Read KO E TOH TAPU KATOA TONGA NŌMIPA 33 Bible Online

NŌMIPA 33 - KO E TOH TAPU KATOA TONGA bible

NŌMIPA 33

¹KO eni ‘a e ngaahi fononga ‘o ha‘a ‘Isileli ‘i he‘enau ‘alu atu mei ‘Isipite, fakakongakau, ‘o taki kinautolu ‘e Mōsese mo ‘Ēlone.

²Pea na‘e tohi ‘e Mōsese ‘i he fekau ‘a Sihova ‘a ‘enau ngaahi hiki fononga ‘i he‘enau ‘alu atu: pea ko eni ia ‘a e ngaahi hiki fononga ‘i he‘enau ‘alu.

³Pea nau hiki mei Lamesisi ‘i he ‘uluaki māhina, ‘i hono ‘aho hongofulu mā nima ‘o e ‘uluaki māhina, ‘i he pongipongi hili ‘a e Pāsova na‘e ‘alu atu ‘a ha‘a ‘Isileli, mo e nima kuo hiki tā, ‘o mamata ki ai ‘e he kakai ‘Isipite kotoa.

⁴Lolotonga ‘oku fai ‘e he kau ‘Isipite ‘a e tanu ‘enau ‘olopo‘ou tangata, ‘a ia kuo taa‘i ‘e Sihova: pea kuo fakamāumatea foki ‘e Sihova honau ngaahi ‘otua.

⁵Pea hiki ‘a ha‘a ‘Isileli mei Lamesisi, ‘o nau fokotu‘u tēniti ‘i Sūkote.

⁶Pea nau hiki mei Sūkote, ‘o fokotu‘u tēniti ‘i ‘Ētami, ‘a ia ‘oku ‘i he ve‘e toafa.

⁷Pea nau hiki mei ‘Ētami, ‘o nau afe mai ki Piheloti, ‘a ia ‘oku ‘i he potu hahake ‘o Pealisefoni, pea nau fokotu‘u tēniti ‘i he hāngai ki Mikitoli.

⁸Pea nau hiki mei he potu hahake ‘o Hēloti, ‘o nau a‘a ‘i he tahi[33] ki he toafa: pea nau ‘alu ‘i he toafa ‘o ‘Ētami ko e vaa‘i hala ‘o e ‘aho ‘e tolu, ‘o nau fokotu‘u tēniti ‘i Mala.

⁹Pea nau hiki mei Mala, ‘o nau a‘u ki ‘Ēlimi: pea na‘e tu‘u ‘i ‘Ēlimi ha matavai ‘e hongofulu mā ua, mo e fu‘u paame ‘e fitungofulu; pea nau fokotu‘u tēniti ai.

¹⁰Pea nau hiki mei ‘Ēlimi, ‘o fokotu‘u tēniti ki he Tahi Kulokula.

¹¹Pea nau hiki mei he Tahi Kulokula, ‘o fokotu‘u tēniti ‘i he Toafa ‘o Sini.

¹²Pea nau hiki mei he Toafa ‘o Sini, ‘o fokotu‘u tēniti ‘i Tōfika.

¹³Pea nau hiki mei Tōfika, ‘o fokotu‘u tēniti ‘i ‘Ālusi.

¹⁴Pea nau hiki mei ‘Ālusi, ‘o fokotu‘u tēniti ‘i Lefitimi, ‘a ia na‘e ‘ikai ai ha vai ki he inu ‘a e kakai.

¹⁵Pea nau hiki mei Lefitimi, ‘o fokotu‘u tēniti ‘i he Toafa ‘o Sainai.

¹⁶Pea nau hiki mei he Toafa ‘o Sainai, ‘o fokotu‘u tēniti ‘i Kipelote-hataava.

¹⁷Pea nau hiki mei Kipilote-hataava, ‘o fokotu‘u tēniti ‘i Heseloti.

¹⁸Pea nau hiki mei Heseloti, ‘o fokotu‘u tēniti ‘i Lītima.

¹⁹Pea nau hiki mei Lītima, ‘o fokotu‘u tēniti ‘i Līmoni-pelesi.

²⁰Pea nau hiki mei Līmoni-pelesi, ‘o fokotu‘u tēniti ‘i Līpina.

²¹Pea nau hiki mei Līpina, ‘o fokotu‘u tēniti ‘i Lisa.

²²Pea nau hiki mei Lisa, ‘o fokotu‘u tēniti ‘i Kehelata.

²³Pea nau hiki mei Kehelata, ‘o fokotu‘u tēniti ‘i he mo‘unga ko Sefa.

²⁴Pea nau hiki mei he mo‘unga ko Sefa, ‘o fokotu‘u tēniti ‘i Hālata.

²⁵Pea nau hiki mei Hālata, ‘o fokotu‘u tēniti ‘i Maka-heloti.

²⁶Pea nau hiki mei Maka-heloti, ‘o fokotu‘u tēniti ‘i Tāhati.

²⁷Pea nau hiki mei Tāhati, ‘o fokotu‘u tēniti ‘i Tela.

²⁸Pea nau hiki mei Tela, ‘o fokotu‘u tēniti ‘i Mīteka.

²⁹Pea nau hiki mei Mīteka, ‘o fokotu‘u tēniti ‘i Hasimona.

³⁰Pea nau hiki mei Hasimona, ‘o fokotu‘u tēniti ‘i Moseloti.

³¹Pea nau hiki mei Moseloti, ‘o fokotu‘u tēniti ‘i Peni-siakani.

³²Pea nau hiki mei Peni-siakani, ‘o fokotu‘u tēniti ‘i Hoa-hakitikati.

³³Pea nau hiki mei Hoa-hakitikati, ‘o fokotu‘u tēniti ‘i Siotipata.

³⁴Pea nau hiki mei Siotipata, ‘o fokotu‘u tēniti ‘i ‘Apilona.

³⁵Pea nau hiki mei ‘Apilona, ‘o fokotu‘u tēniti ‘i ‘Esionikepa.

³⁶Pea nau hiki mei ‘Esionikepa, ‘o fokotu‘u tēniti ‘i he Toafa ‘o Sini (ko Kētesi ia).

³⁷Pea nau hiki mei Kētesi, ‘o fokotu‘u tēniti ‘i he mo‘unga ko Hoa, ‘i he tafafonua ‘o ‘Ītomi.

³⁸Pea ‘alu hake ‘a ‘Ēlone ko e taula‘eiki ki he mo‘unga ko Hoa, ‘i he fekau ‘a Sihova, ‘o ne pekia ai, ‘i hono fāngofulu‘i ta‘u ‘o e ‘alu ‘a ha‘a ‘Isileli mei ‘Isipite, ‘i hono nima ‘o e māhina mo e ‘uluaki ‘aho ‘o e māhina.

³⁹Pea na‘e fe‘unga ‘a ‘Ēlone mo e ta‘u ‘e teau mā uofulu mā tolu ‘i he‘ene pekia ‘i he mo‘unga ko Hoa.

⁴⁰Pea ko Tu‘i ‘Ālati ko e ‘eiki Kēnani na‘e nofo ‘i he feitu‘u ko Tonga ‘i he fonua ko Kēnani, na‘a ne fanongo ki he ha‘u ‘a ha‘a ‘Isileli.

⁴¹Pea nau hiki mei he mo‘unga ko Hoa, ‘o fokotu‘u tēniti ‘i Salamona.

⁴²Pea nau hiki mei Salamona, ‘o fokotu‘u tēniti ‘i Pūnoni.

⁴³Pea nau hiki mei Pūnoni, ‘o fokotu‘u tēniti ‘i ‘Ōpote.

⁴⁴Pea nau hiki mei ‘Ōpote, ‘o fokotu‘u tēniti ‘i I‘i-‘apalemi ‘i he tafafonua ‘o Moape.

⁴⁵Pea nau hiki mei I‘i-‘apalemi, ‘o nau fokotu‘u tēniti ‘i Tīponi-kata.

⁴⁶Pea nau hiki mei Tīponi-kata, ‘o fokotu‘u tēniti ‘i ‘Alamoni-tipilataimi.

⁴⁷Pea nau hiki mei ‘Alamoni-tipilataimi, ‘o fokotu‘u tēniti ‘i he ‘otu mo‘unga ‘o ‘Apalemi, ‘i he potu hahake ‘o Nipo.

⁴⁸Pea nau hiki mei he ngaahi mo‘unga ‘o ‘Apalemi, ‘o nau fokotu‘u tēniti ‘i ‘Alapā-Moape, ‘i he ve‘e Soatani fe‘unga mo Sielikō.

⁴⁹Pea nau fokotu‘u tēniti ki Soatani mei Pete-sisimoti, ‘o a‘u ki ‘Ēpeli-sītimi ‘i ‘Alapā-Moape.

⁵⁰Pea folofola ‘a e ‘Eiki kia Mōsese ‘i ‘Alape-Moape, ‘i he ve‘e Soatani fe‘unga mo Sielikō, ‘o pehē,

⁵¹Lea ki ha‘a ‘Isileli, pea ke tala kiate kinautolu, Ka mou ka laka atu ‘i Soatani ki he fonua ko Kēnani,

⁵²pea te mou kapusi ‘a e kakai kotoa ‘o e fonua mei homou ‘ao, pea te mou faka‘auha ‘enau ngaahi maka tongitongi kotoa, pea faka‘auha ‘enau ngaahi ‘īmisi kuo haka, mo holoki ‘enau ngaahi sia.

⁵³Pea te mou puke ‘a e fonua ‘o nofo ai, he kuo u foaki kiate kimoutolu ‘a e fonua te mou ma‘u.

⁵⁴Pea te mou tufa ‘a e fonua ‘i he talotalo, ‘o fakatatau ki homou ngaahi fāmili; ki he tokolahi te mou vahe tofi‘a lahi, pea ki he toko si‘i te mou vahe tofi‘a si‘i: ko e me‘a ‘e tonu ki ha taha ‘i he talotalo ‘e ‘o‘ona pē ia; ‘e fakamatakali pē ho‘omou ma‘u tofi‘a.

⁵⁵Pea kapau ‘e ‘ikai te mou kapusi kinautolu ‘oku nofo ‘i he fonua mei homou ‘ao, pea ko kinautolu ‘oku mou fakatoe te nau hoko ko e ngaahi tala ‘i homou mata, mo e ngaahi tolounua ‘i homou vakavaka, pea te nau fakakina kimoutolu ‘i he fonua ‘oku mou nofo ki ai.

⁵⁶Pea ‘e iku pehē, ko e me‘a na‘a ku fakakaukau ke fai kiate kinautolu te u fai kiate kimoutolu.