Read KO E TOH TAPU KATOA TONGA KO HĀKEAI 2 Bible Online

KO HĀKEAI 2 - KO E TOH TAPU KATOA TONGA bible

KO HĀKEAI 2

¹TOKUA ‘i hono māhina fitu, ‘i hono uofulu mā taha ‘o e ‘aho ‘o e māhina, na‘e ai ha folofola ‘a Sihova na‘e fakafai ‘i he palōfita ko Hākeai, ke fakahā,

²Lea mu‘a kia Seluipepeli foha ‘o Saletili, ko e kōvana ‘o Siuta, pea kia Siosiua foha ‘o Siosateki, ko e taula‘eiki lahi, pea ki si‘i toenga kakai na, ‘o pehē,

³Ko hai ‘oku toe ‘iate kimoutolu ‘a ia na‘a ne mamata ki he fale ni ‘i hono lāngilangi mu‘a? Pea ‘oku hā fēfē ia kiate kimoutolu eni?

⁴‘Ikai ko e me‘a noa eni ‘i ho‘omou fakatatau kinaua? Ka ko eni, ke ke lototo‘a pē, si‘i Seluipepeli — ko Sihova ia mei he Ta‘ehāmai — pea lototo‘a mo koe, si‘i Siosiua foha ‘o Siosateki, ‘a e taula‘eiki lahi, pea mou lototo‘a kimoutolu, ‘a e kakai kotoa ‘o e fonua — ko Sihova ia mei he Ta‘ehāmai — pea mou ngāue: he ‘oku ou ‘iate kimoutolu ‘e au — ko Sihova Sāpaoti ia mei he Ta‘ehāmai.

⁵Ko e me‘a ki he lea ‘o ‘eku fuakava mo kimoutolu ‘i ho‘omou hū mai mei ‘Isipite, ko ia mo hoku laumālie ‘oku kei tu‘u ‘i homou lotolotonga: ‘oua te mou manavahē.

⁶He ko e folofola eni ‘a Sihova Sāpaoti. ‘Oku toe tu‘o taha pē — ko e taimi si‘i — pea ‘e hoko ‘a ‘eku lulu ‘a e langi, mo māmani, ‘io, ‘a e tahi, mo e mōmoa.

⁷Pea te u lulu‘i ‘a e ngaahi pule‘anga kotoa, pea ko e Holi ‘o e ngaahi pule‘anga kotoa pē ‘e hoko mai; pea te u fakafonu lāngilangi ‘a e fale ni — ko e folofola ia ‘a Sihova Sāpaoti.

⁸‘Oku ‘a‘aku ‘a e siliva, pea ‘a‘aku ‘a e koula — ko Sihova Sāpaoti ia mei he Ta‘ehāmai.

⁹‘E hulu ‘a e lāngilangi ‘o e fale ko eni ki mui ‘i he ‘uluaki — ko e folofola ia ‘a Sihova Sāpaoti — pea ‘i he potu ni te u ‘atu ‘a e melino — ko Sihova Sāpaoti ia mei he Ta‘ehāmai.

¹⁰‘I hono ‘aho uofulu mā fā ‘i hono māhina hiva, ‘o e ua ta‘u ‘o Talaiasi, na‘e ai ha folofola ‘a Sihova na‘e fakafai ‘i he palōfita ko Hākeai, ‘o pehē, Ko e folofola eni ‘a Sihova Sāpaoti:

¹¹Huhū mu‘a ki he kau taula‘eiki pe kuo fēfē ‘a e lao ‘i he me‘a ni?

¹²Ko e taha ena ‘oku ne hapai ha kakano tapu ‘i he kapa ‘o hono kofu, pea ‘oku lave ‘a e kapa ‘o hono kofu ki ha mā, pe ki ha sepo, pe ki ha uaine, pe ki ha lolo, pe ki ha me‘akai kehe: ‘e tapu ai ‘a e me‘a ko ia? Pea na‘e tali ‘a e kau taula‘eiki, ‘Ikai.

¹³Toe lea ‘a Hākeai, Kapau ‘e lave ki ha me‘a pehē ha taha ‘oku ta‘ema‘a ko e me‘a faka‘eiki, ‘e ta‘ema‘a ai ‘a e me‘a ko ia? Pea tali ‘a e kau taula‘eiki, ‘E ta‘ema‘a pē.

¹⁴Pea tali ‘e Hākeai, ‘o ne pehē, Ko e tuha ia ‘o e kakai ni, pea ko e tuha ia ‘o e pule‘anga ni ‘i hoku ‘ao — ko Sihova ia mei he Ta‘ehāmai — pea ko e tuha ia ‘o e ngāue kotoa ‘a honau nima: na‘a mo e me‘a kotoa ‘oku nau hapai ‘i he potu na ko e koto ta‘ema‘a.

¹⁵Pea ko eni, ‘ai mu‘a homou loto ke sivi mei he ‘aho ni ‘o fai hake, ‘io, mei he taimi kuo te‘eki ke ‘ai ha maka ki ha maka ‘i he temipale ‘o Sihova.

¹⁶‘I he te‘eki ke fai ia, ka a‘u ha taha ki ha puke koane na‘e totonu ke uofulu, tā ‘oku hongofulu pē; ka ‘alu ha taha ki ha sima uaine ke ‘utu mei ai ha nimangofulu‘i hina, tā ‘oku uofulu pē.

¹⁷Na‘a ku taa‘i kimoutolu ‘aki ‘a e mahunu mo e kekena pea ‘aki ‘a e ‘uha maka, ‘io, ‘a e ngāue kotoa ‘a homou nima; ka na‘e ‘ikai hamou taha ‘e hanga mai — ko Sihova ia mei he Ta‘ehāmai.

¹⁸‘Ai mu‘a homou loto ke sivi mei he ‘aho ni ‘o fai atu, ‘io, mei he ‘aho ko hono uofulu mā fā ‘o e māhina hiva — mou ‘ai homou loto ke sivi, ‘o kamata mei he ‘aho na‘e tanupou ai ‘a e temipale ‘i Selusalema.

¹⁹‘Oku ai ha tenga koā ‘i he feleoko? ‘Io, na‘a mo e vaine, mo e fiki, mo e pomikānite, mo e ‘ōlive kuo te‘eki ke fua; ka ‘e kamata he ‘aho ni ‘eku fai tāpuaki.

²⁰Pea hoko ‘a e folofola ‘a Sihova kia Hākeai ko hono tu‘o ua ‘i he ‘aho uofulu mā fā ‘o e māhina, ‘o pehē,

²¹Lea kia Seluipepeli, ko e kōvana ‘o Siuta, ‘o pehē, Ko au eni te u lulu ‘a langi mo māmani.

²²Pea te u fulihi ‘a e taloni ‘o e ngaahi pule‘anga, pea te u faka‘auha ‘a e mālohinga ‘o e ngaahi pule‘anga ‘o e ngaahi kakai: pea te u fulihi ‘a e ngaahi sāliote, mo e heka ai; pea ‘e tō ‘a e fanga hoosi mo kinautolu ‘oku heka ai, ko e tō ‘a ē ‘i he heletā ‘o ē.

²³‘I he ‘aho ko ia — ko Sihova Sāpaoti eni mei he Ta‘ehāmai — te u to‘o koe, si‘eku tamaio‘eiki, ko Seluipepeli foha ‘o Saletili — ko Sihova ia mei he Ta‘ehāmai — pea te u ‘ai koe hangē ko e mama sila: he kuo u fili koe — ko Sihova Sāpaoti ia mei he Ta‘ehāmai.