Read KO E TOH TAPU KATOA TONGA KO SEFANAIA 2 Bible Online

KO SEFANAIA 2 - KO E TOH TAPU KATOA TONGA bible

KO SEFANAIA 2

¹MOU sivi kimoutolu, ‘io, fai homou ‘eke‘i, Si‘i pule‘anga ta‘emangoi;

²‘I he te‘eki ke a‘u ‘a e tu‘utu‘uni ki he fā‘ele, Te‘eki ke nga‘unu mai ‘a e ‘aho hangē ha kafukafu, Te‘eki ke a‘u hifo kiate kimoutolu ‘a e kakaha ‘o e tuputāmaki ‘a Sihova, Te‘eki ke a‘u kiate kimoutolu ‘a e ‘aho ‘o e houhau ‘a Sihova,

³Vivili kia Sihova, ‘a e kau vaivai ‘o e fonua, ‘A kimoutolu kuo mou feia ‘ene konisitūtone; Mou vivili ki he faitotonu, Mou vivili ki he anga vaivai: Hei‘ilo ‘e fufū kimoutolu ‘i he ‘aho ‘o e houhau ‘a Sihova.

⁴He ko Kesa ē ‘e li‘aki, pea ‘e hoko ‘a ‘Asikeloni ko e lala: te nau kapusi ‘a e kakai ‘o ‘Asitoti ho‘atā,[5] pea ko ‘Ekiloni ‘e ta‘aki fu‘u.

⁵‘Oiauē ‘a e nofo he feitu‘u ki tahi, ‘a e kakai Kēleti! Ko e folofola ‘a Sihova ‘oku sio kovi kiate kimoutolu, si‘i Kēnani, fonua ‘o e kau Filisitia; tala atu te u faka‘auha koe, ke ‘oua na‘a ai ha taha ‘e nofo ai.

⁶Pea ‘e hoko ‘a e feitu‘u ki tahi ko e ngaahi kaikai‘anga, ko e ngaahi ‘ana[6] ‘o e kau tauhi manu, mo e koto loto‘ā sipi.

⁷Pea ‘e hoko ‘a e feitu‘u ko e me‘a ma‘a e toenga ‘o e fale ‘o Siuta; te nau fai ai ‘enau fanga manu: ko e ngaahi fale ‘o ‘Asikeloni te nau tokoto ai po‘uli; he ko Sihova ko honau ‘Otua te ne ‘a‘ahi kiate kinautolu, ‘o fakafoki ‘enau pōpula.

⁸Kuo u ongo‘i ‘a e manuki ‘a Moape, pea mo e tālalakulaku ‘a ha‘a ‘Āmoni, ‘a ia kuo nau fakalielia‘i ‘aki hoku kakai, mo pā‘usi‘i honau kau‘ā.

⁹Ko ia — tangi ‘eku mo‘ui — ko Sihova Sāpaoti ia mei he Ta‘ehāmai, ko e ‘Otua ‘o ‘Isileli — tala atu, ko Moape te ne hoko ke hangē ko Sōtoma, mo ha‘a ‘Āmoni ke hangē ko Komola, ko e potu kuo ma‘u ‘e he talatala, mo e ngaahi tokanga māsima, pea ko e koto lala ‘o ta‘engata; ko e toenga ‘o hoku kakai te nau vete kinautolu, ‘io, ko e toetoe ‘o hoku pule‘anga te nau tofi‘a ‘aki kinautolu.

¹⁰Te nau ma‘u ena ko e nunu‘a ‘o ‘enau fielahi, koe‘uhi na‘a nau manuki mo fai fakamofutofuta ki he kakai ‘o Sihova Sāpaoti.

¹¹Ko e koto fakailifia ‘a Sihova kiate kinautolu; he te ne fakatutue ‘a e ngaahi ‘otua kotoa pē ‘o e fonua; pea ‘e fai ‘a e lotu kiate ia ‘e he ngaahi apataki[7] ‘o e ngaahi pule‘anga, takitaha mei hono feitu‘u.

¹²Na‘a mo kimoutolu ‘a e kau Kusa[8] — ko e mate ‘i he‘eku heletā ‘a e fa‘ahinga ko ia.

¹³Pea te ne mafao atu hono nima ki he tokelau, ‘o faka‘auha ‘a ‘Āsilia; pea te ne ngaohi ‘a Ninive ko e lala, ko e potu honge vai, hangē ko e toafa.

¹⁴Pea ‘e tokoto ‘i loto kolo ‘ani ngaahi tākanga, ‘io, ‘a e manu kehekehe hangē ha fu‘u kakai: na‘a mo e pelikani mo e lupe ‘o e lala te nau mohe ‘i he teuteu ‘o hono ngaahi funga pou: ‘e ongoonga‘a mai ‘a e fuiva[9] mei he tupa; ko e lēveni[10] ē ‘i hū‘anga: seuke kuo hā kitu‘a ‘a e ‘aofi sita.

¹⁵Tokua ko eni ‘a e kolo na‘e pātapata, Na‘e nofo falala noa, Na‘e lau ‘i hono loto, Ko au pē; Pea ‘oku ‘ikai mo ha taha. Uokeuoke, si‘ene hoko ko e lala, Ko e tokoto‘anga ‘o e fanga manu! Ko ia fua pē ‘oku laka ange ai ‘oku ne faka‘ise‘isa; ‘Oku ne taukae ‘aki hono nima.