‘o e lami te ke feia ‘i he‘ene efiafi hifo: te ke fai hangē ko e kinaki ‘o e pongipongi mo hono kava, ko e feilaulau tutu ia mo‘o ngangatu fakahōifua kia Sihova.

⁹Pea ‘i he ‘aho Sāpate ko e ongo lami ‘oku ta‘u taha, ta‘ehana mele, mo e ongo vahehongofulu ‘o e ‘elito‘i mahoa‘a kuo natu ‘aki ha lolo mōno kinaki, pea mo hona kava.

¹⁰Ko e feilaulau-mōifua faka-Sāpate ia; taha kehe ‘a e feilaulau-mōifua tu‘u ma‘u mo hono kava.

¹¹Pea ‘i he kamata‘anga ‘o homo ngaahi māhina te mou ‘atu ha feilaulau mōifua ki he ‘Eiki: ko e ongo pulu mui, mo e sipi tangata ‘e taha, ko e fitu‘i lami tangata ‘oku ta‘u taha pea ta‘emele;

¹²pea ko e vahehongofulu ‘e tolu ‘o e ‘elito‘i mahoa‘a, kuo natu ‘aki ‘a e lolo, ki he pulu takitaha mōno kinaki; pea ko e vahehongofulu ‘e ua ‘o e ‘elito‘i mahoa‘a, kuo natu ‘aki ‘a e lolo, ki he taha‘i sipi tangata mōno kinaki;

¹³pea ko ha vahehongofulu ‘o e ‘elito‘i mahoa‘a kuo natu ‘aki ‘a e lolo ki he lami takitaha mōno kinaki; ko e feilaulau-mōifua pea ngangatu fakahōifua ia, ‘o fai‘aki ‘a e afi kia Sihova.

¹⁴Pea ko honau kava ko e vaeua ‘o ha hina uaine ki ha pulu, mo e vahetolu ki he sipi tangata, mo e vahefā ki ha lami: ko e feilaulau-mōifua eni ‘o e māhina takitaha ‘i he ngaahi māhina ‘o e ta‘u.

¹⁵Pea mo ha kosi tangata ‘e taha mo‘o feilaulau-angahala kia Sihova: ‘e feia fakataha ia mo e feilaulau-mōifua tu‘u ma‘u mo hono kava ‘o‘ona.

¹⁶Pea ko e ‘uluaki māhina, ‘i hono ‘aho hongofulu mā fā, ko e Pāsova ia ‘a Sihova.

¹⁷Pea ko hono ‘aho hongofulu mā nima ‘o e māhina ko ia ko e ‘aho kātoanga: ko e ‘aho ‘e fitu ‘e kai mā ta‘elēvani.

¹⁸‘I he ‘uluaki ‘aho ‘e fai ha fakataha tapu:

¹⁹tapu ‘aupito ho‘omou fai ‘a e ngaahi ngāue ‘a homou ngaahi lakanga: ka te mou ‘atu ha feilaulau tutu kia Sihova, ko e feilaulau-mōifua; ko e ongo pulu mui, mo ha sipi tangata, mo ha fitu‘i lami tangata ‘oku taha ta‘u: te mou tokanga ke nau ta‘emele:

²⁰pea ko honau kinaki ko e ‘elito‘i mahoa‘a kuo natu ‘aki ‘a e lolo, ko e vahehongofulu ‘e tolu te mou ngaohi ki ha pulu, mo ha vahehongofulu ‘e ua ki he sipi tangata;

²¹ko e vahehongofulu ‘e taha te mou ngaohi ki he lami takitaha ‘i he fitu‘i lami:

²²pea mo ha kosi tangata mo‘o feilaulau-angahala, ke feia ‘aki ha fakalelei ma‘amoutolu.

²³Te mou feia ‘a e ngaahi me‘a ko e fakataha mo e feilaulau pongipongi, ‘a ia ko e feilaulau tu‘u ma‘u.

²⁴Te mou fai hangē ko ia ‘i he fitu‘i ‘aho kotoa pē, ko e me‘akai fai‘aki ‘a e afi, ko e ngangatu fakahōifua kia Sihova, ‘o fakalahi ‘aki ‘a e feilaulau tu‘u ma‘u mo hono kava.

²⁵Pea ‘i hono ‘aho fitu ‘e fai ha‘amou fakataha tapu: ‘ilonga ha ngāue fakatamaio‘eiki ‘e ‘ikai te mou fai.

²⁶‘I he taimi foki ‘o e polopolo ta‘u, ‘i ho‘omou ‘atu ha feilaulau-me‘akai fo‘ou kia Sihova, ‘i ho‘omou kātoanga Lau-uike, ‘e fai ha‘amou fakataha tapu: ‘ilonga ha ngāue fakatamaio‘eiki ‘e ‘ikai te mou fai:

²⁷ka te mou ‘atu ha feilaulau-mōifua mo‘o ngangatu fakahōifua kia Sihova; ha ongo pulu mui, ha sipi tangata, ha fitu‘i lami tangata ‘oku taha ta‘u.

²⁸Pea ko honau kinaki ko e ‘elito‘i mahoa‘a kuo natu ‘aki ‘a e lolo, ko e vahehongofulu ‘e tolu ki he pulu takitaha, ko e vahehongofulu ‘e ua ki he taha‘i sipi tangata.

²⁹Ko e vahehongofulu ‘e taha ki he lami takitaha ‘i he fitu‘i lami;

³⁰ko e kosi tangata ‘e taha ke feia ‘aki ha fakalelei ma‘amoutolu.

³¹Te mou fakalahi ‘aki ia ‘a e feilaulau tu‘u ma‘u mo hono kinaki (tokanga ke nau ta‘emele), mo honau kava.