Read KO E TOH TAPU KATOA TONGA KO MAIKA 3 Bible Online

KO MAIKA 3 - KO E TOH TAPU KATOA TONGA bible

KO MAIKA 3

¹PEA U pehē, Fanongo mu‘a, ‘a e hou‘eiki ‘o Sēkope, mo e angi ‘i he fale ‘o ‘Isileli: ‘ikai ko homou taau ke ‘ilo ‘a e fakalao?

²‘a e ha‘a fehi‘a ki he lelei, mo ‘ofa ki he kovi; ‘oku to‘o ‘a e kili meiate kinautolu, mo e kakano mei honau ngaahi hui.

³‘Io, ko e fa‘ahinga kuo keina ‘a e kakano ‘o hoku kakai; pea kuo nau fohi honau kili, pea ko honau hui kuo nau fesifesi; mo tu‘utu‘u ‘o hangē ko e ‘ai ki ha kulo, ‘io, hangē ha kanomate ‘i ha sasepani.

⁴Te nau toki tautapa kia Sihova, kae ‘ikai te ne tali kinautolu: ‘io, te ne hanga kehe meiate kinautolu ‘i he taimi ko ia, koe‘uhi na‘a nau ‘ai ke kovi ‘enau ngāue.

⁵Ko e folofola eni ‘a Sihova ki he kau palōfita ‘oku takihee‘i hoku kakai; ‘a ia lolotonga ‘enau u‘usi ha me‘a ‘aki honau nifo, ‘oku nau tala melino; ka ‘o kapau ‘e ‘ikai ‘ai ‘e ha taha ha me‘a ki honau ngutu, te nau lotua leva ha tau ki he toko taha ko ia.

⁶Ko ia, ‘e hoko ‘a e pō kiate kimoutolu, ‘o ‘ikai te mou sio vīsone; ‘io, ‘e hoko ‘a e po‘uli kiate kimoutolu, ‘o ‘ikai lava ha tongafisi; pea ‘e ‘alu hifo ‘a e la‘ā ki he kau palōfita, pea ‘e fakapo‘uli ‘a e ‘aho kiate kinautolu.

⁷Pea ‘e mā ‘a e kau sio vīsone; pea ‘e kula ‘a e kau tongafisi; ‘io, te nau ‘ufi‘ufi kotoa pē honau kava: he ‘oku ‘ikai ha tali ‘a e ‘Otua.

⁸Kā, tala atu, kuo u fonu au ‘i he ivi ko e me‘a ‘i he Laumālie ‘o Sihova, pea fonu ‘i he fakamaau totonu, mo e to‘a, ke faka‘ilo kia Sēkope ‘ene faihala, pea kia ‘Isileli ‘ene maumau lao.

⁹Fanongo mu‘a ki he me‘a ni, ‘a e hou‘eiki ‘o e fale ‘o Sēkope, mo e angi ‘i he fale ‘o ‘Isileli, ‘a e fa‘ahinga ‘oku fehi‘a ki he fakalao, pea ‘oku nau piko‘i ‘a e totonu kotoa.

¹⁰‘Oku nau langa ‘a Saione ‘aki ‘a e toto, mo Selusalema ‘aki ‘a e faihala.

¹¹Ko honau hou‘eiki ‘oku sio me‘a‘ofa ‘i he fai fakamaau, pea ko hono kau taula‘eiki ‘oku faiako ko e sio vāhenga pē, pea ko hono kau palōfita ‘oku nau fakalalave ko e sio pa‘anga pē: ka ‘oku nau nofo falala kia Sihova he‘enau pehē, ‘Ikai ko hotau tokaikolo ‘a Sihova? tala‘ehai ‘e hoko ha kovi kiate kitautolu.

¹²Ko ia, ‘e keli ‘a Saione ‘o hangē ha ngoue‘anga koe‘uhi ko kimoutolu, pea ‘e hoko ‘a Selusalema koni ngaahi tuva maka, pea ko e mo‘unga ‘oku tu‘u ai ‘a e Fale ‘e hoko ko e ngaahi mā‘olunga ‘i ha vao tātā.