Read KO E TOH TAPU KATOA TONGA NŌMIPA 36 Bible Online

NŌMIPA 36 - KO E TOH TAPU KATOA TONGA bible

NŌMIPA 36

¹PEA na‘e fe‘unu‘i mai ‘a e hou‘eiki ‘ulumotu‘a ‘i he fāmili ‘o ha‘a Kiliati, foha ‘o Mākili, ko e hoko ‘o Manase, ko e taha ‘i he ngaahi fāmili ‘o ha‘a Siosifa, pea nau lea ‘i he ‘ao ‘o Mōsese, pea ‘i he ‘ao ‘o e hou‘eiki ‘ulumotu‘a ‘o ha‘a ‘Isileli:

²pea nau pehē, Na‘e fekau ‘a e Feitu‘u na ‘e Sihova ke tufa talotalo ‘a e fonua ke tofi‘a ‘aki ‘e ha‘a ‘Isileli, pea na‘e tu‘utu‘uni ‘a e Feitu‘u na ‘e Sihova ke tuku ‘a e tofi‘a ‘o Silofehati ko homau tokoua ki he‘ene fānau fefine.

³Pea ka nau ka mali mo e hako ‘o ha matakali kehe ‘o ha‘a ‘Isileli, pea ‘e ‘ave honau tofi‘a mei he tofi‘a ‘o homau tupu‘anga, ‘o fakalahi ‘aki ‘a e tofi‘a ‘o e matakali te nau kau ki ai, pea ‘e mole ia mei homau tofi‘a kuo tō.

⁴Pea ka hoko ‘a e siupeli ki ha‘a ‘Isileli, pea ‘e toki fakahoko honau tofi‘a ki he tofi‘a ‘o e matakali ko ia te nau kau ki ai: pea ‘e mole honau tofi‘a mei he tofi‘a ‘o e matakali ‘o homau tupu‘anga.

⁵Pea tu‘utu‘uni ‘e Mōsese ‘a ha‘a ‘Isileli ‘i he fekau ‘a Sihova, ‘o pehē, ‘Oku mo‘oni pē ‘a e lau ‘a e matakali ‘o ha‘a Siosifa.

⁶Ko eni pē ‘a e me‘a kuo tu‘utu‘uni ‘e Sihova ki he fānau fefine ‘a Silofehati, Ke nau fa‘iteliha pē ha taha te nau mali, ka te nau mali pē ki ha fāmili ‘i he matakali ‘o honau tupu‘anga.

⁷Pea ‘e ‘ikai hiki ha tofi‘a ‘o ha‘a ‘Isileli mei he matakali ki he matakali: kae piki ‘e ha‘a ‘Isileli takitaha ki he tofi‘a ‘o e matakali ‘o hono tupu‘anga.

⁸Pea ‘ilonga ha fefine ‘oku ma‘u tofi‘a ‘i ha matakali ‘o ha‘a ‘Isileli, te ne nonofo mo ha taha ‘i ha fāmili ‘o e matakali ‘o hono tupu‘anga, koe‘uhi ke ma‘u ‘e ha‘a ‘Isileli takitaha ‘a e tofi‘a ‘o hono tupu‘anga.

⁹Ko ia, ‘e ‘ikai hiki ha tofi‘a mei ha matakali ki ha matakali, kae piki ‘e he ngaahi matakali ‘o ha‘a ‘Isileli takitaha ki hono tofi‘a.

¹⁰Hangē ko e tu‘utu‘uni ‘e Sihova kia Mōsese, na‘e pehē ‘a e fai ‘e he ngaahi ‘ōfefine ‘o Silofehati;

¹¹he ko Māhala, Tīlisa, mo Hōkela, mo Milika, mo Noa, ko e ngaahi ‘ōfefine ‘o Silolehati, na‘a nau mali mo e ngaahi foha ‘o e ngaahi tokoua ‘o ‘enau tamai.

¹²Na‘a nau mali ki he ngaahi fāmili ‘o ha‘a Manase, foha ‘o Siosifa, pea na‘e kau honau tofi‘a ki he matakali ‘oku ‘i ai ‘a e fāmili ‘o ‘enau tamai.

¹³Ko e ngaahi fekau ia mo e ngaahi kupu‘i konisitūtone ‘a ia na‘e tu‘utu‘uni ‘e Sihova ki ha‘a ‘Isileli, ‘o fakafai ‘ia Mōsese ‘i ‘Alapā-Moape ‘i he ve‘e Soatani-Sielikō.