Read KO E TOH TAPU KATOA TONGA KO NĒHUMI 1 Bible Online

KO NĒHUMI 1 - KO E TOH TAPU KATOA TONGA bible

KO NĒHUMI 1

¹KO E kavenga ‘a Ninive mei he Ta‘ehāmai. Ko e tohi ‘o e vīsone ‘a Nēhumi ko e tangata ‘Elekosi.

²Ko e ‘Otua fua‘a mo fai sauni ‘a Sihova; Ko e taha fai sauni ‘a Sihova; Pea ko ‘ene me‘a ‘e taha ko e ‘ita kakaha. Ko e taha ‘a Sihova ‘oku ne sauni ki hono kau fakamamahi, Mo tauhi ‘ita ki hono ngaahi fili.

³Ko Sihova ko e taha tuai ki he houhau, Pea kaukaua ‘i he ivi, Pea ‘ikai ‘aupito te ne faka‘atā ‘a e halaia. Ko Sihova ‘oku ai hono founga ‘i he ‘ahiohio mo e afā, Pea ko e ngaahi ‘ao ko e efu ‘o ‘ene taulaka.

⁴Ko e taha ia ‘oku fakamana ki he tahi, ‘O fakamaha ia; ‘Io, ‘oku ne fakamātu‘u ‘a e ngaahi vaitafe kotoa: ‘Oku mahahu‘a ‘a Pēsani mo Kāmeli, Pea ‘oku mae ‘a e fisi ‘o Lepanoni.

⁵‘Oku tete ‘a e ngaahi mo‘unga he‘ene ofi mai, Pea ‘oku hoko ‘o vai ‘a e ngaahi tafungofunga; Pea ‘oku mahiki ‘a e fonua ‘i he‘ene fotu mai, ‘Io, ‘a e maama nofo‘anga, mo kinautolu kotoa ‘oku nofo ai.

⁶Ko hai te ne matu‘u ‘i he hā mai ‘ene tuputāmaki? Pea ko hai te ne matali ‘a e kakaha ‘o ‘ene houhau? ‘Oku mahua ‘ene ‘ita hangē ha afi, Pea ko e ngaahi makatu‘u ‘oku holo he‘ene ofi mai.

⁷‘Oku lelei ‘a Sihova, Ko e hūfanga ‘i he ‘aho ‘o e ‘efihia; Pea ‘oku ne ‘ilo ‘a kinautolu ‘oku hūfanga kiate ia.

⁸Ko ia te ne fakangata ‘a e potu ‘o e kolo ko ē ‘Aki ha lōmaki ‘oku mōia atu; Pea te ne tuli hono ngaahi fili[1] ki he po‘uli.

⁹Ko e hā koā ho‘omou lāutu‘u kia Sihova? ‘Ā, ko e taha ia te ne fakangata ‘aupito: pea ‘e ‘ikai ke hoko tu‘o ua ‘a e ‘efihia.

¹⁰Pea neongo ‘oku nau fefihitaki ‘o hangē ko e ‘ā talatala, pea neongo ‘enau pīponu ‘i honau huhu‘a, ‘e mātu‘aki keina kinautolu hangē ha veve kuo mōmoa mālie.

¹¹Kuo ‘alu atu meiate koe ha taha, ‘oku fakakaukau‘i ha kovi ke fai kia Sihova, ‘oku ne fale‘i me‘a faka-Pileali.

¹²Ko e folofola eni ‘a Sihova, Neongo ‘oku nau kei kakato, ‘o tokolahi ai; ka neongo ‘enau pehē, ‘e tu‘usi kinautolu pea kuo mole. Neongo kuo u fakatōkilalo‘i koe, ‘e ‘ikai te u toe fakatōkilalo‘i koe.

¹³Ko eni te u maumau ‘ene ‘ioke, ‘o to‘o meiate koe, pea te u motuhi ho ngaahi ha‘i.

¹⁴Pea ko e me‘a kiate koe kuo fai ‘e Sihova ha tu‘utu‘uni, Tū ‘e ‘ikai toe ai ha pulopula mei ho hingoa; te u tu‘usi ‘a e ‘īmisi mo e tamapua mei he fale ‘o ho ngaahi ‘otua, te u ngaohi hao fonualoto, he kuo ke ma‘ama‘a.

¹⁵Vakai ‘i he ngaahi funga mo‘unga ‘a si‘i va‘e ‘o e tala ongoongolelei, ‘o ia ‘oku fakahā ‘a e melino! ‘E Siuta, fai ho‘o ngaahi kātoanga, fakaai ho‘o ngaahi tukumo‘ui, he ‘e ‘ikai ‘aupito toe laka atu ‘iate koe ‘a e tangata faka-Pileali: kuo tu‘usi ‘aupito.