Read KO E TOH TAPU KATOA TONGA NŌMIPA 31 Bible Online

NŌMIPA 31 - KO E TOH TAPU KATOA TONGA bible

NŌMIPA 31

¹PEA folofola ‘a Sihova kia Mōsese, ‘o pehē,

²Te ke mātu‘aki sauni ‘a ha‘a ‘Isileli ki he kau Mitiani: pea hili ia ‘e ului koe ki ho kakai.

³Pea lea ‘a Mōsese ki he kakai, ‘o pehē, Mou teuteu hamou ni‘ihi ki he tau ke nau ‘alu ‘o tau‘i ‘a Mitiani, ke feia ‘a e sauni ‘a Sihova ki Mitiani.

⁴Te mou fekau atu ki he tau ha toko taha afe mei he matakali takitaha ‘o ‘Isileli.

⁵Ko ia, na‘e vahe‘i mei he ngaahi toko afe ‘o ‘Isileli ha taha afe mei he matakali; ko e toko taha mano mā toko ua afe kuo ‘osi sāuni ki he tau.

⁶Pea fekau atu kinautolu ‘e Mōsese ki he tau, ‘a e taha afe mei he matakali, ‘a kinautolu mo Finiasi ko e foha ‘o ‘Eliesa taula‘eiki, ke ‘alu ki he tau; pea ne to‘o ‘a e nāunau tapu, ‘io, ‘a e ongo talupite na‘e fai‘aki ‘a e ifi faka-lali-pakola.

⁷Pea na‘a nau tau‘i ‘a Mitiani, ‘o hangē ko e fekau ‘a e ‘Eiki kia Mōsese; pea na‘a nau tāmate‘i ‘a e tangata kotoa pē.

⁸Pea ko e ngaahi tu‘i Mitiani na‘a nau tāmate‘i — taha kehe kinautolu na‘e tō — ‘a ‘Evi, mo Lēkemi, mo Siuli, mo Hua, mo Lepa, ko e nima‘i tu‘i Mitiani: ko Pēlami foki ko e foha ‘o Peoli na‘a nau tāmate‘i ‘aki ‘a e heletā.

⁹Pea na‘e taki pōpula ‘e ha‘a ‘Isileli ‘a e kau fefine Mitiani mo ‘enau tamaiki; pea ko ‘enau monumanu mo ‘enau nga‘oto‘ota na‘a nau vete.

¹⁰Pea nau tutu ‘a e ngaahi kolo kuo nau nofo ki ai mo honau ngaahi ‘apitanga.

¹¹Pea na‘a nau ‘ave ‘a e vete kotoa, ‘a e koloa mo e me‘a mo‘ui, pe ko e tangata, pe ko e manu.

¹²Pea na‘a nau ‘omi ‘a e kau pōpula mo e monumanu mo e koloa kia Mōsese mo ‘Eliesa taula‘eiki mo e fakataha ‘o ha‘a ‘Isileli, ki he ‘apitanga ‘i ‘Alapā-Moape, ‘a ia ‘oku ‘i he ve‘e Soatani, ‘o hanga ki Sielikō.

¹³Pea ko Mōsese mo ‘Eliesa ko e taula‘eiki, mo e hou‘eiki kotoa pē ‘o e fakataha, na‘a nau ‘alu atu ki tu‘a ‘apitanga ke fakafetaulaki kiate kinautolu.

¹⁴Pea ‘ita ‘a Mōsese ki he hou‘eiki ‘o e hōsitē, ‘a e ngaahi kapiteni ‘o e ngaahi toko afe, mo e ngaahi kapiteni ‘o e ngaahi toko teau, na‘e foki mei he fai ‘o e tau.

¹⁵Pea me‘a ‘a Mōsese kiate kinautolu, Kuo mou tuku koā ‘a e kau fefine kotoa pē ke mo‘ui?

¹⁶Vakai, ko kinautolu ia na‘e o‘i ai ‘a ha‘a ‘Isileli ke fai hala kia Sihova ‘i he me‘a ‘a Peoli — ko e fale‘i kinautolu ‘e Pēlami — pea tō ai ‘a e mahaki faka‘auha ki he fakataha ‘a Sihova.

¹⁷Pea ko eni, te mou tāmate‘i ‘a e tamaiki tangata kotoa pē, pea ‘ilonga ha fefine kuo ne ‘ilo ha tangata te mou tāmate‘i ia.

¹⁸Ka ko e tamaiki fefine kuo ‘ikai ‘ilo ha tangata, tuku ke mo‘ui ma‘amoutolu.

¹⁹Pea mou nofo ‘i tu‘a ‘apitanga ‘o ‘aho fitu: ‘ilonga ‘a ia kuo ne tāmate‘i ha taha, pea ‘ilonga ‘a ia kuo ne lave ki ha ‘anga‘anga, ke mou fakalanu ‘i hono ‘aho tolu mo hono ‘aho fitu, ‘a kimoutolu mo ho‘omou kau pōpula.

²⁰Pea ko e me‘a ki he kofu, pe ha nāunau leta, pe ha me‘a fulufulu‘i kosi, mo ha nāunau ‘akau, te mou fai ma‘amoutolu ‘a e fakalanu.

²¹Pea me‘a ‘a ‘Eliesa na‘e taula‘eiki ki he kakai ‘o e hōsitē na‘e ‘alu ki he tau, Ko e tu‘utu‘uni ia ‘o e Lao na‘e fekau ‘e Sihova kia Mōsese.

²²Ka ‘ilonga ha koula pe ha siliva, ha kapa, ha ‘aione, ha tini, pe ha pulu,

²³ko e me‘a kotoa ‘e ala ‘ai ki he afi te mau fakalaka atu ‘i he afi, pea ‘e toki ma‘a: ka ‘e fakalanu pē ‘i he vai fakalanu angahala: pea ‘ilonga ha me‘a ‘e ‘ikai ala ‘ai ki he afi, te mou unu ki he vai.

²⁴Pea te mou fō homou kofu ‘i hono ‘aho fitu, pea te mou toki ma‘a; pea hili ia te mou hū mai ki he ‘apitanga.

²⁵Pea folofola ‘a Sihova kia Mōsese, ‘o pehē,

²⁶Lau ‘a e tokolahi ‘o e me‘a mo‘ui ‘i he vete, ‘a e tangata mo e manu, ‘e koe, mo ‘Eliesa ko e taula‘eiki, mo e hou‘eiki ‘ulumotu‘a ‘o e fakataha:

²⁷‘o vaeua ‘a e vete ki he kau pāte‘i tau na‘e ‘alu ‘i he kongakau, mo e fakataha kotoa.

²⁸Pea te ke hapai mei ai ha ‘inasi ma‘a Sihova mei he kau tau na‘e ‘alu ‘i he kongakau, ko e toko taha mei he toko nimangeau mei he kakai, mo e fanga pulu, mo e fanga ‘asi, mo e fanga sipi mo kosi:

²⁹to‘o ia mei he vaeua ko ia, ‘o ‘atu kia ‘Eliesa ko e taula‘eiki mo‘o feilaulau-hapai ‘o Sihova.

³⁰Pea mei he vaeua ‘oku ‘o ha‘a ‘Isileli, te ke to‘o ha taha ‘e puke mei he toko nimangofulu, mei he kakai, mei he fanga pulu, mei he fanga ‘asi, pea mei he fanga sipi mo kosi, ‘io, mei he monumanu kotoa, pea te ke ‘atu kinautolu ki he kau Līvai, ‘a ia ‘oku nau fai ‘a e tauhi ‘o e Tāpanekale ‘o Sihova.

³¹Pea fai ‘e Mōsese mo e taula‘eiki ko ‘Eliesa, ‘o hangē ko e fekau ‘a Sihova kia Mōsese.

³²Pea ko e lahi ‘o e vete — tukukehe ‘a e koloa na‘e vete ‘e he kau tau — na‘e toko ono kilu mā fitu mano mā nima afe ‘a e fanga sipi mo kosi,

³³pea toko fitu mano mā ua afe ‘a e fanga pulu,

³⁴pea toko ono mano mā taha afe ‘a e fanga ‘asi;

³⁵pea ko e kakai, ‘a ia ko e kau fefine te‘eki ‘ilo ki ha tangata, ko honau lau ko e toko tolu mano mā toko ua afe.

³⁶Pea ko e vaeua, ‘a ia ko e ‘inasi ‘onautolu na‘e ‘alu ‘i he kongakau, ko hono lahi ko e sipi mo kosi ‘e toko tolu kilu mā tolu mano mā fitu afe mā nimangeau:

³⁷pea ko e tukuhau kia Sihova mei he fanga sipi mo kosi ko e toko onongeau mā fitungofulu mā nima.

³⁸Pea ko e fanga pulu na‘e toko tolu mano mā ono afe; pea ko hono tukuhau kia Sihova ko e toko fitungofulu mā ua.

³⁹Pea ko e fanga ‘asi ko e toko tolu mano mā nimangeau; pea ko hono tukuhau kia Sihova ko e toko onongofulu mā taha.

⁴⁰Pea ko e kakai na‘e toko taha mano mā ono afe; pea ko hono tukuhau kia Sihova ko e toko tolungofulu mā toko ua.

⁴¹Pea ‘ange ‘e Mōsese ‘a e tukuhau, ‘a ia ko e feilaulau-hapai ‘o Sihova, kia ‘Eliesa ko e taula‘eiki, ‘o hangē ko e tu‘utu‘uni ‘a Sihova kiate ia.

⁴²Pea mei he vaeua na‘e ‘o ha‘a ‘Isileli, ‘a ia na‘e vahe‘i ‘e Mōsese mei he kau tau

⁴³(pea ko e lahi ‘o e vaeua na‘e ‘o e fakataha ko e fanga sipi mo kosi ‘e toko tolu kilu mā tolu mano mā fitu afe mā nimangeau,

⁴⁴pea tolu mano mā ano afe ‘a e fanga pulu,

⁴⁵pea tolu mano mā nimangeau ‘a e fanga ‘asi,

⁴⁶pea taha mano mā ono afe ‘a e kakai);

⁴⁷‘io, na‘e to‘o ‘e Mōsese mei he vaeua ‘o ha‘a ‘Isileli ‘a ia na‘e puke mai, ko e taha mei he toko nimangofulu, mei he kakai, pea mei he monumanu, ‘o ne ‘ange kinautolu ki he kau Līvai na‘e fai ‘a e tauhi ‘o e Tāpanekale ‘o Sihova; ‘o hangē ko e tu‘utu‘uni ‘a e ‘Eiki kiate ia.

⁴⁸Pea ‘unu‘unu mai kia Mōsese ‘a e hou‘eiki na‘e pule ki he ngaahi toko afe ‘o e hōsitē, ‘a e ngaahi kapiteni ‘o e ngaahi toko afe, mo e ngaahi kapiteni ‘o e ngaahi toko teau:

⁴⁹pea nau pehē kia Mōsese, ‘Ēī, kuo mau lau ‘a e tokolahi ‘o e kau tau ‘oku mau pule ki ai, pea kuo ‘ikai ke mole hamau toko taha.

⁵⁰Ko ia, kuo mau ha‘u mo kimautolu ha kōpano kia Sihova takitaha mei he me‘a kuo ne ma‘u, ko e ngaahi siueli koula, ‘a e vesa mo e lelu, ‘a e mama sila, ‘a e hau mo e fakama‘u, ke feia ha fakalelei ma‘a homau laumālie ‘i he ‘ao ‘o Sihova.

⁵¹Pea to‘o ‘e Mōsese mo ‘Eliesa taula‘eiki ‘a e koula meiate kinautolu, ko e koto siueli fua pē.

⁵²Pea ko e lahi ‘o e koula ‘i he feilaulau na‘e hapai kia Sihova ko e sikeli ‘e taha mano mā ono afe mā fitungeau mā nimangofulu: ko e feilaulau-hapai ia mei he ngaahi kapiteni ‘o e ngaahi toko afe mo e ngaahi kapiteni ‘o e ngaahi toko teau.

⁵³(Kuo vete ‘e he kau tau takitaha ma‘ana.)

⁵⁴Pea to‘o ‘e Mōsese mo ‘Eliesa taula‘eiki ‘a e koula mei he hou‘eiki ‘o e ngaahi toko afe mo e hou‘eiki ‘o e ngaahi toko teau, ‘o na ‘omi ia ki he Tēniti-Fe‘iloaki‘anga, mo‘o fakamanatu ‘o ha‘a ‘Isileli ‘i he ‘ao ‘o Sihova.