Read KO E TOH TAPU KATOA TONGA NŌMIPA 5 Bible Online

NŌMIPA 5 - KO E TOH TAPU KATOA TONGA bible

NŌMIPA 5

¹PEA folofola ‘a e ‘Eiki kia Mōsese, ‘o pehē,

²Fekau ki ha‘a ‘Isileli ke nau kapusi mei he ‘apitanga ‘a kinautolu ‘oku kilia, mo ia fua pē ‘oku ‘au, mo ia ‘oku ta‘ema‘a ko ha pekia;

³pe ko ha tangata pe ko ha fefine, te mou kapusi pē ke nofo ‘i tu‘a ‘apitanga: ke ‘oua te nau ‘uli‘i honau ‘apitanga, ‘a ia ‘oku ou nofo ki honau lotolotonga.

⁴Pea fai pehē ‘e ha‘a ‘Isileli, ‘o nau kapusi kinautolu ke nofo ‘i tu‘a ‘apitanga: ‘o hangē ko e folofola ‘a Sihova kia Mōsese, na‘e pehē ‘a e fai ‘e ha‘a ‘Isileli.

⁵Pea folofola ‘a e ‘Eiki kia Mōsese, ‘o pehē,

⁶Lea ki ha‘a ‘Isileli, Ka ai ha tangata pe fefine kuo ne fai ha taha ‘o e ngaahi angahala ‘oku kau ki he vā ‘o e tangata mo e tangata, ke feia ha kākā kia Sihova;

⁷pea te nau vete ‘a e angahala kuo nau fai: pea te ne totongi ‘osi hono mo‘ua, pea te ne ‘atu kiate ia ‘oku ne mo‘ua ki ai mo hano vahe nima mōno toloi.

⁸Pea kapau ‘oku ‘ikai hano koeli ‘o e tangata ke ‘atu ki ai ‘a e totongi ‘o e mo‘ua, pea ko e totongi ‘o e mo‘ua ‘oku ‘o Sihova; pea ‘e ‘i he taula‘eiki fakataha mo e sipi tangata ‘oku fai‘aki ‘a e fakalelei ma‘ana.

⁹‘Io, ‘ilonga ha feilaulau-hapai ‘i he ngaahi me‘a kuo fakatapu ‘e ha‘a ‘Isileli, te nau ‘atu ki he taula‘eiki: ko hono ‘inasi ai pē.

¹⁰Pea ko e ngaahi me‘a fakatapu ‘a ha taha ko hono ‘inasi mo ia: ‘io, ‘ilonga ha me‘a ‘oku ‘atu ‘e ha taha ki he taula‘eiki, ‘e ‘a‘ana.

¹¹Pea folofola ‘a e ‘Eiki kia Mōsese, ‘o pehē,

¹²Lea ki ha‘a ‘Isileli, ‘o tala kiate kinautolu, Ka ai ha tangata kuo afe hono uaifi, ‘o ne kākaa‘i ia,

¹³pea kuo mohe mo ia ha tangata, ka kuo puli mei hono husepāniti ‘o fufū; pea kuo ‘uli‘i ‘a e fefine, ka ‘oku ‘ikai ha fakamo‘oni, pea na‘e ‘ikai ma‘u pau;

¹⁴ka kuo puke ‘a e tangata ‘i he fua‘a, ‘o ne fua‘a ki hono uaifi, he kuo ‘uli‘i: pea na‘a kuo ‘ikai ‘uli‘i, ka ‘oku puke ‘a e tangata ‘i he fua‘a, ‘o ne fua‘a kiate ia;

¹⁵pea ‘e toki ‘omi ‘e he tangata hono uaifi ki he taula‘eiki, pea te ne ha‘u mo ia ha kōpano ‘a e fefine, ko e vahehongofulu ‘o e efa mahoa‘a pa‘ale: ‘e ‘ikai te ne lilingi ha lolo ki ai, pe ‘ai ki ai ha laipeno; he ko e feilaulau fua‘a, ko e feilaulau fakamanatu angahala.

¹⁶Pea ‘e fakaofi mai ‘e he taula‘eiki ‘a e fefine, ‘o fokotu‘u ‘i he ‘ao ‘o Sihova:

¹⁷pea ‘e to‘o ‘e he taula‘eiki ha vai tapu ‘i ha ipu kelekele, pea te ne to‘o mo ha me‘i efu mei he faliki ‘o e Tāpanekale, ‘o ‘ai ki he vai;

¹⁸pea te ne fokotu‘u ‘a e fefine ‘i he ‘ao ‘o Sihova, pea te ne fakamafue hono lau, pea te ne tuku ki hono nima ‘a e feilaulau fakamanatu, ‘a ia ko e feilaulau fua‘a: kae to‘o ‘e he taula‘eiki ‘a e vai kona ‘oku ne ‘omi ‘a e mala.

¹⁹Pea ‘e fakafuakava ‘a e fefine ‘e he taula‘eiki he‘ene pehē ki ai, Kapau kuo ‘ikai mohe mo koe ha tangata, pea kapau ‘oku ‘ikai te ke afe mei ho husepāniti ke ‘uli‘i ‘e ha taha kehe, pea ke toki ‘atā mei he vai kona ni ‘oku ‘omi ‘a e mala.

²⁰Ka ‘o kapau kuo ke afe mei ho husepāniti, pe kuo ke ‘uli ‘i he mohe mo koe ha tangata ‘oku ‘ikai ko ho husepāniti —

²¹pea ‘e fakafuakava ‘e he taula‘eiki ‘a e fefine ha fuakava fakamala‘ia, pea te ne pehē ki he fefine, Tauange mo Sihova ke ke hoko ko e mala‘ia mo e fuakava loi ‘i he lotolotonga ‘o ho kakai, ‘i he‘ene ngaohi ho tenga ke mate, mo ho kete ke pupula.

²²Pea ko e vai kona ni ‘oku ‘omi ‘a e mala te ne hū ki ho fatu, ‘o fakapupula ho kete mo fakamate ho tenga. Pea ‘e tali ‘e he fefine, ‘Ēmeni, ‘Ēmeni.

²³Pea ‘e tohi ‘e he taula‘eiki ‘a e ngaahi talatuki ni ‘i ha tohi, pea ne toki fufulu ia ‘i he vai kona ke hū ki ai:

²⁴pea te ne fakainu ki he fefine ‘a e vai kona ‘oku ‘omi ‘a e mala: pea ‘e hū kiate ia ‘a e vai ‘oku ‘omi ‘a e mala ke kona.

²⁵Pea ‘e to‘o ‘e he taula‘eiki mei he nima ‘o e fefine ‘a e feilaulau fua‘a, pea te ne tātākalo ‘a e feilaulau ‘i he ‘ao ‘o Sihova, pea te ne ‘atu ki he ‘ōlita.

²⁶Pea ‘e to‘o ‘e he taula‘eiki ha falukunga mahoa‘a mei he feilaulau mōno fakamanatu, pea te ne tutu ‘i he ‘ōlita; pea ko e toki hili ia te ne fakainu ki he fefine ‘a e vai.

²⁷Pea hili ‘ene fakainu ‘a e vai, pea ka kuo ‘uli‘i ‘a e fefine, pea kuo ne fai kākā ki hono husepāniti, pea ‘e hū kiate ia ‘a e vai ‘oku ‘omi ‘a e mala ke kona, pea ‘e pupula hono kete, pea mate hono tenga, pea ‘e nofo ‘a e fefine mo hono kakai ko e taha mala‘ia.

²⁸Ka ‘o kapau kuo ‘ikai ‘uli‘i ‘a e fefine, pea kuo ‘atā,

²⁹pea te ne hao ‘o matu‘itu‘ia. Ko eni ‘a e lao ‘o e fua‘a, ‘oka afe ha fefine alafia ki ha tangata kehe, ‘o ‘uli‘i ai;

³⁰pe ‘oka puke ha tangata ‘i he fua‘a, pea ne fua‘a ki hono uaifi, koe‘uhi ke ne ‘omi ‘a e fefine ki he ‘ao ‘o Sihova, pea fai kiate ia ‘e he taula‘eiki ‘a e ngaahi tu‘utu‘uni ko eni.

³¹Pea ‘e ‘atā ‘a e tangata mei he kovi, ka ko e fefine ko ia te ne fua hono kovi.