Read KO E TOH TAPU KATOA TONGA NŌMIPA 35 Bible Online

NŌMIPA 35 - KO E TOH TAPU KATOA TONGA bible

NŌMIPA 35

¹PEA folofola ‘a Sihova kia Mōsese ‘i ‘Alapā-Moape ‘i ve‘e Soatani-Sielikō, ‘o pehē,

²Fekau ‘a ha‘a ‘Isileli ke nau foaki ki he kau Līvai mei honau tofi‘a ‘e tō ha ngaahi kolo ke nau nofo ai; pea te mou foaki foki ki he kau Līvai ha ngaahi ‘api takatakai ki honau ngaahi kolo.

³Pea ko e ngaahi kolo te nau ma‘u ke nofo ai, pea ko e ngaahi ‘api te nau ma‘u ki he‘enau fanga manu lalahi, pea ki he‘enau koloa, ‘io, ‘a ‘enau monumanu kotoa.

⁴Pea ko e lahi ‘o e ‘api tu‘a kolo te mou ‘atu ki he kau Līvai ‘e mole mei he ‘ā ‘o e kolo ko e kiupite ‘e taha afe takatakai.

⁵Pea te mou fua ‘i tua‘ā ki hono tapa hahake ‘a e kiupite ‘e ua afe, pea ki hono tapa tonga ko e kiupite ‘e ua afe, pea ki hono tapa lulunga ko e kiupite ‘e ua afe, pea ki hono tapa tokelau ko e kiupite ‘e ua afe: kae tu‘u loto ‘a e kolo. Ko honau ngaahi ‘api tu‘a kolo ia.

⁶Pea ko e ngaahi kolo te nau ‘atu ki he kau Līvai — ko e ono‘i kolo hūfanga, ‘a ia te mou tuku ke hola ki ai ‘a e fakapō, pea te mou fakalahi ‘aki ha kolo ‘e fāngofulu mā ua kehe.

⁷Ko e lau kātoa ‘o e ngaahi kolo te mou ‘atu ki he kau Līvai ko e kolo ‘e fāngofulu mā valu: ‘a kinautolu mo honau ngaahi ‘api tu‘a kolo.

⁸Pea ko e me‘a ki he ngaahi kolo te mou ‘atu mei he tofi‘a ‘o ha‘a ‘Isileli, te mou ‘atu lahi mei he ma‘u lahi, pea si‘i mei he ma‘u si‘i: ‘e taki vahe mei hono ngaahi kolo ma‘a e kau Līvai, ‘o fakatatau ki hono tofi‘a kuo ne ma‘u.

⁹Pea folofola ‘a Sihova kia Mōsese, ‘o pehē,

¹⁰Lea ki ha‘a ‘Isileli, ‘o tala kiate kinautolu, Ka mou ka laka atu ‘i Soatani ki he fonua ko Kēnani,

¹¹pea te mou vahe‘i hamou ngaahi kolo mo kolo-hūfanga, ke hola ki ai ‘a e fakapō kuo ne te‘ia ha taha ‘i he fāinoa.

¹²Pea ko e ngaahi kolo ko ia ko homou hūfanga mei he koeli, ke ‘oua na‘a mate ‘a e fakapō kae‘oua ke ne tu‘u ‘i he ‘ao ‘o e fakataha ke fakamaau.

¹³Pea ko e ngaahi kolo te mou ‘atu ko homou ono‘i kolo-hūfanga ia.

¹⁴Ko e tolu te mou ‘atu ‘i tu‘a Soatani, pea ko e kolo ‘e tolu te mou ‘atu ‘i Kēnani: ko e ngaahi kolo-hūfanga ia.

¹⁵Ko e ono‘i kolo ko ē ko e hūfanga ia ma‘a ha‘a ‘Isileli, mo e muli, mo ia ‘oku ‘āunofo ‘iate kinautolu, ke hola ki ai, ‘a ia kuo ne te‘ia ha taha ‘i he fāinoa.

¹⁶Ka ‘o kapau na‘a ne taa‘i ia ‘aki ha me‘a ukamea, ‘o ne pekia, ko e fakapō ia: ‘e mātu‘aki tāmate‘i ‘a e fakapō.

¹⁷Pea kapau na‘a ne taa‘i ia ‘aki ha maka ‘oku ne to‘o, ka ko e me‘a ‘oku ngali mate ai ha taha, pea ne pekia, ko e fakapō ia: ‘e mātu‘aki tāmate‘i ‘a e fakapō.

¹⁸Pea kapau na‘a ne taa‘i ia ‘aki ha ‘akau ‘oku ne to‘o, ‘a ia ko e me‘a ‘e ngali mate ai ha taha, pea ne pekia, ko e fakapō ia: ‘e mate tāmate‘i ‘a e fakapō.

¹⁹‘E tāmate‘i ‘a e fakapō ‘e he koeli tongitoto: ka ne ka fetaulaki mo ia te ne tāmate‘i.

²⁰Pea kapau na‘a ne fehi‘a ki ai, ‘o ne velo‘i, pe toitoi ‘o lisingi, ‘o ne pekia;

²¹pe na‘a ne fili ‘aki ia, ‘o ne tuki‘i, ‘o ne pekia: ‘e mate tāmate‘i ‘a ia na‘a ne fai ‘a e tā; ko e fakapō ia: ko e koeli tongitoto te ne tāmate‘i ‘a e fakapō ‘oka ne ka fetaulaki mo ia.

²²Ka ‘o kapau na‘a ne velo‘i ia fakafokifā, ta‘e te ne fili ‘aki ia; pe na‘a ne lisingi ia ‘aki ha me‘a, ka na‘e ‘ikai te ne toitoi ki ai;

²³pe na‘a ne fai‘aki ha maka ‘e ngali mate ai ha taha, ka na‘e ‘ikai te ne sio kiate ia, ka ne lī pē ‘o tau kiate ia, ‘o ne pekia; ka na‘e ‘ikai ko hono fili ia, pea na‘e ‘ikai te ne feinga ke fai ha kovi ki ai;

²⁴pea ‘e toki fakamaau ‘e he fakataha ‘i he vaha‘a ‘o ia na‘a ne tā pea mo e koeli tongitoto, ‘o fakatatau ki he ngaahi kupu‘i konisitūtone ko eni:

²⁵pea ‘e fakahaofi ‘e he fakataha ‘a e fakapō mei he nima ‘o e koeli tongitoto, pea te nau fakafoki ia ki hono kolo-hūfanga ‘a ia ne ne hola ki ai, pea te ne nofo ai ‘o a‘u ki he pekia ‘a e taula‘eiki-lahi, ‘a ia kuo pani ‘aki ‘a e lolo tapu.

²⁶Ka ‘o kapau ‘e momo‘i ‘alu ‘a e fakapō ki he tu‘a laine ‘o hono kolo-hūfanga, ‘a ia kuo ne hola ki ai;

²⁷pea ma‘u ia ‘e he koeli tongitoto ‘i he tu‘a laine ‘o hono kolo-hūfanga, pea ka tāmate‘i ia ‘e koeli tongitoto; ‘e ‘ikai lau ia ko e fakapō:

²⁸koe‘uhi na‘e totonu ke ne nofo ‘i he kolo-hūfanga ‘o a‘u ki he pekia ‘a e taula‘eiki lahi: ka hili ‘a e pekia ‘a e taula‘eiki lahi, pea ‘e toki foki ‘a e fakapō ki he fonua ‘oku tu‘u ai hono tofi‘a.

²⁹Pea ko e ngaahi me‘a ko ia ko e tu‘utu‘uni fakakonisitūtone kiate kimoutolu ‘i homou ngaahi tangutu‘anga kotoa pē ‘o laui to‘utangata.

³⁰‘Ilonga ‘a ia ‘oku ne te‘ia ha toko taha, ‘e tāmate‘i ‘a e fakapō ‘i he fakamo‘oni ‘a ha ni‘ihi, ka ‘e ‘ikai fakamāumatea ha taha ‘i he fakamo‘oni ‘a ha toko taha pē.

³¹Pea ‘e ‘ikai te mou tali totongi ke mo‘ui ai ‘a e fakapō, ‘a ia kuo fakamāumatea, ka ‘e mātu‘aki tāmate‘i ia.

³²Pea ‘e ‘ikai te mou tali totongi ma‘ana kuo hola ki hono kolo-hūfanga ke ne foki ‘o nofo ‘i hono fonua, kae‘oua pē ke pekia ‘a e taula‘eiki.

³³‘O ‘oua te mou maumau ‘a e tapu ‘o e fonua ‘oku mou ‘i ai: he ko e fakapō ‘oku ne maumau‘i ‘a e tapu ‘o e fonua: pea ‘e ‘ikai lava ha huhu‘i ‘o e fonua mei he toto kuo lilingi ai, kae ‘aki ‘a e toto pe ‘o ia na‘a ne lilingi.

³⁴‘Io, ‘e ‘ikai te ke ‘uli‘i ‘a e kelekele ‘oku mou tangutu ai, ‘a ē ā ‘oku ou nofo fonua ai au: he ko au Sihova ‘oku ou lotolotoi ‘i ha‘a ‘Isileli.