Read KO E TOH TAPU KATOA TONGA KO MAIKA 5 Bible Online

KO MAIKA 5 - KO E TOH TAPU KATOA TONGA bible

KO MAIKA 5

¹TŪ te ke nofo fakakongakau[13] koe, si‘i ta‘ahine tupu mei ha konga kau.[14] “Kuo ne ‘ai ke ‘ākolo‘i kitautolu.” Te nau taa‘i ‘a e fakamaau ‘o ‘Isileli ‘i hono kou‘ahe ‘aki ‘a e mātā.

²Pea ko koe, Pētelihema ‘Efalata, si‘i fau ke lau ‘i he ngaahi toko afe ‘o Siuta, ‘e ‘alu atu ha Taha meiate koe ma‘aku, ‘a ia te ne hoko ko e pule ‘o ‘Isileli; pea ko ‘ene ngaahi ‘alu ‘atu ‘oku talu mei mu‘a, mei he ngaahi ‘aho ‘o ‘ītāniti.

³Ko ia te ne tukuange kinautolu, ‘o a‘u ki he taimi ‘o e fā‘ele ‘a e fefine fā‘ele: pea ko e toe ‘o hono kāinga te nau foki ke fakataha mo ha‘a ‘Isileli.

⁴Pea te ne tu‘u, ‘o tauhi ‘i he ivi ‘o Sihova, ‘i he fotu ‘o e huafa ‘o Sihova ko hono ‘Otua: talu ai ‘enau nofo; he kuo hoko ia ‘o fotu ‘o a‘u ki he ngaahi ngata‘anga ‘o māmani.

⁵Pea ‘e hoko ‘a e toko taha ko ia ko e melino‘anga: ka ha‘u ‘a ‘Āsilia ki hotau fonua, pea ka moe‘i ‘e ia hotau ngaahi palasi, te tau toki fokotu‘u ke fai mo ia ha fitu‘i tauhi, ‘io, ha valu‘i tangata ‘oku ma‘u lakanga.[15]

⁶Pea te nau fafanga ‘a e fonua ‘o Sīlia ‘aki ‘a e heletā, mo e fonua ‘o Nimilote ‘i hono ngaahi hū‘anga ko ia; te ne[16] fakahaofi mei ‘Āsilia ‘i he‘ene ha‘u ki hotau fonua, pea ‘i he‘ene moe‘i hotau tafafonua.

⁷Pea ‘e huluni ‘a e toenga ‘o Sēkope ‘i he ngaahi kakai lahi, hangē ko ha hahau meia Sihova, hangē ko e tō ‘a e ngaahi tulutā ‘uha ki he musie: ‘a ia ‘oku ‘ikai ke fakaongo ki ha ‘eiki, pea ‘oku ‘ikai ke tali ki ha‘a lāuvale.

⁸‘E hoko foki ‘a e toenga ‘o Sēkope ki he ngaahi pule‘anga, ‘o lotolotoi ‘i he ngaahi kakai lahi, hangē ha laione ‘i he fanga manu ‘o e vao, hangē ha manu hau ‘i he ngaahi tākanga sipi mo kosi; ‘a ia, ka laka atu ia, ‘oku ne malaki mo hae, pea ‘oku ‘ikai ha taha ‘e mafakahaofi.

⁹Ke hiki tā ho nima ki ho kau fakamamahi, Pea ke tu‘usi ho ngaahi fili kotoa.

¹⁰Pea ‘e hoko ‘i he taimi ko ia — ko Sihova ia mei he Ta‘ehāmai — te u fakaeve ‘a e fanga hoosi ‘oku ‘iate koe, pea te u faka‘auha ho‘o ngaahi sāliote.

¹¹Pea te u tu‘usi ‘a e ngaahi kolo ‘o ho fonua, pea te u holoki ho ngaahi talitau‘anga kotoa:

¹²pea te u tu‘usi ‘a e toenga faituki ‘oku ke fai; pea ‘e ‘ikai toe ‘iate koe ha kau fai sausau:

¹³pea te u fakaeve ho ngaahi ‘īmisi mo ho‘o ngaahi pou tapu, ‘a ia ‘oku ‘iate koe; pea ‘e ‘ikai te ke toe hū ki he me‘a na‘e ngaohi ‘e ho nima.

¹⁴Pea te u ta‘aki ‘a e ngaahi ‘āsela ‘oku ‘iate koe, pea te u maumau ho ngaahi kolo.

¹⁵Pea te u fai sauni ‘i he ‘ita mo e kakaha ‘i he ngaahi pule‘anga ‘oku ‘ikai ke fakaongo.[17]