Read KO E TOH TAPU KATOA TONGA KO SEFANAIA 3 Bible Online

KO SEFANAIA 3 - KO E TOH TAPU KATOA TONGA bible

KO SEFANAIA 3

¹‘OIAUĒ ‘a e kolo pau‘u, ‘A e kolo kuo ‘uli‘i, ‘A e kolo fai fakaehaua!

²Kuo ‘ikai te ne fakaongo ki he le‘o; Kuo ‘ikai te ne tali ‘a e fakatonutonu; Kuo ‘ikai te ne tui kia Sihova; Kuo ‘ikai te ne ‘unu‘unu ki hono ‘Otua.

³Ko hono hou‘eiki ko e fanga laione ‘oku kālou ‘i loto kolo; Ko ‘ene kau fakamaau ko e fanga ulofi ‘o e efiafi; ‘Oku ‘ikai te nau tuku ha me‘a ke toki ngungu pongipongi.

⁴Ko ‘ene kau palōfita ‘oku māfanangofua, Ko e tu‘unga me‘a ‘oku koto kākā; Ko ‘ene kau taula‘eiki ‘oku nau va‘inga‘aki ‘a e me‘a ‘oku tapu, ‘Oku nau fakamālohia ‘a e lao.

⁵Ko Sihova Fai Totonu ‘oku ‘i loto kolo; Tala‘ehai te ne fai ha kovi: ‘I he pongipongi kotoa pē ‘oku ne tuku ‘ene fakalao ke fu‘u e‘a: Tala‘ehai ‘oku ne ta‘efai hono ngafa; Ka ko e tangata kovi ‘oku ‘ikai te ne ‘ilo ‘a e mā.

⁶Na‘a ku tu‘usi ‘ani pule‘anga, kuo holo honau ngaahi taua; kuo u ‘ai ke lala honau ngaahi hala, ke ‘oua na‘a laka ange ai ha taha: kuo lailai ‘enau ngaahi kolo, ‘o ‘ikai ha tangata ai, ‘o ‘ikai ha nofo.

⁷Na‘a ku pehē, Kuo pau te ke manavahē kiate au ‘e koe, te ke tali ‘e koe ‘a e fakatonutonu; pea ‘e ‘ikai ai tu‘usi hono nofo‘anga,[11] ‘a e me‘a kehekehe na‘a ku tu‘utu‘uni ma‘ana, ka na‘a nau tūkuingata ‘enau fakaka‘anga ‘enau ngaahi fai anga kehekehe.

⁸Ko ia, mou tatali kiate au — ko Sihova ia mei he Ta‘ehāmai — tatali ki he ‘aho ‘o ‘eku tu‘u hake ke fai ha vete: he ko hoku totonu ke fakatefua ‘ani kakai, ke tānaki ‘ani pule‘anga, ke lilingi kiate kinautolu ‘eku houhau, ‘a e kakaha kotoa ‘o ‘eku ‘ita; he keina ‘a māmani kātoa ‘e he afi ‘o ‘eku fua‘a.

⁹He te u toki liliu ‘a e ngaahi kakai ke nau loungutu ma‘a, ke nau tāpafua kotoa pē ‘a e huafa ‘o Sihova, ke uouongataha ‘enau ngāue kiate ia.

¹⁰Mei he potu ki kō ‘o e ngaahi vaitafe ‘o Kusa[12] te nau ‘omi ‘eku kau lotu, si‘i hako ‘o ‘eku movete, ko e feilaulau kiate au.

¹¹‘I he ‘aho ko ia ‘e ‘ikai fakamaa‘i koe ‘e ho‘o ngaahi fai anga kehekehe, ‘a ia kuo ke hia ai kiate au: he te u toki ‘ave mei ho lotolotonga ‘a e fa‘ahinga ‘oku pātapata ‘i ho laukau, pea ‘e ‘ikai te ke toe fai fakamofutofuta ‘i hoku mo‘unga tapu.[13]

¹²Pea te u fakatoe ‘i ho lotolotonga si‘a kakai vaivai mo tu‘utāmaki, ‘a ia te nau tui ki he huafa ‘o Sihova.

¹³Ko e toetoe ‘o ‘Isileli ‘e ‘ikai te nau faikovi, pea ‘e ‘ikai te nau lea loi; pea ‘ikai ‘ilo ‘i honau ngutu ha ‘elelo kākā; ka ko e fa‘ahinga ko ia te nau kaikai mo tokoto, pea ‘e ‘ikai ha taha ‘e mafakahoha‘asi kinautolu.

¹⁴Mavava, si‘i ta‘ahine ko Saione; Mou hiki tuē, si‘i ‘Isileli; Fiefia mo pātapata ‘aki ‘a e kotoa ‘o ho loto, Si‘i ta‘ahine ko Selusalema.

¹⁵Kuo ‘ave ‘e Sihova ho ngaahi tautea, Kuo ne tafi ki tu‘a ho fili: Ko e Tu‘i ‘Isileli, ‘a Sihova, ko ho tokaikolo ia: ‘E ‘ikai te ke toe sio[14] ki ha kovi.

¹⁶‘I he ‘aho ko ia ‘e tala ki Selusalema, ‘Oua te ke manavahē: Si‘i Saione, ‘Oua ‘e tāupe ho nima.

¹⁷‘Oku lotolotoi ‘iate koe ‘a Sihova ko ho ‘Otua, Ko e Helo ia ‘oku fai fakamo‘ui; Te ne patapatakā ‘iate koe he‘ene fiefia, Kuo a‘u ‘ene ‘ofa ki he nonga;[15] ‘Oku ne tome‘e ‘iate koe mo mavava.

¹⁸Te u fakatefua mai ‘a kinautolu ‘oku nofo mamahi ko ‘enau mama‘o mei he kātoanga tu‘utu‘uni, ko e fa‘ahinga tupu meiate koe; ‘a kinautolu ko ‘enau kavenga ko e manukia.[16]

¹⁹Ko au eni te u fai ‘i he taimi ko ia mo e kakai ‘oku fakamālohia koe, pea te u fakahaofi si‘i ketu, pea te u tānaki si‘i me‘a na‘e sese‘e; pea te u ngaohi kinautolu ko e fakamālō‘ia, mo e ongoongoa ‘i he ngaahi fonua kehekehe, he na‘e fakamaa‘i ai kinautolu.

²⁰‘I he taimi ko ia te u ‘omi kimoutolu, ‘io, ‘i he taimi ‘o ‘eku tānaki kimoutolu; he te u ngaohi kimoutolu ko e kakai ‘oku ongoongoa mo fakamālō‘ia ‘i he ngaahi kakai ‘o māmani, ‘oka u ka fakafoki homou pōpula, ‘o mou sio ki ai — ko e folofola ia ‘a Sihova.