Read KO E TOH TAPU KATOA TONGA KO HĀKEAI 1 Bible Online

KO HĀKEAI 1 - KO E TOH TAPU KATOA TONGA bible

KO HĀKEAI 1

¹TOKUA ‘i hono ua ta‘u ‘o Kingi Talaiasi, ‘i hono māhina ono, mo e ‘uluaki ‘aho ‘o e māhina, na‘e ai ha folofola ‘a Sihova na‘e fakafai ‘i he palōfita ko Hākeai kia Seluipepeli foha ‘a Saletili, ko e kōvana ‘o Siuta, pea kia Siosiua foha ‘o Siosateki, ko e taula‘eiki lahi, ke fakahā:

²Ko e folofola eni ‘a Sihova Sāpaoti, Tokua ‘oku lau ‘e he kakai na, Kuo te‘eki taimi ke mau ‘alu atu, ‘a e taimi ke langa ‘a e fale ‘o Sihova.

³Ko ia, na‘e hoko ‘a e folofola ‘a Sihova, ‘o fakafai ‘i he palōfita ko Hākeai, ‘o pehē,

⁴Sā! kuo taimi ‘apē ke mou nofo ‘i he ngaahi fale kuo ‘aofi, kae tuku lusa ‘a e fale ni!

⁵Pea ko eni, ko e folofola eni ‘a Sihova Sāpaoti, ‘Ai homou loto ke sivi homou ngaahi ‘alunga.

⁶Na‘a mou tō ta‘u ke lahi, ka mou utu mai ha momo‘i me‘a; ‘oku mou kai, kae ‘ikai mākona; ‘oku mou inu, kae ‘ikai topono; ‘eku mou ‘ai kofu, ka ‘oku ‘ikai te mou māfana; pea ko ia ‘oku nō ngāue ko ‘ene tali totongi ke ‘ai ki he kato ava.

⁷Ko e folofola eni ‘a Sihova Sāpaoti, ‘Ai homou loto ke sivi homou ngaahi ‘alunga.

⁸‘Alu ki he mo‘unga, ‘o fetuku ‘akau mai, pea langa ‘a e fale; pea te u lata ai, pea te u fakalāngilangi‘i au — ko Sihova ia.

⁹Ko ho‘omou ‘amanaki na‘e sio ki ha me‘a lahi, kae uoke ko e momo‘i me‘a; pea ‘i ho‘omou fetuku mai ki ‘api, na‘a ku ifi‘i.[1] Koe‘uhi ko e hā? — Ko Sihova Sāpaoti ia mei he Ta‘ehāmai — koe‘uhi ko hoku fale, he kuo tuku lusa, ka ko kimoutolu ‘oku lele leva takitaha ki hono fale ‘o‘ona.

¹⁰Ko hono ‘uhinga ia kuo ta‘ofi ai ‘e he langi ‘a e hahau, ko homou tautea, pea kuo ta‘ofi ‘e he kelekele hono fua.

¹¹Pea u ui mai ha lusa ki he fonua, pea ki he ngaahi mo‘unga, pea ki he uite, pea ki he uaine fo‘ou, pea ki he lolo; ‘io, ki he me‘a fua pē ‘oku tupu mei he kelekele, pea ki he tangata, pea ki he manu, pea ki he fita‘a kotoa pē ‘a e nima.

¹²Pea ko Seluipepeli foha ‘o Saletili, pea mo Siosiua foha ‘o Siosateki, ko e taula‘eiki lahi, mo si‘i toenga kakai kotoa,[2] na‘a nau talangofua ki he le‘o ‘o Sihova ko honau ‘Otua, pea ki he ngaahi lea ‘a Hākeai ko e palōfita, ‘o taau mo hono fekau ‘e Sihova ko honau ‘Otua; pea na‘e ‘apasia ‘a e kakai ko ‘enau ongo‘i ‘a Sihova.

¹³Toki lea ‘a Hākeai ko e talafekau ‘a Sihova ‘i he‘ene fai ‘a e fekau ‘a Sihova ki he kakai, ‘o ne pehē, Ko Sihova eni mei he Ta‘ehāmai — ‘Oku ou ‘iate kimoutolu ‘e au.

¹⁴Pea na‘e ue‘i ‘e Sihova ‘a e laumālie ‘o Seluipepeli foha ‘o Saleteli, ko e kōvana ‘o Siuta, mo e laumālie ‘o Siosiua foha ‘o Sihosataki, ko e taula‘eiki lahi, mo e laumālie ‘o e toenga kakai kotoa;[3] pea na‘a nau omi ‘o fai ngāue ‘i he fale ‘o Sihova Sāpaoti ko honau ‘Otua,

¹⁵‘i hono ‘aho uofulu mā fā, ‘i hono ono ‘o e māhina, ‘i hono ta‘u ua ‘o Kingi Talaiasi.