Read KO E TOH TAPU KATOA TONGA KO MAIKA 1 Bible Online

KO MAIKA 1 - KO E TOH TAPU KATOA TONGA bible

KO MAIKA 1

¹KO E folofola ‘a Sihova ‘a ia na‘e hoko kia Maika ko e tangata Moleseti ‘i he kuonga ‘o Siotame, ‘Āhasi, Hesekaia, ko e ngaahi Tu‘i Siuta, ‘a ia na‘e hā kiate ia ‘oku kau ki Samēlia mo Selusalema.

²Mou fanongo mai ā, ‘a e ngaahi kakai kātoa; tokanga mai, ‘a e fonua, mo e me‘a kotoa ‘oku ‘i ai; pea ke tu‘u mai ‘a ‘Ātonai Sihova ko e fakamo‘oni kiate kimoutolu — ‘a ‘Ātonai mei hono temipale tapu.

³He vakai, ‘oku hā‘ele mai ‘a Sihova mei hono feitu‘u, pea te ne hifo mai, ‘o mala ‘i he ngaahi potu mā‘olunga ‘o e fonua.

⁴Pea ‘e vai ‘a e ngaahi mo‘unga he‘ene tu‘u ai, pea ‘e mafahi ‘a e ngaahi tele‘a, hangē ko e uakisi ‘i he ‘ao ‘o e afi, hangē ko e vai kuo malingi ‘i ha tahifohifo.

⁵Koe‘uhi ko e faihala ‘a Sēkope ‘oku ‘i ai ‘a e fu‘u me‘a ni, pea koe‘uhi ko e ngaahi angahala ‘a e fale ‘o ‘Isileli, ‘Oku meia hai ‘a e faihala ‘a Sēkope? ‘Ikai ko Samēlia? Pea ‘oku meia hai ‘a e ngaahi sia ‘o Siuta? ‘Ikai ko Selusalema?

⁶Ko ia ne ngaohi ‘a Samēlia ko e tu‘unga maka ‘i ha tokanga ngoue, pea hangē ha vao kuo ke tō ai ha ngoue vaine: pea te u hua‘i hono ngaahi maka ki he tele‘a, pea te u tatala hono ngaahi tu‘unga.

⁷Pea ‘e momosi hono ngaahi ‘īmisi, pea ko ‘ene ngaahi to‘ongapō ‘e tutu ‘aki ‘a e afi, pea ko hono ngaahi ‘aitoli kotoa te u ngaohi ko e me‘a li‘aki: he na‘a ne tānaki ia mei he to‘ongapō ‘a e pa‘umutu, pea te nau foki ki he to‘ongapō ‘a e pa‘umutu.

⁸Ko ia te u tangi mo e ‘oiauē, Te u ‘alu ko e vetea mo e vala pē: Te u fai ‘a e tangilāulau hangē ko e fanga siakali, Pea te u tangi hangē ko e fanga ‘ositalesi

⁹He ‘oku matamatakovi hono ngaahi lavea: Seuke, kuo a‘u ‘a e me‘a ki Siuta; Kuo a‘u ki he matanikolo ‘o hoku kakai, Kuo a‘u ki Selusalema.

¹⁰‘Oua ‘e tala ki Kati: ‘I ho‘omou tēngihia, ‘oua ‘e tangi,[1] ‘I Pete-leafela,[2] tekefili he efu;[3]

¹¹Si‘i kau fefine nofo Sāfili, Laka ange fakaekimoutolu, Kuo telefua pango: Ko si‘i fefine ko Sa‘anani Kuo ‘ikai hū atu; Ko e tangilāulau ‘o Pete-ha-‘ēsili Te ne to‘o meiate kimoutolu homou tu‘u‘anga.

¹²He ko si‘i fefine ko Maloti ‘Oku nofo‘aki tali ki ha lelei: He kuo hifo ha kovi meia Sihova Ki he matanikolo ‘o Selusalema.

¹³Si‘i fefine ko Lākisi, No‘otaki ‘a e hoosi lele ki he sāliote; Ko e kamata ia ‘o e angahala ki he ta‘ahine ko Saione; He na‘e ‘ilo ‘iate koe ‘a e ngaahi faihala ‘a ‘Isileli,

¹⁴Ko ia te ke ‘ange ‘a e koloa ‘ave Ki Moleseti-kati; Ko e ngaahi fale ‘o ‘Akisipi ‘E hoko ko e vai kākā ki he ngaahi Tu‘i ‘Isileli,

¹⁵Ka te u toe ‘omi ‘a e ‘ea kiate koe, Si‘i fefine ko Mālesa; ‘E ‘alu atu ‘a e lāngilangi ‘o ‘Isileli Ki ‘Atulami.

¹⁶Ta‘ahine, fakatekefua koe, Koe‘uhi ko e fānau ‘oku ke loto‘aki: Fakalaulahi ho fangafanga hangē ko e vulitua, He kuo nau ‘alu pōpula meiate koe.