Read KO E TOH TAPU KATOA TONGA KO SĀKALAIA 1 Bible Online

KO SĀKALAIA 1 - KO E TOH TAPU KATOA TONGA bible

KO SĀKALAIA 1

¹TOKUA ‘i hono valu ‘o e māhina, mo hono ua ‘o e ta‘u ‘o Talaiasi, na‘e hoko ‘a e folofola ‘a Sihova ki he palōfita ko Sākalaia foha ‘o Pelekaia, foha ‘o ‘Ito, ke fakahā:

²Na‘e houhau ‘a Sihova ki ho‘omou ngaahi kui — ko e houhau ka ko ha houhau — ko ia ke ke lea kiate kinautolu.

³Ko e folofola eni ‘a Sihova Sāpaoti: Foki mai kiate au — ko Sihova Sāpaoti ia mei he Ta‘ehāmai — pea te u foki kiate kimoutolu — ko e folofola ia ‘a Sihova Sāpaoti.

⁴‘Oua te mou hangē ko ho‘omou ngaahi kui, ‘a ia na‘e malanga kiate kinautolu ‘a e ngaahi palōfita mu‘a, he‘enau pehē, Ko e folofola eni ‘a Sihova Sāpaoti, Foki mu‘a mei homou ngaahi ‘alunga kovi, mo ho‘omou ngaahi fai anga ‘oku kovi: ka na‘e ‘ikai te nau fakaongo, pea na‘e ‘ikai te nau tokanga kiate au — ko Sihova ia mei he Ta‘ehāmai.

⁵Ko ho‘omou ngaahi kui, Kofa‘ā kinautolu? pea ko e kau palōfita, ko e fa‘ahinga ia ‘oku mo‘ui ‘o ta‘engata?

⁶‘Āua, ka ko e ngaahi lea ‘a‘aku mo e ngaahi fekau ‘a‘aku, ‘a ia na‘a ku tu‘utu‘uni ki he‘eku kau tamaio‘eiki ko e kau palōfita, ‘ikai na‘a nau tuli ‘o ma‘u ho‘omou ngaahi kui? ‘a ē ā na‘a nau foki mai ai, ‘o nau pehē, Hangē ā ‘a e fakakaukau ‘a Sihova Sāpaoti ke fai kiate kitautolu, ‘o taau mo hotau ngaahi ‘alunga, mo ‘etau ngaahi fai anga, kuo pehē ‘ene fai kiate kitautolu.

⁷‘I hono ‘aho uofulu mā fā ‘o e māhina ko hono hongofulu mā taha (ko Sēpati ‘a e māhina ko ia), ‘i hono ua ta‘u ‘o Talaiasi, na‘e hoko ‘a e folofola ‘a Sihova ki he palōfita ko Sākalaia foha ‘o Pelekaia, foha ‘o ‘Ito, ‘o pehē,

⁸Ko ‘eku fakasio po‘uli, pea tā ko e tangata ena ‘oku heka ki ha hoosi kulokula, pea ‘oku ne tu‘u ‘i he pupunga maile na ‘i he talalo; pea mei hono tu‘a na‘e ai ha fanga hoosi, kulokula, mo tetea,[1] mo hinehina.

⁹Pea u pehē, ‘Ēī, ko e hā ‘a kinautolu na? Pea tali mai ‘e he ‘āngelo na‘e lea ‘iate au, Te u tuku ke hā kiate koe pe ko e hā ‘a e fa‘ahinga ko ena.

¹⁰Pea tali ‘a e tangata ‘oku tu‘u ‘i he pupunga maile, ‘o ne pehē, Ko kinautolu eni ia kuo fekau ‘e Sihova ke ‘a‘ahi holo ‘i māmani.

¹¹Pea tali ‘e kinautolu ki he ‘āngelo ‘a Sihova ‘oku tu‘u ‘i he pupunga maile, ‘o nau pehē, Kuo mau ‘a‘ahi holo ‘i māmani, pea tā ‘oku nofo pē ‘a māmani kātoa, ‘o nonga pē.

¹²Pea fakatau folofola ai ‘a e ‘āngelo ‘a Sihova, ‘o ne pehē, Sihova Sāpaoti ē, ko futu ā ho‘o ta‘efaka‘atu‘i ‘a Selusalema, mo e ngaahi kolo ‘o Siuta, ‘a ia kuo ke houhau ki ai ‘a e fitungofulu‘i ta‘u ni!

¹³Pea tali ‘a Sihova ki he ‘āngelo na‘e lea ‘iate au ‘aki ‘a e ngaahi talamonū, ko e ngaahi lea fakalelu.

¹⁴Pea tala mai ‘e he ‘āngelo na‘e lea ‘iate au, Fanongonongo ‘o pehē, Ko e folofola eni ‘a Sihova Sāpaoti: ‘Oku ou fua‘a ‘i Selusalema mo Saione, ko e fua‘a lahi.

¹⁵Pea ko e ‘ita lahi ‘oku ou ongo‘i ki he ngaahi pule‘anga ‘oku nofo noa: hono ko e momo‘i me‘a ‘eku ‘ita, kae tafunaki ‘a e kovi ‘e he fa‘ahinga ko ia.

¹⁶Ko ia, ko e folofola eni ‘a Sihova, Kuo u foki ki Selusalema kuo u fonu ‘ofa‘ia; ‘e langa hoku fale ‘i ai — ko Sihova Sāpaoti ia mei he Ta‘ehāmai — pea ‘e falō ha kafa ki Selusalema.

¹⁷Toe kalanga, ‘o pehē, Ko e folofola eni ‘a Sihova Sāpaoti: ‘e toe tangikafa hoku ngaahi kolo ‘i he lelei, pea ‘e toe faka‘atu‘i ‘e Sihova ‘a Saione, pea te ne toe fili ‘a Selusalema.

¹⁸Pea u hanga hake, ‘o fakasio, pea tā ko e faa‘i nifo ena.

¹⁹Pea u pehē ki he ‘āngelo na‘e lea ‘iate au. Ko e hā ‘a kinautolu na? Pea ne tali mai, Ko e ngaahi nifo ena ia kuo fakamovetevete ‘a Siuta, ‘a ‘Isileli, mo Selusalema.

²⁰Pea tuku ‘e Sihova ke u sio ki ha tuki ukamea ‘e toko fā.

²¹Pea u fakatau folofola hake, Ko e hā ‘a e me‘a kuo omi ‘e kinautolu na ke fai? Pea ne tali ‘o pehē, Ko e ngaahi me‘a ko ē ko e ngaahi nifo na‘e fakamovetevete ‘a Siuta, kae‘oua ke ‘ikai kei malava ‘e ha taha ke hiki hono ‘ulu: ka ko kinautolu ni kuo nau omi ke faka‘ohovale‘i ‘a e fa‘ahinga ko ē, ke fakapuna ‘a e ngaahi nifo ‘o e ngaahi pule‘anga, ‘a kinautolu na‘e hiki nifo ki he fonua ‘o Siuta ke fakamovetevete ia.