Read KO E TOH TAPU KATOA TONGA KO SĀKALAIA 10 Bible Online

KO SĀKALAIA 10 - KO E TOH TAPU KATOA TONGA bible

KO SĀKALAIA 10

¹MOU kole ‘uha kia Sihova ‘i Vaimui, ‘a Sihova ‘oku ne ngaohi ‘a e ‘uhila; pea te ne ‘ange kiate kinautolu ‘a e tu‘umotō, ke ma‘u takitaha ha mohuku ‘i he vao.

²Tala atu, ne launoa pē ‘a e ngaahi telāfimi, pea ko e kau tongafisi na‘a nau sio vīsone kākā; pea ‘oku nau tala misi loi, ko e muna pē ‘enau fakalelu: ko hono ō ia kuo nau hē holo hangē ha tākanga; ‘oku nau tu‘utāmaki ko e ‘ikai ha tauhi.

³Kuo tafunaki ‘eku ‘ita ki he kau tauhi, pea te u ‘a‘ahi ki he kau kosi tangata ke tautea: he kuo ‘a‘ahi ‘a Sihova Sāpaoti ki hono tākanga, ‘a e fale ‘o Siuta, pea te ne ngaohi kinautolu ke hangē ko ‘ene hoosi kuo lāngilangi‘ia hono teu he‘ene ‘alu ki he tau.

⁴‘Oku meiate ia ‘a e makatuliki, ‘oku meiate ia ‘a e fa‘o, ‘oku meiate ia ‘a e kaufana tau, ‘oku meiate ia ‘a e ‘alu atu ‘a e fakaehaua fua pē — ‘a e ngaahi me‘a kātokatoa.[26]

⁵Pea te nau hangē ha kau helo, he‘enau malaki ē, hangē[27] ko e pela ‘o e hala ‘i he fai ‘o e tau; pea te nau tau, he ‘oku kau ‘a Sihova mo kinautolu: pea ‘e fakamaa‘i ‘a e tau heka hoosi.

⁶Pea te u fakakaukaua ‘a e fale ‘o Siuta, pea te u fakamo‘ui ‘a e fale ‘o Siosifa, pea te u ‘omi ke nau nofo; he te u ‘ofa kiate kinautolu; pea te nau hangē kuo ‘ikai te u li‘aki kinautolu; he ko Sihova au ko honau ‘Otua, pea te u tali kinautolu.

⁷Pea ‘e hangē ko e helo ‘a ‘Ifalemi, pea ‘e fiefia honau loto ‘o hangē kuo inu uaine; pea ‘e sio ki ai ‘e he‘enau fānau, ‘o nau fiefia; ‘e tome‘e honau loto ‘ia Sihova.

⁸Te u tupulū kiate kinautolu, pea te u tānaki kinautolu; he kuo u huhu‘i kinautolu; pea te nau tupu ‘o hangē ko ‘enau tupu ko ē.

⁹Pea te u tūtuu‘i kinautolu ‘i he ngaahi kakai; pea ‘i he‘enau ‘i he ngaahi potu mama‘o te nau manatu kiate au, pea te nau mo‘ui, pea pehē mo ‘enau fānau; pea te nau foki.

¹⁰Pea te u fakafoki kinautolu mei ‘Isipite, pea te u tānaki kinautolu mei ‘Āsilia; pea te u ‘omi kinautolu ki he fonua ‘o Kiliati mo Lepanoni: pea ‘e ‘ikai te nau hao ai.

¹¹Pea te ne hā‘ele atu ‘i he tahi, ‘a e me‘a na‘e faka‘efihi, pea te ne taa‘i ‘a e ngaahi ngalu ‘i he tahi, pea ko e ngaahi loloto ‘o Naila ‘e fakamātu‘u: pea ‘e pe‘ehi ‘a e fielahi ‘a ‘Āsilia, pea ko e sēpita ‘a ‘Isipite ‘e mole.

¹²Pea te u fakakaukaua kinautolu ‘ia Sihova; pea te nau fe‘alu‘aki ‘i hono huafa — ko Sihova ia mei he Ta‘ehāmai.