Read KO E TOH TAPU KATOA TONGA KO SĀKALAIA 11 Bible Online

KO SĀKALAIA 11 - KO E TOH TAPU KATOA TONGA bible

KO SĀKALAIA 11

¹‘E LEPANONI, fakaava ho ngaahi matapā, Kae keina ‘e he afi ho ngaahi sita!

²Tangi ‘oiauē, si‘i paini, he kuo tō ‘a e sita,[28] Hono kuo ‘auha ‘a e ngaahi ‘akau hako! Tangi ‘oiauē ‘a e ngaahi ‘oke ‘o Pēsani, He kuo ‘ohifo ‘a e vao na‘e ‘aa‘i.

³‘Oku ongoonga‘a mai ‘a e ‘oiauē ‘a e kau tauhi manu, He kuo ‘auha honau viki‘anga. ‘Oku ongoonga‘a mai ‘a e kālou ‘a e fanga manu hau, He kuo ‘auha ‘a e lāngilangi ‘o Soatani.

⁴Ko e folofola eni ‘a Sihova ko hoku ‘Otua: Tauhi ‘a e tākanga[29] ‘oku toutou tāmate‘i:

⁵‘a ia ‘oku tāmate‘i kinautolu ‘e he fa‘ahinga na‘e fakatau, ka nau ta‘ehalaia tokua; pea ko ha‘a fakatau atu kinautolu ‘oku nau pehē, Mālō mo Sihova ‘eku ma‘u koloa; pea ko honau kau tauhi ‘onautolu ‘oku ‘ikai te nau faka‘atu‘i kinautolu.

⁶Tala atu, ‘e ‘ikai te u toe faka‘atu‘i ‘a e nofo ‘i he fonua — ko Sihova ia mei he Ta‘ehāmai — pea ko au eni ‘oku ou tuku atu ‘a e kakai takitaha ki he nima ‘o hono kaungā‘api, pea ki he nima ‘o hono tu‘i, pea ‘e fetā‘aki[30] ‘a māmani, pea ‘e ‘ikai te u hamusi mei honau nima.

⁷Ko ia, na‘a ku tauhi ‘a e tākanga na‘e toutou tāmate‘i: ‘aua, ‘a e vaivai ‘o e tākanga. Pea u to‘o mai ha ongo tokotoko; na‘a ku ui ‘a e taha ko Hōifua,[31] pea u ui ‘a e taha ko ‘Ū-ha‘i; pea u fafanga ‘a e tākanga.

⁸Pea u faka‘auha ha kau tauhi ‘e toko tolu ‘i ha māhina ‘e taha; ka na‘e kina ‘eku mo‘ui ‘iate kinautolu; ‘io, na‘a mo honau loto na‘e fakalili‘a kiate au.

⁹Pea u pehē. ‘E ‘ikai te u nofo ko e tauhi kiate kimoutolu: ke mate pē ‘a e ha‘a mate, pea ke ‘auha pē ‘a e ha‘a ‘auha; pea ko e me‘a ki hono toe, ke keina ‘e ē ‘a e kakano ‘o ē.

¹⁰Pea u to‘o hoku tokotoko, ‘a Hōifua, ‘o u tu‘usi ia, ke maumau‘i ‘eku kovinānite na‘a ku fai mo e ngaahi kakai kotoa.

¹¹Ko ia na‘e maumau ia ‘i he ‘aho ko ia: pea na‘e ‘ilo ai ‘e he kau vaivai ‘o e tākanga, ‘a ia na‘e tokanga kiate au, tā ko e folofola ‘a Sihova ia.

¹²Pea u pehē kiate kinautolu, Kapau ‘oku hā lelei kiate kimoutolu, tuku mai ‘eku totongi: pea ka ‘ikai, tuku ai pē. Ko ia, na‘a nau fua hā tolungofulu‘i pa‘anga siliva ma‘aku totongi.

¹³Pea folofola ‘a Sihova kiate au, Lī ia ki he tufunga ipu ‘umea,[32] ‘a e koloa hulu ni ‘a ia kuo nau lau ko hoku fe‘unga. Ko ia, na‘a ku to‘o ‘a e tolungofulu‘i siliva, pea u lī ia ki he tufunga ipu ‘umea ‘i he fale ‘o Sihova.

¹⁴Pea u toki tu‘usi ‘a hono ua ‘o hoku tokotoko, ‘a ‘Ū-ha‘i, ke maumau‘i ‘a e tautehina ‘o Siuta mo ‘Isileli.

¹⁵Pea folofola ‘a Sihova kiate au, Toe fai, to‘o mai ‘a e nāunau ‘o ha tauhi manu ‘oku vale.

¹⁶He vakai, ko au eni ‘oku ou fokotu‘u ha tauhi ‘i he fonua, ‘a ia ‘e ‘ikai te ne ‘a‘ahi kiate kinautolu ‘oku fai hono faka‘auha, pea ‘e ‘ikai te ne kumi ki he manu kuo hē, pea ‘e ‘ikai te ne faito‘o ki he lavea; pea ‘e ‘ikai te ne fafanga ‘a ia ‘oku tu‘u, kaekehe ‘oku ne keina ‘a e kakano ‘o e manu nge‘enge‘e, pea na‘a mo e keukeu ‘oku ne ngungu.

¹⁷‘Oiauē ‘a e ‘ata‘i tauhi ‘oku li‘aki ‘a e tākanga! ‘e hoko ‘a e heletā ki hono nima, mo hono mata to‘omata‘u: ‘e mātu‘aki mingi hono nima, pea ‘e mātu‘aki ka‘anga hono mata to‘omata‘u.