Read KO E TOH TAPU KATOA TONGA NŌMIPA 6 Bible Online

NŌMIPA 6 - KO E TOH TAPU KATOA TONGA bible

NŌMIPA 6

¹PEA folofola ‘a e ‘Eiki kia Mōsese, ‘o pehē,

²Lea ki ha‘a ‘Isileli, pea tala kiate kinautolu, Ka ai ha tangata pe fefine te ne fokotu‘u hano tapu mamafa, ko e tapu nāsili, ke hunuki ia kia Sihova: te ne tapu ‘i he uaine mo e kava mālohi;

³‘e ‘ikai te ne inu ha vinika uaine, pe ha vinika kava; pea ‘ilonga ‘a e huhu‘a ‘o e kālepi ‘e ‘ikai te ne inu, pe te ne kai ‘a e kālepi mata, pe ko e kālepi fakamaemae.

⁴Lolotonga ‘ene nofo hunuki ‘e ‘ikai te ne kai ha me‘a ‘oku ngaohi ‘aki ‘a e vaine, mei he tenga ‘o a‘u ki he kili.

⁵Lolotonga ‘ene tapu ‘i he‘ene tukumo‘ui ‘e ‘ikai apo ha tele ki hono ‘ulu: lolotonga kuo te‘eki kakato ‘a e taimi ‘o ‘ene nofo hunuki kia Sihova te ne tapu: te ne tuku ke patua mo mafue ‘a e lau ‘o hono ‘ulu.

⁶Lolotonga ‘ene fakatāpui ia kia Sihova ‘e ‘ikai te ne ofi ki ha pekia.

⁷Neongo ko ‘ene tamai kuo pekia, pe ko ‘ene fa‘ē, pe tokoua, pe tuofefine, ka ‘e ‘ikai te ne fakata‘ema‘a ia; he ko e kaho ‘a hono ‘Otua ‘oku ‘i hono ‘ulu.

⁸Ko e ‘aho kotoa pē ‘o ‘ene nāsili te ne tāpuhā kia Sihova.

⁹Pea kapau ‘e mate fakafoki fā pē ha taha ‘i hono tafa‘aki, ‘o maumau ai ‘a e tapu ‘o hono ‘ulu, te ne tele hono ‘ulu ‘i he ‘aho ‘o hono fakama‘a, ‘i hono fitu ‘o e ‘aho te ne tele ia.

¹⁰Pea ‘i hono ‘aho valu te ne ‘omi ki he taula‘eiki, ki he mata Tēniti Fe‘iloaki‘anga ha ongo kulukulu pe lupe mui:

¹¹pea ‘e feia ‘e he taula‘eiki ha taha mo‘o feilaulau-angahala, mo e taha mo‘o feilaulau-mōifua, ‘o ne fai ma‘ana ‘a e lau fakalelei koe‘uhi ko ‘ene angahala ‘i he pekia, pea te ne fakatāpui hono ‘ulu ‘i he ‘aho ko ia.

¹²Pea te ne fakatāpui kia Sihova ‘a e ngaahi ‘aho na‘a ne tu‘utu‘uni te ne nāsili ai; pea te ne ‘omi ha lami tangata kuo ta‘u taha mo‘o feilaulau-halaia: pea ko e ngaahi ‘uluaki ‘aho ‘e ‘ikai lau, koe‘uhi na‘e maumau hono tapu.

¹³Pea ko eni ‘a e lao ‘o e nāsili ‘i he ‘aho ‘oku kakato ai ‘a e taimi ‘o ‘ene tapu.

¹⁴‘E ‘omi ia ki he mata Tēniti Fe‘iloaki‘anga, pea te ne ‘atu ‘ene kōpano ki he ‘Eiki, ko e lami tangata kuo taha ta‘u, ta‘ehano mele, mo‘o feilaulau-mōifua, mo e lami fefine kuo taha ta‘u, ta‘ehano mele, mo‘o feilaulau-angahala, mo e sipi tangata ta‘ehano mele mo‘o feilaulau-‘ofa:

¹⁵mo e kato mā ta‘elēvani, ko e ngaahi keke ‘elito‘i mahoa‘a kuo natu ‘aki ‘a e lolo, mo e ngaahi mā manifinifi ta‘elēvani kuo pani lolo mo hono ouau ‘o e feilaulau-me‘akai mo hono kava.

¹⁶Pea ‘e fakaofi atu ‘e he taula‘eiki ki he ‘ao ‘o Sihova, pea te ne feia ‘ene feilaulau-angahala, mo ‘ene feilaulau-mōifua;

¹⁷pea te ne feia ‘a e sipi tangata ko e feilaulau-‘ofa kia Sihova fakataha mo e kato mā ta‘elēvani: pea te ne feia foki hono feilaulau-me‘akai mo hono kava.

¹⁸Pea ‘e tele ‘e he nāsili ‘i he mata Tēniti Fe‘iloaki‘anga ‘a e lau na‘e hunuki, pea te ne to‘o hono lou‘ulu ‘o ‘ene nāsili, ‘o ne tuku ki he afi ‘oku ‘i he lalo feilaulau-‘ofa.

¹⁹Pea ‘e to‘o ‘e he taula‘eiki ‘a e alanga mu‘a ‘o e sipi tangata kuo haka, mo e keke ta‘elēvani ‘e taha mei he kato, mo ha fo‘i mā manifinifi ta‘elēvani ‘e taha, pea te ne hili ki he ongo nima ‘o e nāsili hili ‘ene tele hono hunuki:

²⁰pea ‘e tātākalo ‘aki ia ‘e he taula‘eiki mo‘o feilaulau tākalo ‘i he ‘ao ‘o Sihova (ko e me‘a ia ‘oku tapu ma‘a e taula‘eiki, fakataha mo e fatafata tākalo mo e tefito‘i alanga hapai): pea hili ia ‘e ngofua ke inu uaine ‘e he nāsili.

²¹Ko e lao ia ‘o e nāsili kuo ne fakatāpui ia, ko ‘ene kōpano ia ki he ‘Eiki koe‘uhi ko hono hunuki — tukukehe ha me‘a ange te ne lava: ka ko e lea ‘o ‘ene fakatapu, ‘a ia na‘a ne pu‘aki, te ne fai ia, ‘o fakatatau ki he lao ‘o ‘ene nāsili.

²²Pea folofola ‘a e ‘Eiki kia Mōsese, ‘o pehē,

²³Lea kia ‘Ēlone mo ‘ene fānau, ‘o pehē, Ko e anga eni ‘o ho‘omou fai ‘a e tāpuaki ‘o ha‘a ‘Isileli; te mou pehē ki ai —

²⁴ke tāpuaki‘i mai koe ‘e Sihova, mo ne tauhi‘i!

²⁵Ke fakaulo mai ‘e Sihova hono fofonga kiate koe, mo ne ‘alo ‘ofa!

²⁶Ke hāngaifofonga mai ‘a Sihova kiate koe, mo ne ‘atu ‘a e melino!

²⁷Koe‘uhi ke nau ‘ai hoku hingoa ki ha‘a ‘Isileli, ka u tāpuaki kinautolu ‘e au.