Read KO E TOH TAPU KATOA TONGA NŌMIPA 34 Bible Online

NŌMIPA 34 - KO E TOH TAPU KATOA TONGA bible

NŌMIPA 34

¹PEA folofola ‘a Sihova kia Mōsese, ‘o pehē,

²Ke ke tu‘utu‘uni ‘a ha‘a ‘Isileli, ‘o tala kiate kinautolu, Ka mou ka a‘u ki Kēnani, ko eni ‘a e fonua ‘e tō kiate kimoutolu ke tofi‘a ‘aki, ko e fonua ‘o Kēnani ‘i hono ngaahi kau‘ā.

³Pea ko homou tuliki saute ‘e fai mei he Toafa ‘o Sini ‘i he tafa‘aki ‘o ‘Ītomi, pea ko homou kau‘ā saute ‘e kamata mei he taupotu hahake ‘o e Tahi Māsima;

⁴pea ‘e takai homou kau‘ā mei he tonga ‘i he hakenga ‘o ‘Akelapimi, ‘o ‘asi atu ki Sini: pea ko hono ngata‘anga mei he saute ‘a Kētesipanea, pea ‘e ‘asi atu ki Hasaliatali, ‘o laka atu ki ‘Asimona:

⁵pea ‘e takai ‘a e kau‘ā mei ‘Asimona ki he vai ‘o ‘Isipite, pea tū‘ulu ai ki tahi.

⁶Pea ko homou kau‘ā lulunga ko e Tahi Lahi mo hono matāfonua: ko homou kau‘ā lulunga ia.

⁷Pea ko eni homou kau‘ā fakatokelau, te mou kamata mei he Tahi Lahi, ‘o kinikini atu ki he mo‘unga ko Hoa:

⁸mei he mo‘unga ko Hoa te mou kinikini atu ki he Hū‘anga ki Hēmati; kae tū‘ulu ‘a e kau‘ā ki Sētata, ‘o ‘alu atu ki Sifiloni, ‘o tū‘ulu ki Hāsali-‘einani:

⁹ko homou kau‘ā fakatokelau ia.

¹⁰Pea te mou kinikini homou kau‘ā hahake mei Hāsali-‘einani ki Sēfami:

¹¹pea ‘e hifo ‘a e kau‘ā mei Sēfami ki Līpila ‘i he potu hahake ‘o ‘Eni, pea ‘e hifo ‘a e kau‘ā, ‘o lave ki he tuliki hahake ‘o e Tahi Kineleti,

¹²pea hifo ‘a e kau‘ā ki Soatani, ‘o tū‘ulu ki he Tahi Māsima: ko eni homou fonua, ‘a hono ngaahi kau‘ā takatakai.

¹³Pea tu‘utu‘uni ‘e Mōsese ‘a ha‘a ‘Isileli, ‘o pehē, Ko eni ‘a e fonua te mou vahe tofi‘a ai ‘i he talotalo, ‘a ia kuo fekau ‘e Sihova ke ‘atu ki he matakali ‘e hiva mo e vaeua ‘o e matakali:

¹⁴he ko e matakali ‘o ha‘a Lūpeni, mo e matakali ‘o ha‘a Kata, kuo nau ma‘u honau tofi‘a ‘o faka‘ulumotu‘a, mo e vaeua foki ‘o e matakali ‘o Manase:

¹⁵ko e matakali ‘e ua mo e vaeua ‘o e matakali kuo nau ma‘u honau tofi‘a ‘i he kauvai hahake ‘o Soatani-Sielikō ki he hopo‘anga la‘ā.

¹⁶Pea folofola ‘a Sihova kia Mōsese, ‘o pehē,

¹⁷Ko eni ‘a e hingoa ‘o e tu‘unga me‘a te nau vahe tofi‘a kiate kimoutolu: ko ‘Eliesa ko e taula‘eiki, mo Siosiua ko e foha ‘o Nuni.

¹⁸Pea te mou to‘o ha ‘eiki ‘e taha mei he matakali takitaha ke kau ‘i he vahe tofi‘a.

¹⁹Pea ko e hingoa eni ‘o e tu‘unga me‘a: mei he matakali ‘o Siuta, ko Kēlepi ko e foha ‘o Sīfune.

²⁰Pea mei he matakali ‘o ha‘a Simione, ko Sāmiuela foha ‘o ‘Amihuti.

²¹Mei he matakali ‘o Penisimani, ko ‘Elitati foha ‘o Kisiloni.

²²Pea mei he matakali ‘o ha‘a Tani ha ‘eiki, ko Puki foha ‘o ‘Iokeli.

²³Mei he hako ‘o Siosifa: mei he matakali ‘o ha‘a Manase ha ‘eiki, ko Hanieli foha ‘o ‘Ēfoti:

²⁴pea mei he matakali ‘o ha‘a ‘Ifalemi ha ‘eiki, ko Kemueli foha ‘o Sifitani.

²⁵Pea mei he matakali ‘o ha‘a Sepulone ha ‘eiki ko ‘Elisafani foha ‘o Pa‘anaki.

²⁶Pea mei he matakali ‘o ha‘a ‘Īsaka ha ‘eiki, ko Palatieli foha ‘o ‘Āsani.

²⁷Pea mei he matakali ‘o ha‘a ‘Āseli ha ‘eiki, ko ‘Ahihuti foha ‘o Sēlomi.

²⁸Pea mei he matakali ‘o ha‘a Nafitalai ha ‘eiki, ko Peta-heli foha ‘o ‘Amihuti.

²⁹Ko kinautolu ia na‘e tu‘utu‘uni ‘e he ‘Eiki ke vahe tofi‘a ki ha‘a ‘Isileli ‘i he fonua ko Kēnani.