Read KO E TOH TAPU KATOA TONGA NŌMIPA 30 Bible Online

NŌMIPA 30 - KO E TOH TAPU KATOA TONGA bible

NŌMIPA 30

¹PEA lea ‘a Mōsese ki he hou‘eiki ‘o e ngaahi matakali ‘o ha‘a ‘Isileli, ‘o pehē,

²Ko eni ‘a e me‘a kuo tu‘utu‘uni ‘e Sihova.

³Ka ai ha tangata kuo ne fai ha tukumo‘ui kia Sihova, pe kuo ne fuakava ke ha‘i hono laumālie ‘aki ha tapu, ‘e ‘ikai te ne maumau ‘ene lea; te ne fai ‘a e me‘a kotoa kuo pu‘aki ‘e hono ngutu.

⁴Pea kapau kuo fai ‘e ha fefine ha tukumo‘ui kia Sihova, ‘o ne fokotu‘u ha tapu kiate ia ‘i he fale ‘o ‘ene tamai ‘i he‘ene kei finemui;

⁵pea ‘oku fanongo ‘e he‘ene tamai ki he‘ene tukumo‘ui mo e tapu kuo ne ha‘i ‘aki hono laumālie, pea ‘oku fakalongo pē ‘e he‘ene tangata‘eiki: pea ‘e toki tu‘u pē ‘ene tukumo‘ui; mo e hā fua ha tapu kuo ne fokotu‘u ki hono laumālie, kae tu‘u pē.

⁶Ka ‘o kapau ‘e ta‘ofi ia ‘e he tangata‘eiki ‘i he ‘aho ‘oku ne fanongo ki ai, ‘e ‘ikai tu‘u ha‘ane tukumo‘ui, pe ko e tapu kuo ne ha‘i ‘aki hono laumālie; pea ‘e fakamolemole ia ‘e Sihova, koe‘uhi na‘e ta‘ofi ia ‘e he‘ene tamai.

⁷Pea kapau kuo ne momo‘i alafia; ‘osi, ‘oku ai ‘ene tukumo‘ui, pe ha ‘ohonoa hono ngutu, ‘o ne fokotu‘u ha tapu ki hono laumālie;

⁸pea ka fanongo ki ai ‘a e tangata, ‘o ‘ikai te ne lea ki ai ‘i he ‘aho ‘o ‘ene fanongo ki ai, pea ‘e toki tu‘u ‘ene tukumo‘ui; pea ko e tapu kuo ne fokotu‘u ki hono laumālie ‘e tu‘u ia.

⁹Ka ‘o kapau ‘e ta‘ofi ia ‘e he tangata ‘i he ‘aho na‘a ne fanongo ki ai, pea ko ‘ene vete ia ‘a e tukumo‘ui ‘oku ‘iate ia mo e papūnoa ‘a hono ngutu, ‘a ia kuo ne ha‘i ‘aki hono laumālie: pea ‘e fakamolemole ia ‘e Sihova.

¹⁰Ka ko e tukumo‘ui ‘a ha uitou, pe ko e fefine kuo vete, pe ko e hā ‘a e me‘a kuo ke ha‘i ‘aki hono laumālie, ‘e ‘iate ia ai pē.

¹¹Pea kapau na‘e fai ‘e he fefine ‘a e tukumo‘ui ‘i he fale ‘o hono husepāniti, pe na‘a ne fokotu‘u ha tapu ki hono laumālie, ‘o fuakava,

¹²kapau na‘e fanongo ki ai ‘e hono husepāniti, ‘o ne fakalongo pē, ‘o ‘ikai te ne ta‘ofi ia; pea ‘e toki tu‘u ‘ene tukumo‘ui kotoa pē, mo e hā fua ha me‘a tapu na‘a ne ha‘i ‘aki hono laumālie ‘e tu‘u ia.

¹³Ka ‘o kapau na‘e mātu‘aki vete ia ‘e hono husepāniti ‘i he ‘aho na‘a ne fanongo ki ai; pea ‘e ‘ikai tu‘u ‘a e me‘a na‘e pu‘aki ‘e hono ngutu: pe ko ha tukumo‘ui pe ko ha tapu ki hono laumālie ‘e ‘ikai tu‘u; kuo vete ia ‘e hono husepāniti; pea ‘e fakamolemole ia ‘e Sihova.

¹⁴‘Ilonga ha tukumo‘ui, pea ‘ilonga ha tapu kuo ne fuakava ki ai ke fakamamahi ‘aki hono laumālie, ko hono husepāniti ‘e tu‘u ai, pea ko hono husepāniti ‘e vete ai.

¹⁵Ka ‘o kapau ‘e fakalongo ‘e hono husepāniti, ‘o ‘ikai ha lea ki ai mei he ‘aho ki he ‘aho, pea ko ‘ene fokotu‘u ia ‘ene ngaahi tukumo‘ui, pe ko e hā fua ha tapu ‘oku ‘iate ia: ‘oku ne fakapapau ia, koe‘uhi na‘e ‘ikai te ne lea kiate ia ‘i he ‘aho na‘a ne fanongo ki ai.

¹⁶Ka ‘o kapau te ne ki‘i ta‘ofi ia kimui, ka na‘a ne fanongo ki ai, pea te ne fua ‘a e hia ‘a e fefine.

¹⁷Ko eni ia ‘a e ngaahi tu‘utu‘uni na‘e fekau ‘e Sihova kia Mōsese, ki he vā ‘o e tangata mo hono uaifi, mo e vā ‘o e tangata mo hono ‘ōfefine, ‘oku kei finemui pea nofo ‘i he fale ‘o ‘ene tamai.