Read KO E TOH TAPU KATOA TONGA KO NĒHUMI 2 Bible Online

KO NĒHUMI 2 - KO E TOH TAPU KATOA TONGA bible

KO NĒHUMI 2

¹KUO ‘alu atu ‘a e Tama-laiki Ke fakafetaulaki kiate koe. Tauhi ‘a e talitau‘anga, Le‘o ‘a e hala, ‘Ai ke fefeka ‘a e kongaloto, Tōtōivi ho‘o fakama‘u hifo.

²He ‘oku fakafoki ‘e Sihova ‘a e lāngilangi ‘o Sēkope, Tatau mo e lāngilangi ‘o ‘Isileli: He ko e kau vete ne vete kinautolu, Pea ko honau ngaahi va‘a kuo nau maumau‘i.

³Ko e pā ‘o ‘ene kau helo kuo lanu kulokula, Ko e kau tangata to‘a ko e koto kula maama: Ko e tau sāliote ‘oku tapa afi hono ukamea ‘i he ‘aho ‘o e fakatē, Pea ‘oku ngalulululu ‘a e ‘otu tao.[2]

⁴‘Oku ‘oho fakasesele ‘a e ngaahi sāliote ‘i he hala, ‘Oku nau lele fetuiaki ‘i he ngaahi mala‘e: ‘Oku nau hā hangē ko e ngaahi tūhulu, ‘Oku nau fetapa‘aki hangē ko e ‘uhila.

⁵‘Oku manatu ‘e ia ki he‘ene tau fili: ‘Oku nau humu pē he‘enau laka; ‘Oku fakavave ē ki he ‘ā ‘o e kolo, Pea kuo fokotu‘u ‘a e mīsini faka‘ato.

⁶‘Oku fakaava ‘a e ngaahi matapā ‘o e ngaahi vaitafe, Kuo vai ‘a e palasi.

⁷Kuo pau: Kuo fakatelefua ‘a si‘i fefine;[3] Kuo ‘ohake, Pea ko ‘ene kau kaunanga ‘oku tangi ‘aulotu, Hangē ha ongoonga‘a mai ha fanga lupe, ‘O nau tuki honau fatafata.

⁸Ka ko Ninive kuo hangē ha tānekinga vai, Talu mei he‘ene ‘i ai, Ka ‘oku hola ‘a e fa‘ahinga ko ē.[4] “Tu‘u pē! tu‘u hifo!” Ka ‘oku ‘ikai ha taha ‘e kilo ki tu‘a.

⁹Mou vete ‘a e siliva, Mou vete ‘a e koula; Seuke, ‘oku ‘ikai ha ngata‘anga ‘o e koloa, ‘A e fokotu‘uniu ‘a e fa‘ahinga nāunau masani kehekehe.

¹⁰Si‘i fefine kuo ‘āngoa, mo lafulua, mo hikisania; Pea ‘oku vai ‘a e loto, Pea ‘oku fepaki ‘a e ongo tui, Pea ‘oku langa takai hono kongaloto, ‘Oku mole ‘a e melo mei he mata kotoa.

¹¹Ko e fe‘ia ‘a e nofo‘anga ‘o e fanga laione? — Lau foki ko e kaikai‘anga ia ‘o e fanga manu hau, ‘A e potu na‘e taka ai ‘a e laione, ‘A e laione fefine, ‘a e ‘uhiki‘i laione, ‘O ‘ikai ha taha ‘e mafakahoha‘asi.

¹²Na‘e lava ‘e he laione tangata ke hae ha me‘a fe‘unga mo hono ‘uhiki, ‘O ne sisina ha me‘a ma‘a ‘ene fanga fefine, ‘O ne fakafonu a‘alu hono ngaahi ‘ana, Mo hono ngaahi nofo‘anga ‘i he me‘a kuo ne hae.

¹³Ko au eni ‘oku ou fai mo koe — ko Sihova Sāpaoti ia mei he Ta‘ehāmai — pea te u tutu ‘ene tau sāliote ‘aki ‘a e afi, pea ‘e keina ‘e he heletā ho‘o fanga manu hau; pea te u tu‘usi mei māmani ho‘o fai a‘alu, pea ‘e ‘ikai toe ongona ‘a e le‘o ‘o ho‘o kau talafekau.