Read KO E TOH TAPU KATOA TONGA KO HAPAKUKI 2 Bible Online

KO HAPAKUKI 2 - KO E TOH TAPU KATOA TONGA bible

KO HAPAKUKI 2

¹KA U tu‘u ‘i hoku potu le‘o, mo lavaki nofo ‘i he talitau‘anga, ‘o fakasio atu ke vakai pe ko e hā ha lea loto te ne fai ‘iate au, mo e hā ha tali te u[3] fai ki he‘eku lāunga.

²Pea tali mai ‘e Sihova, ‘o pehē, Tohi ‘a e vīsone, tongi ke mahino ‘i he ngaahi tohi‘anga, koe‘uhi ke lau ai pē ‘a e lele.

³He ‘oku sio ‘a e vīsone ki ha taimi atu kuo tu‘utu‘uni, pea ‘oku holi ia ke a‘u, pea ‘e ‘ikai loi: kapau ‘oku ngali tuai, piki pē[4] ki ai; he kuo pau te ne ha‘u: ‘e ‘ikai tuai.

⁴Vakai, ko e mafi ia; ‘oku ‘ikai tu‘u totonu ‘a e loto ‘oku ‘iate ia:[5] ka ko e mā‘oni‘oni te ne mo‘ui mei he‘ene tui.

⁵Kae‘uma‘ā (he ko e uaine ko e tama kākā) ko e to‘e fakapupula ia, ‘o ‘ikai te ne manofo; seuke, kuo ne mafa‘a ‘ene havala hangē ko Lolofonua, ‘io, ‘oku ne hangē ko Mate ‘ene ta‘ematopono, pea ‘oku ne tānaki mai kiate ia ‘a e ngaahi pule‘anga kotoa, pea ‘oku ne faluku mai ‘a e ngaahi kakai fua pē ma‘ana.

⁶‘Ikai koā ‘e ofa‘aki ‘e kinautolu na kotoa ha ta‘anga kiate ia, mo ha fakatātā, ko e koto tupu‘a ‘oku kau kiate ia, ‘o nau pehē, ‘Oiauē ‘a e taha ‘oku fakalahi me‘a ‘oku ‘ikai ‘a‘ana! — ‘E ngata ‘afē? — ‘Oiauē ‘a e taha ‘oku hilifaki kiate ia ‘a e ngaahi kavenga talifaki!

⁷‘Ikai koā ‘e tu‘u hake fakafokifā ‘a kinautolu te nau ‘uusi koe, pea ofo hake ‘a kinautolu te nau sese‘e koe, pea te ke hoko ko e koto vete ma‘anautolu?

⁸Seuke, ko koe kuo ke vete ‘ani kakai lahi, ‘e vete koe ‘e hono toe ‘o e ngaahi kakai, ko e me‘a ‘i he lahi ‘o e toto ‘o e kakai, mo e fakamālohia ‘o e fonua mo e kolo, mo e me‘a kotoa ‘oku nofo ai.[6]

⁹‘Oiauē ‘a e taha ‘oku ne fakalahi koloa hala ma‘a hono fāmili, Ke ‘ai hono pununga ‘i taukakapa, Ke ne hao mei he tatae ‘a e kovi!

¹⁰Kuo ke fakakaukau‘i ha mā ki ho fāmili, ho‘o tu‘usi ha ngaahi kakai lahi.

¹¹Pea kuo ke hia ki ho laumālie ‘o‘ou. Seuke, ‘e hua ‘a e maka mei he holisi, pea tali ‘e he toka mei he fata. q

¹²‘Oiauē ‘a e taha ‘oku langa kolo ‘aki ha fu‘ufu‘unga toto, ‘O ne fokotu‘u vilisi ‘i he faihala!

¹³Sī ni, ‘ikai ‘oku meia Sihova Sāpaoti ia? ‘a e fakaongosia ‘a e ngaahi kakai ma‘a e afi pē, mo hela ‘a e ngaahi fa‘ahinga ma‘a e muna pē?

¹⁴He ‘e fonu ‘a māmani ‘i he ‘ilo‘i ‘o e lāngilangi ‘o Sihova, ‘o hangē ko e mafola ‘a e vai ‘i he tahi.

¹⁵‘Oiauē ‘a e taha ‘oku ‘ange kava ki ha taha kehe, ‘O ke tuiaki ho‘o me‘a konā, ‘O mātu‘aki fai ke ne konā, Koe‘uhi ā ke ke sio ki honau telefua!

¹⁶Kuo ke topono, kae ‘aki ‘a e me‘a fakamā pē, ‘o ‘ikai ‘aki ‘a e lāngilangi: inu koe foki, kae hā ho‘o ta‘ekamu. Ko e ipu ‘i he to‘omata‘u ‘o Sihova ‘e takai ‘o hoko kiate koe, pea ‘e ‘ufi‘ufi ho lāngilangi ‘aki ha lua fakamā.[7]

¹⁷He ko e fakamālohi na‘e fai ki Lepanoni ‘e fakapūlou koe, mo e faka‘auha ‘o e fanga manu ‘e fakalelemo‘ui; ko e me‘a ‘i he lahi ‘o e toto ‘o e kakai, mo e fakamālohia ‘o e fonua mo e kolo, mo e me‘a kātoa ‘oku nofo ai.[8]

¹⁸Ko e hā ‘a e ‘aonga ‘o e tamapua, ke ongosia tongitongi ai ia ‘e he tufunga? Ko e hā ‘a e ‘aonga ‘o e ‘īmisi haka, mo e tama ako loi, ke falala ai ki ai ‘e ia na‘e fai hono ngaohi, ke ne fai atu ‘ene ngaohi ‘aitoli ta‘elea?

¹⁹‘Oiauē ‘a ia ‘oku ne pehē ki ha potupotu‘i ‘akau, “Ofo hake!” Ki he maka ta‘elea, “Ngaue hake!” Ko eni ia ‘e fai ako: vakai ange, kuo ‘ufi‘ufi ‘aki ‘a e koula mo e siliva! ‘osi ‘oku ‘ikai ha momo‘i mānava ‘i hono fatu.

²⁰Ka ko Sihova ē ‘i hono temipale tapu: ke fakalongo ‘i hono ‘ao ‘a māmani kātoa.