Read KO E TOH TAPU KATOA TONGA KO NĒHUMI 3 Bible Online

KO NĒHUMI 3 - KO E TOH TAPU KATOA TONGA bible

KO NĒHUMI 3

¹‘OIAUĒ ‘a e kolo toto‘ia! Kuo fonu ‘aupito ‘i he kākā mo e hae noa; ‘Oku ‘ikai te ne tūkua ‘ene a‘alu.

²Sī! ‘oku ongoonga‘a mai ‘a e uipi, Pea ‘oku ongoonga‘a mai ‘a e ngatata ‘a e ngaahi me‘a teka; Mo e patatū ‘a e fanga hoosi, Mo e tohopo ‘a e ngaahi sāliote;

³‘a e ma‘ali‘ali atu ‘a e tama heka hoosi, Mo e ulo ‘a e heletā, Mo e tapa ‘a e tao, Mo e tokolahi ‘a e kafo, Pea fokotu‘uniu ‘a e pekia, Pea ‘oku ‘ikai ha ngata‘anga ‘o e ‘anga‘anga ‘Oku nau humu ‘i honau ngaahi ‘anga‘anga:

⁴Ko e ‘ātunga ē ‘o e lahi ‘o e fe‘auaki ‘a e pa‘umutu faka‘ofo‘ofa, Poto he ngaahi tō‘onga tuki; ‘A ia ‘oku ne fakatau ‘a e ngaahi kakai ‘aki ‘ene ngaahi fe‘auaki, Mo e ngaahi fāmili ‘aki ‘ene ngaahi tō‘onga tuki.

⁵Ko au eni te u fai mo koe — ko Sihova Sāpaoti ia mei he Ta‘ehāmai — pea te u huke ho kāuni, ‘o pūlou ‘aki ho mata; pea te u tuku ke sio ‘a e ngaahi kakai ki ho‘o telefua, mo e ngaahi pule‘anga ki ho mā‘anga.

⁶Ko ia te u laku me‘a fakalielia kiate koe, pea te u ngaohi koe ke ta‘etoka‘i, pea te u ngaohi koe ko e me‘a ke māta‘i.

⁷Pea ‘e faifai pea ‘ilonga ha taha ‘e sio kiate koe te ne hiki ke mama‘o meiate koe, pea te ne pehē: Kuo fakalala koā ‘a Ninive! Ko hai te ne maumau‘ia ai? Te u kumi mei fē ha ni‘ihi ke fakalelu?

⁸‘Oku ke lelei hake koā ‘i Nō-‘Āmoni? — Si‘i kolo na‘e nofo ‘i he ngaahi manga ‘o Naila, ‘O vai takai; ‘A ia ko hono puke ko e tahi, ‘Io, ko hono ‘ā ko e tahi pē.

⁹Ko hono mālohinga ‘a ‘Itiopea mo ‘Isipite, Pea na‘e ‘ikai hano ngata‘anga; Ko Futi mo e kau Lupi na‘e nofo mai ke tokoni kiate koe.

¹⁰Ka na‘a mo ia na‘e tuku ki he fakahē, Na‘a ne ‘alu ke nofo pōpula: Ko ha‘ana ia tamaiki foki na‘e havehave, He tuliki ‘o e ngaahi hala: Pea na‘a nau talotalo ki hono hou‘eiki, Pea ko hono kakai mā‘olunga kotoa na‘e ha‘i seini.

¹¹Ko koe foki ‘e fakainu ke konā, Te ke hoko ko e me‘a kuo fufū; Ko koe foki te ke kumi ha hūfanga mei he fili.

¹²Ko ho ngaahi talitau‘anga kotoa ‘e hoko ‘o hangē ko e ngaahi fiki, ‘Oku ai ‘a e to‘ukai kehe: Ka lulu, te nau ngangana Ki he ngutu ‘o e tama kai.

¹³Vakai, ko e kakai ‘i ho loto kolo ko e koto fefine pē. Kuo mātu‘aki fakaava ‘a e ngaahi hū‘anga ‘o ho fonua ki ho ngaahi fili: Kuo keina ‘e he afi ho ngaahi songo.

¹⁴Ke ke touvai ma‘au telia ‘a e ‘ākolo‘i, Ngaohi ke mālohi ho ngaahi talitau‘anga: ‘Alu ki he kele, ‘O malaki ‘a e ‘umea, ‘O monomono ‘a e ngoto‘umu maka ‘umea.

¹⁵Ko e potu ko ia ‘e keina ai koe ‘e he afi; ‘E tu‘usi koe ‘e he heletā, ‘E keina koe hangē ko e fai ‘e he‘e-‘emo: Neongo ho‘o fakatokolahi ‘a tangata ‘O hangē ko e he‘e-‘emo, Neongo ho‘o fakatokolahi ‘a fefine Ke hangē ko e he‘e fakafolau.

¹⁶Neongo ho‘o ‘ai ho‘o kau fakatau, Ke tokolahi ange ‘i he ngaahi fetu‘u ‘o e langi; Kae maumau ‘e he he‘e-‘emo, ‘O ne puna ange.

¹⁷Ko ho kau fakanofo ‘oku hangē ko e he‘e-fakafolau, Pea ko ho‘o ngaahi ‘eikitau ‘oku hangē ko e hokohoko fuifui he‘e, ‘A ia ‘oku nau tālolo ‘i he ngaahi ‘ā ‘akau ‘i he ‘aho momoko, Ko e hopo leva ‘a e la‘ā pea nau puna, Pea ‘oku ‘ikai ‘iloa ‘a e potu ‘oku nau ‘i ai.

¹⁸Si‘i Tu‘i ‘Āsilia, Kuo mohe ho‘o kau tauhi, ‘Oku mālōlō ho kau ‘ilonga; ‘Oku movete ho kakai ‘i he ngaahi funga mo‘unga, Pea ‘oku ‘ikai ha taha ke tānaki kinautolu.

¹⁹‘Oku ‘ikai mamate ho lavea; ‘Oku matamatakovi ho kafo: Ko ia kotoa pē ‘oku fanongo ki he ongoongo kiate koe Te ne pasipasi nima kiate koe; He ko hai kuo ‘ikai ke laka atu ki ai Ho‘o kovi ma‘u ai pē.