Read KO E TOH TAPU KATOA TONGA KO SĀKALAIA 12 Bible Online

KO SĀKALAIA 12 - KO E TOH TAPU KATOA TONGA bible

KO SĀKALAIA 12

¹KO E folofola ‘a Sihova, ko e kavenga mei he Ta‘ehāmai ‘oku hilifaki ki ‘Isileli, Ko Sihova eni mei he Ta‘ehāmai, ‘a ‘Ene ‘Afio ‘oku ne folahi ‘a e ngaahi langi, mo tanu pou ‘a māmani, mo ngaohi ‘a e laumālie ‘o e tangata ke huluni ‘iate ia:

²Ko au eni ‘oku ou ngaohi ‘a Selusalema ko e pēsoni inu fakaninimo ki he kakai kehekehe ‘oku nofo takatakai, pea ‘e ‘i Siuta foki ‘a e kavenga ‘i he ‘ākolo‘i ‘o Selusalema.

³Pea ‘i he taimi ko ia, te u ngaohi ‘a Selusalema ko e maka sivi ki he ngaahi kakai kotoa: ‘ilonga ha taha te ne hiki, te ne matafatafa ai; pea ‘e fakatefua ke fai mo ia ‘a e ngaahi pule‘anga kotoa ‘o māmani.

⁴‘I he taimi ko ia — ko Sihova eni mei he Ta‘ehāmai — te u taa‘i ‘a e fanga hoosi kotoa ‘aki ‘a e loto lelea, mo ia ‘oku heka ai ‘aki ‘a e sesele: ka te u faka‘ā hoku mata ki he fale ‘o Siuta, pea ko e hoosi kotoa ‘a e ngaahi kakai te u taa‘i ‘aki ‘a e kui loto.

⁵Pea ‘e lau ‘a e hingoa ‘eiki ‘o Siuta ‘i honau loto, Ko e tokoni kiate au ‘a e nofo Selusalema ‘ia Sihova Sāpaoti ko honau ‘Otua.

⁶‘I he taimi ko ia, te u ngaohi ‘a e ngaahi hingoa ‘eiki ‘o Siuta ke tatau mo ha tālafu ‘oku ulo ‘i he fefie, ‘io, ke tatau mo ha tūhulu ‘oku ulo ‘i ha ‘ū koane; pea te nau keina ‘i to‘omata‘u mo to‘ohema ‘a e ngaahi kakai kehekehe ‘oku nofo takatakai: pea ‘e kei nofo si‘i fefine ko Selusalema ‘i hono feitu‘u, ‘io, ‘i Selusalema.

⁷Pea ‘e fuofua fakahaofi ‘e Sihova ‘a e ngaahi tēniti ‘o Siuta, koe‘uhi ke ‘oua na‘a fakamofutofuta ki ha‘a Siuta ‘e he lāngilangi ‘o e fale ‘o Tēvita, mo e lāngilangi ‘o e nofo Selusalema.

⁸‘I he ‘aho ko ia ‘e fakamalumalu ‘e Sihova ‘a e nofo Selusalema; pea ka ai ha ketu ‘iate kinautolu ‘i he taimi ko ia, te ne tatau mo Tēvita; pea ko e fale ‘o Tēvita te ne tatau mo ha ‘otua, hangē ko e ‘āngelo ‘a Sihova he tāimu‘a kiate kinautolu.

⁹Pea ‘e hoko ‘i he taimi ko ia, te u feinga ke maumau‘i ‘a e ngaahi pule‘anga kotoa ‘oku ha‘u ke fai mo Selusalema.

¹⁰Pea te u hua‘i ki he fale ‘o Tēvita, pea ki he nofo Selusalema, ‘a e laumālie anga-loto-mai mo anga — hū; pea te nau hanga kiate au kuo nau tui‘i, pea te nau tangilāulau ‘i he taha ko ē, hangē ko e tēngihia ‘o ‘ete me‘a pē taha. Pea te nau fakamamahi koe‘uhi ko ia, hangē ko e fakamamahi ‘i he funga ‘o ha ‘olopo‘ou.

¹¹‘I he taimi ko ia ‘e ai ha fu‘u tangilāulau lahi ‘i Selusalema, hangē ko e tangilāulau ‘o Hētati-līmoni ‘i he Tele‘a ‘o Mekito.

¹²Pea ‘e tangilāulau ‘a e fonua, ‘o faikehekehe ‘a e fāmili mo e fāmili; faikehe ‘a e fāmili ‘o e fale ‘o Tēvita, pea faikehe honau ngaahi uaifi; faikehe ‘a e fāmili ‘o e fale ‘o Nētane, pea faikehe honau ngaahi uaifi;

¹³faikehe ‘a e fāmili ‘o e fale ‘o Līvai, pea faikehe honau ngaahi uaifi; faikehe ‘a e fāmili ‘o Simi, pea faikehe honau ngaahi uaifi.

¹⁴Ko e ngaahi fāmili kotoa ‘oku toe, ‘e faikehe ‘a e fāmili mo e fāmili, pea faikehe honau ngaahi uaifi.