Read KO E TOH TAPU KATOA TONGA KO SĀKALAIA 13 Bible Online

KO SĀKALAIA 13 - KO E TOH TAPU KATOA TONGA bible

KO SĀKALAIA 13

¹‘I HE taimi ko ia ‘e fakaava ha matavai ki he fale ‘o Tēvita, mo e nofo Selusalema, ki he angahala mo e fakalielia.

²Pea ka hoko ‘a e taimi ko ia — ko Sihova Sāpaoti eni mei he Ta‘ehāmai — te u tu‘usi ‘a e ngaahi hingoa ‘o e ngaahi ‘aitoli mei he fonua, pea ‘e ‘ikai kei manatua kinautolu; pea te u ‘ai ke hiki mei he fonua ‘a e kau palōfita mo e laumālie ta‘ema‘a.

³Pea ka ‘iloange ‘e toe fai ha palofisai ‘e ha taha, ‘e lea ki ai ‘e he‘ene tamai mo ‘ene fa‘ē, ‘a e ongo me‘a na‘e fanau‘i ia, ‘o pehē, ‘Oku ‘ikai totonu ke ke mo‘ui; he kuo ke lea loi ‘i he huafa ‘o Sihova; pea ko ‘ene tamai mo ‘ene fa‘ē, ‘a e ongo me‘a na‘e fanau‘i ia, te na tui‘i ia ‘i he‘ene fai palofisai.

⁴Pea ka hoko ‘a e taimi ko ia, ‘e maa‘i ‘a e palōfita takitaha ‘ene vīsone ‘i he‘ene fai palofisai; pea ‘e ‘ikai te nau ‘ai ha kofu fulufulua ke kākā.

⁵Ka te ne pehē, ‘Oku ‘ikai ko e palōfita au: ko e motu‘a fa‘a au: he na‘e fakatau au ‘e ha tangata ‘i he‘eku talavou, ‘o talu ai pē.

⁶Pea kapau ‘e pehē ‘e ha taha kiate ia, Ko e hā tū ‘a e ngaahi lavea na ‘i he vaha‘a ‘o ho ongo nima, te ne tali, Ko hoku taa‘i ia ‘i he fale ‘o hoku kau ‘ofa‘anga.

⁷Heletā ē, ofo hake ke fai mo hoku tauhi, pea ki he helo ko hoto takaua — ko Sihova Sāpaoti ia mei he Ta‘ehāmai — taa‘i ‘a e tauhi,[33] kae movete ‘a e tākanga; pea ‘e toe ala hoku nima ki he fanga ‘uhiki.

⁸Pea ‘e hoko ‘o pehē ‘i he fonua kotoa — ko Sihova ia mei he ta‘ehāmai — ko hono vahe ‘e ua ‘e tu‘usi ‘o mate; ka ko hono vahetolu ‘e toe ai.

⁹Pea ko hono vahetolu ko ia, te u fakahū ki he afi, pea te u fakama‘a kinautolu hangē ko e fakama‘a siliva; pea te u sivi kinautolu, hangē ko e sivi ‘o e koula: ‘e tautapa ia ki hoku hingoa, pea te u tali ia ‘e au; te u pehē, Ko hoku kakai ia; pea ‘e pehē ‘e ia, Ko Sihova ko hoku ‘Otua.