Read KO E TOH TAPU KATOA TONGA NŌMIPA 8 Bible Online

NŌMIPA 8 - KO E TOH TAPU KATOA TONGA bible

NŌMIPA 8

¹PEA folofola ‘a e ‘Eiki kia Mōsese, ‘o pehē,

²Lea kia ‘Ēlone, ‘o pehē kiate ia, ‘I ho‘o fakahā‘ele ‘a e ngaahi nge‘esi maama, ‘e fakamaama ‘e he fitu‘i maama ki he fofonga‘i Tu‘unga Maama ki ‘ao.

³Pea fai pehē ‘e ‘Ēlone; na‘a ne fakahā‘ele hono ngaahi nge‘esi maama ke fakamaama ki he fofonga‘i Tu‘unga Maama ki ‘ao, ‘o hangē ko e tu‘utu‘uni ‘a e ‘Eiki kia Mōsese.

⁴Pea ko e anga eni ‘o e ngaohi ‘o e Tu‘unga Maama; na‘e tuki koula; mei hono tu‘unga, ‘o a‘u ki hono ngaahi tangitangi na‘e tuki pē: hangē ko hono fakatātā na‘e fakahā ‘e he ‘Eiki kia Mōsese, na‘e pehē ‘ene ngaohi ‘a e Tu‘unga Maama.

⁵Pea folofola ‘a e ‘Eiki kia Mōsese, ‘o pehē.

⁶To‘o ‘a e kau Līvai mei he lotolotonga ‘o ha‘a ‘Isileli, ‘o fakama‘a kinautolu.

⁷Pea ko eni ‘a e me‘a te ke fai kiate kinautolu mo nau fakama‘a: afuhi kinautolu ‘aki ‘a e vai angahala, pea te nau tele honau sino kotoa, pea te nau fō honau kofu, mo kaukau kinautolu.

⁸Pea ke nau toki to‘o ha pulu mui, mo hono feilaulau-me‘akai, ko e ‘elito‘i mahoa‘a kuo natu ‘aki ‘a e lolo, pea te ke to‘o mo ha pulu mui ‘e taha mo‘o feilaulau-angahala.

⁹Pea te ke fakaofi ‘a e kau Līvai ki he mata Tēniti Fe‘iloaki‘anga, pea te ke tānaki ‘a e fakataha kātoa ‘o ha‘a ‘Isileli:

¹⁰pea te ke fakaofi ‘a e kau Līvai ki he ‘ao ‘o e ‘Eiki, pea ko ha‘a ‘Isileli te nau hilifaki honau nima ki he kau Līvai:

¹¹pea ‘e tākalo ‘aki ‘e ‘Ēlone ‘a e kau Līvai ‘i he ‘ao ‘o Sihova ko e feilaulau tākalo mei ha‘a ‘Isileli, ke nau nofo ke tali fatongia ki he ‘Eiki.

¹²Pea ko e kau Līvai te nau hilifaki honau nima ki he ‘ulu ‘o e ongo pulu: pea te ke feia ha taha mo‘o feilaulau-angahala, mo e taha mo‘o feilaulau-mōifua ki he ‘Eiki, ke fai‘aki ‘a e fakalelei ma‘a e kau Līvai.

¹³Pea te ke fokotu‘u ‘a e kau Līvai ‘i he ‘ao ‘o ‘Ēlone mo e ‘ao ‘o ‘ene fānau, pea te ke tākalo ‘aki kinautolu ko e feilaulau-tākalo kia Sihova.

¹⁴‘Io, te ke vavahe ‘a e kau Līvai mei he lotolotonga ‘o ha‘a ‘Isileli, pea ‘e ‘o‘oku ‘a e kau Līvai.

¹⁵Pea hili ia ‘e hū ‘a e kau Līvai ke fai ‘a e ngāue ‘o e Tēniti Fe‘iloaki‘anga, pea te ke fakama‘a kinautolu mo tākalo ‘aki kinautolu mo‘o feilaulau-tākalo.

¹⁶He kuo tuku li‘aki kinautolu kiate au mei he lotolotonga ‘o ha‘a ‘Isileli; kuo u to‘o kinautolu ma‘aku ke fetongi ‘aki ‘a e ngaahi ‘olopo‘ou, ‘a e ‘uluaki fānau tangata ‘a ha‘a ‘Isileli kātoa.

¹⁷He ‘oku ‘o‘oku ‘a e ‘uluaki fānau tangata ‘i ha‘a ‘Isileli, ‘a e tangata mo e manu fakatou‘osi: na‘a ku fakatāpui kinautolu mo‘oku ‘i he ‘aho na‘a ku taa‘i ai ‘a e ‘uluaki fānau ‘i ‘Isipite.

¹⁸Pea kuo u to‘o ‘a e kau Līvai ko e fetongi ‘o e ‘uluaki fānau ‘i ha‘a ‘Isileli,

¹⁹pea kuo u ‘atu ‘a e kau Līvai ko e foaki kia ‘Ēlone mo ‘ene fānau mei he lotolotonga ‘o ha‘a ‘Isileli, ke fai ‘a e fatongia ‘o ha‘a ‘Isileli ‘i he Tēniti Fe‘iloaki‘anga, pea ke feia ‘a e fakalelei ma‘a ha‘a ‘Isileli, pea ke ‘oua na‘a tō ha mala ki ha‘a ‘Isileli ‘i he ‘unu‘unu mai ‘a ha‘a ‘Isileli ki he Fale Tapu.

²⁰Pea fai ‘e Mōsese mo ‘Ēlone mo e fakataha kātoa ‘o ha‘a ‘Isileli ki he kau Līvai: hangē tofu pē ‘a e tu‘utu‘uni ‘a Sihova ‘i he kau Līvai, na‘e pehē ‘a e fai ‘a ha‘a ‘Isileli kiate kinautolu.

²¹Pea fai ‘e he kau Līvai ‘enau fakama‘a angahala, ‘o nau fō honau kofu; pea tākalo ‘aki kinautolu ‘e ‘Ēlone ko e feilaulau-tākalo ki he ‘ao ‘o Sihova; pea fai ‘e ‘Ēlone ‘a e fakalelei ma‘anautolu mo‘onau fakama‘a.

²²Pea hili ia na‘e hū ‘a e kau Līvai ke fai ‘enau ngāue ‘i he Tēniti Fe‘iloaki‘anga ‘i he ‘ao ‘o ‘Ēlone mo e ‘ao ‘o ‘ene fānau; hangē ko e tu‘utu‘uni ‘a Sihova kia Mōsese ‘i he kau Līvai, na‘e pehē ‘enau fai kiate kinautolu.

²³Pea folofola ‘a e ‘Eiki kia Mōsese, ‘o pehē,

²⁴Ko eni ‘a e me‘a ki he kau Līvai: ‘e kamata mei he‘enau uofulu mā nima ta‘u ‘o fai hake ‘enau hū ke tu‘u ‘i he kongakau ‘i he ngāue ‘o e Tēniti Fe‘iloaki‘anga:

²⁵pea ‘e kamata mei he‘enau nimangofulu ta‘u ‘enau nofo mei he kongakau ngāue, pea ‘e ‘ikai te nau kei ngāue:

²⁶ka te nau le‘o mo honau kāinga ‘i he Tēniti Fe‘iloaki‘anga, he fai ‘o e fakafeangai; ka ko e ngāue ‘e ‘ikai te nau fai. ‘E pehē ho‘o fai ki he kau Līvai ki hanau ngaahi nafa.