Read KO E TOH TAPU KATOA TONGA NŌMIPA 32 Bible Online

NŌMIPA 32 - KO E TOH TAPU KATOA TONGA bible

NŌMIPA 32

¹PEA na‘e lahi ‘a e monumanu ‘a ha‘a Lūpeni mo ha‘a Kata; ko e me‘a ko ia na‘a nau mālohi ‘aupito ai. Pea na‘a nau vakai ‘a e fonua ‘o Siasea mo Kiliati, pea tā ko e toki potu ia ki he fanga manu.

²Ko ia, na‘e ha‘u ‘a ha‘a Kata mo ha‘a Lūpeni, ‘o nau lea kia Mōsese mo ‘Eliesa ko e taula‘eiki, pea ki he hou‘eiki ‘o e fakataha, ‘o pehē,

³Ko ‘Ataloti, mo Tīponi, mo Siasea, mo Nīmila, mo Hesiponi, mo ‘Eleale.

⁴Mo Sēpami, mo Nipo, mo Peoni, ‘a e fonua na‘e te‘ia ‘e Sihova ‘i he ‘ao ‘o e fakataha ‘o ‘Isileli, ko e fonua ia ki he fanga manu, pea ‘oku monumanu‘ia ‘a ho‘o kau tamaio‘eiki ko kimautolu.

⁵Pea nau pehē, Ka kuo mau ta‘imālie ‘ofa ‘i ho ‘ao, pea ke vahe ‘a e fonua ni ki ho‘o kau tamaio‘eiki ko kimautolu ke mau tofi‘a ‘aki; ‘oua ‘e ‘ave kimautolu ki tu‘a Soatani.

⁶Pea me‘a ‘a Mōsese ki ha‘a Kata mo ha‘a Lūpeni, ‘O ‘alu koā homou kāinga ki he tau, ka mau nofo pē ‘i heni?

⁷Pea koe‘uma‘ā ho‘omou fakavaivai‘i ‘a e loto ‘o ha‘a ‘Isileli, ke nau ta‘efie laka atu ai ki he fonua kuo foaki kiate kinautolu ‘e Sihova?

⁸Na‘e pehē ‘a e fai ‘a ho‘omou ngaahi tamai, ‘i he‘eku fekau atu kinautolu mei Kētesi-panea ke asiasi ‘a e fonua.

⁹He ‘i he‘enau ‘alu hake ki he tele‘a ko ‘Esikoli, ‘o mamata ki he fonua, pea nau fakavaivai‘i ‘a e loto ‘o ha‘a ‘Isileli, ke ‘oua te nau ‘alu ki he fonua kuo foaki kiate kinautolu ‘e Sihova.

¹⁰Pea na‘e langa‘i ai ‘a e houhau ‘a Sihova ‘i he ‘aho ko ia, pea ne fuakava ‘o pehē,

¹¹Ko au ē ha‘anau sio ki he fonua na‘a ku fuakava ai kia ‘Epalahame mo ‘Aisake mo Sēkope, ‘e he kau tangata na‘e ‘alu hake mei ‘Isipite, meiate ia ‘oku uofulu ta‘u ‘o fai hake, koe‘uhi ā ‘oku ‘ikai te nau molomolomuiva‘e kiate au:

¹²ngata pē ‘ia Kēlepi ko e foha ‘o Sīfune ko e ha‘a Kēnasi, mo Siosiua ko e foha ‘o Nuni; koe‘uhi na‘a na molomolomuiva‘e kinaua ‘i he ‘Eiki.

¹³Pea na‘e langa‘i ai ‘a e houhau ‘a Sihova ki ‘Isileli, ‘o ne tuku ke nau he holo ‘i he Toafa ‘o fāngofulu ta‘u, kae ‘oua ke ‘osi‘osingamālie ‘a e to‘utangata ko ia na‘e fai kovi ‘i he ‘ao ‘o e ‘Eiki.

¹⁴Pea ko eni kuo mou tupu hake kimoutolu ko e fetongi ‘o ho‘omou ngaahi tamai, ko e hako‘i angahala, ke toe fakalahi ‘a e kakaha ‘o e houhau ‘o Sihova ki ‘Isileli.

¹⁵He kapau te mou foki mei he muimui kiate ia, pea te ne toe tuku kinautolu ‘i he Toafa, pea te mou faka‘auha ‘a e fu‘u kakai ni.

¹⁶Pea nau ‘unu‘unu kiate ia, ‘o nau pehē, Ka mau langa loto‘ā manu pē ‘i heni ki he‘emau monumanu, mo e ngaahi kolo ki he‘emau tamaiki;

¹⁷ka ko kimautolu te mau ‘ai mahafu ke vave, ke laka ‘i he ‘ao ‘o ha‘a ‘Isileli, kae‘oua ke mau ‘ave kinautolu ki honau feitu‘u, kae nofo ‘emau tamaiki ‘i he ngaahi kolo kuo ‘aa‘i telia ‘a e kakai ‘o e fonua.

¹⁸‘E ‘ikai te mau foki ki homau ngaahi ‘api kae‘oua ke ma‘u‘i ‘e ha‘a ‘Isileli takitaha hono tofi‘a.

¹⁹He ‘e ‘ikai te mau ma‘u tofi‘a mo kinautolu ‘i he kauvai ko ē ‘o Soatani, pe ki kō atu: he kuo tō homau tofi‘a ‘i he kauvai ‘o Soatani ki hahake.

²⁰Pea me‘a ‘a Mōsese kiate kinautolu, Kapau te mou fai ‘a e me‘a ko ia; kapau te mou ‘ai mahafu ke ‘alu ‘i he ‘ao ‘o Sihova ki he tau,

²¹pea a‘a ‘i Soatani ‘a kimoutolu kotoa ‘oku to‘o mahafu ‘i he ‘ao ‘o Sihova,

²²kae‘oua ke ne kapusi hono ngaahi fili mei hono ‘ao, pea fakavaivai‘i ‘a e fonua ‘i he ‘ao ‘o Sihova: pea hili ia te mou foki ka mou ta‘ehia kia Sihova mo ‘Isileli; pea ‘e hoko ‘a e fonua ni ko homou tofi‘a ‘i he ‘ao ‘o Sihova.

²³Ka ‘o kapau ‘e ‘ikai te mou fai pehē, tala atu kuo mou fai angahala kia Sihova; pea ke mou ‘ilo ‘e faifai pea pō kimoutolu ‘e ho‘omou angahala.

²⁴Mou langa kolo ma‘amoutolu ki ho‘omou tamaiki, mo e ngaahi loto‘ā manu ki ho‘omou monumanu, pea mou fai ‘a e me‘a kuo pu‘aki ‘e homou ngutu.

²⁵Pea tali ‘e ha‘a Kata mo ha‘a Lūpeni kia Mōsese, ‘o pehē, ‘E fai ‘e ho‘o kau tamaio‘eiki ko kimautolu ‘o hangē ko e tu‘utu‘uni ‘a e Feitu‘u na.

²⁶Ko ‘emau tamaiki, ko homau ngaahi uaifi, mo ‘emau monumanu kotoa, ‘e nofo hē ‘i he ngaahi kolo Kiliati:

²⁷ka ko ho‘o kau tamaio‘eiki ko kimautolu te mau laka atu ‘i he ‘ao ‘o Sihova ki he tau, ‘a kimautolu kotoa ‘oku ma‘u teu ki he tau, hangē ko e me‘a ‘a e Feitu‘u na.

²⁸Ko ia na‘e fai tu‘utu‘uni ‘iate kinautolu ‘e Mōsese, ‘o ‘atu kia ‘Eliesa ko e taula‘eiki, pea kia Siosiua ko e foha ‘o Nuni, pea ki he hou‘eiki ‘ulumotu‘a ‘o e ngaahi matakali ‘o ha‘a ‘Isileli.

²⁹Pea me‘a ‘a Mōsese kiate kinautolu, Kapau ‘e a‘a ‘i Soatani mo kimoutolu ‘a ha‘a Kata mo ha‘a Lūpeni, ‘a kinautolu kotoa kuo ‘osi sāuni ki he tau, ‘i he ‘ao ‘o Sihova, pea fakavaivai ‘a e fonua ‘i homou ‘ao: pea te mou toki foaki kiate kinautolu ‘a e fonua ‘o Kiliati mo‘onau tofi‘a.

³⁰Ka ‘o kapau ‘e ‘ikai te nau a‘a mo kimoutolu kuo ‘ai mahafu, pea te nau ma‘u tofi‘a ‘i homou lotolotonga ‘i he fonua ko Kēnani.

³¹Pea tali ‘a ha‘a Kata mo ha‘a Lūpeni ‘o pehē, Ko e me‘a kuo folofola‘aki mai ‘e Sihova ki ho‘o kau tamaio‘eiki ko kimautolu te mau fai.

³²Te mau laka atu mo ‘emau mahafu ‘i he ‘ao ‘o Sihova ki Kēnani, ka ko homau tofi‘a ‘e tō kiate kimautolu ‘i he kauvai ko eni ‘o Soatani.

³³Pea foaki ‘e Mōsese kiate kinautolu, ki ha‘a Kata, pea ki ha‘a Lūpeni, pea ki he vaeua ‘o e matakali ‘a Manase foha ‘o Siosifa, ‘a e pule‘anga ‘o Sīhoni ko e Tu‘i ‘Āmoli, pea mo e pule‘anga ‘o ‘Oki ko e Tu‘i Pēsani, ‘a e fonua, ‘io, hono ngaahi kolo na‘e tu‘u ‘i he ngaahi feitu‘u, ‘a e ngaahi kolo ‘o e fonua na‘e tu‘u takatakai ki ai.

³⁴Pea langa ‘e ha‘a Kata ‘a Tīponi, mo ‘Ataloti, mo ‘Aloeli;

³⁵mo ‘Ataloti-sofani, mo Siasea, mo Siokipeha;

³⁶mo Pete-nimila, mo Pete-hālani: ko e ngaahi kolo ‘aa‘i, mo e ngaahi loto‘ā manu.

³⁷Pea langa ‘e ha‘a Lūpeni ‘a Hesiponi mo ‘Eleale, pea mo Kiliataimi;

³⁸pea mo Nipo, pea mo Peali-meoni (ka na‘e liliu honau hingoa), pea mo Sīpima; pea nau fakahingoa fo‘ou ‘a e ngaahi kolo na‘a nau langa.

³⁹Pea ‘alu ‘a e hako ‘o Mākili foha ‘o Manase ki Kiliati, ‘o nau puke ia, ‘o nau kapusi ‘a e kau ‘Āmoli na‘e ‘i ai.

⁴⁰Pea foaki ‘e Mōsese ‘a Kiliati kia Mākili ko e hako ‘o Manase, pea na‘a ne nofo ai.

⁴¹Pea ko Siaili ko e hako ‘o Manase na‘a ne ‘alu ‘o puke hono ngaahi kolo, pea ne fakahingoa kinautolu ko e ‘ū-vilisi-‘o Siaili.

⁴²Pea ‘alu ‘a Nopa, ‘o puke ‘a Kēnati mo hono ngaahi kolo fakaongo, pea ne fakahingoa ia kiate ia, ko Nopa.